從西鐵醒返之後……: 26
「後面危險呀！」我向家明大叫。
「……咩話？」
家明猶豫一下先轉身望去，但已經太遲。單車男向家明奮力打出一拳，直接擊中側腹，將佢成個人打飛到幾米遠！
「家、家明！」
家明喺地下翻滾多圈後停低，瞓喺地上不停抽搐，而且嘴巴不斷吐出鮮血！
「吼吼吼吼吼吼吼！」單車手高聲咆哮起嚟，然後執起地上斷棍，準備向倒地嘅修洛文補上最後一擊！
「刀！」修洛文大叫一聲。
聽到修洛文先生嘅叫聲，我毫不猶豫咁將手中廚刀沿住地上滑去修洛文度。
與此同時，倪少賢唔知幾時跑到單車男面前，將扭開樽蓋嘅辣椒油成樽撥落單車男嘅面具上！
單車男俾辣椒油潑中雙眼，暫時失去雙眼視力，而修洛文趁住呢個機會執起廚刀，向單車手嘅頸部一揮！
噗哧—！
鮮血瞬間噴灑落修洛文身上，單車手終於向後倒下，浸淫於自己嘅鮮血之中。
修洛文一邊喘氣，一邊拎住刀戒備，確定單車手無法再起身還擊，先敢放鬆落嚟。
今次、今次……終於成功打低單車手……
不過即使動脈被割開，鮮血大量噴出，單車手依然死心不息，伸出沾滿鮮血嘅手掙扎。過多大約十秒，單車手終於停下手，再無任何反應。
為咗打低呢個面具人，大家都變得傷痕纍纍……
我同莉莉傷勢較輕，而俾籃球打暈嘅鬼仔已經醒返，而修洛文正面承受咗單車男嘅肘擊，阿武更俾單車男打得手部骨折，無受傷嘅大概只係倪少賢。
至於家明——
佢嘅情況最為嚴重，佢瞓喺地上不停嘔血同抽搐，可能……係肋骨被打斷，將內臟插穿！
「我雖然唔係救護員，但呢個情況……即使送到醫院都好難救。」身為紀律部隊嘅阿武講。
「呼——呼——」家明用盡力氣咁呼吸，「你哋咁嘅勝利者眼神望住我，係咪想講……抵我死呢？」
「我、我哋……只係想嚟睇下你情況，無咩特別意思。」我解釋道。
「情況一眼就明，我已經無得夠，死都只係時間問題……係我太大意，無留意到佢未死，先會俾佢反將一軍。」
「唔係，你唔係大意。」修洛文整理好身上血跡後，行過嚟講：「如果你有稍微信任呢個學生哥講嘅話，你就唔會遲疑咗下，而俾面具人打中。」
修洛文先生指嘅學生哥，應該係講我。當時我的確向家明大嗌咗一聲，但最後家明都係俾單車手打中。
「哈哈！你係想講我係因為唔肯信任人，所以先落得咁嘅下場？」家明冷笑一聲，「唔明白嘅人係你哋先啱，一個二個喺啲咁嘅環境底下，第一樣緊張嘅嘢唔係自己條命，而係『合作』同『信任』……」
「我覺得……只會作出對自己最有利嘅決定，唔理其他人，只係懦弱嘅表現。」我膽粗粗咁反駁家明嘅話，「真正嘅理性，係可以分辨出邊個係值得信賴嘅同伴。」
「值得信賴嘅同伴……咳！」家明嘔出幾口鮮血，「唔知點解我會諗阿逸，佢應該係遠處嘲笑緊我嘅愚蠢掛……到死呢刻，我覺得自己同阿逸永遠唔啱傾。」
家明嘅呼吸愈來愈虛弱，但佢仍要維持住呢個狀態，直到失血過多而死為止。
「殺死我喇……」
家明氣若游絲吐出一句，不過在場並無人願意動手。
此時，倪少賢行到去家明身邊，將腰間嘅廚刀抆出嚟，然後向住家明頸部一揮！
「等、停手——」
但已經太遲，刀刃將頸部嘅大動脈劃開，鮮血瞬間從家明頸部噴出！
「你點解要咁樣做？」莉莉第一個出聲喝問。
「呢個係佢嘅願望，我只係幫佢實現願望，令佢唔使再承受痛苦。」倪少賢平淡咁講。
「就算係咁……你都可以用第二個方式，唔一定要……咁樣！」
「你好似有啲嘢誤會咗，我唔係耶穌佛祖，我只會用最方便嘅手段完成我想做嘅事。」倪少賢收起平時輕佻嘅嘴臉，十分認真咁望住莉莉，「如果你覺得有問題，黠解你唔一早出手？」
「因為……」莉莉一時語塞，無法反駁。
終於，家明停止抽搐，安然咁逝去。
「雖然我哋成功殺死單車手，但據你所講應該重有其他面具人喺學校係咪？」鬼仔嘅哥哥阿武問。
「係……重有一個拎住機關槍嘅新郎！」我回答。
「你哋睇下！」鬼仔一邊用紙巾止鼻血，一邊指住單車手。
原來單車手臨終前嘅掙扎，係喺地板上寫低咗幾隻血字。
「我係王……？」我將嗰幾隻字讀出。
王……即係咩意思？
單車手臨終時以最後嘅力氣寫下呢三隻字，但係無人明白單車手想表達啲咩。
我哋雖然殺死咗單車手，但遊戲依然未完結……至少重有拎住機關槍嘅新郎面具人，而且唔知重會唔會有其他面具人！
但係……我哋已經無力應對。
同空姐以及小丑有所不同，今次係第一次喺保留全屍嘅情況下將面具人殺死，而令我更在意嘅係……
呢副面具底下，究竟係一個點樣嘅人……？
我望住單車手嘅屍體，佢臉上嘅面具同空姐以及小丑唔同，係呈憤怒表情，而空姐同小丑嘅面具都係開心表情，小丑嗰副睇落笑得比空姐更誇張。
我膽粗粗咁伸手過去單車手嘅面具，但與此同時一道廣播傳出：
『鬼方勝利，遊戲結束。各位玩家將會在三小時後進行傳送，此段時間為第四層遊戲前的休息時間，請各位好好享受。』
「咩、咩話？」我以為自已聽錯，但眾人嘅反應確認咗事實。
「遊戲完結？你唔係話重有個新郎嘅咩？」鬼仔向我講。
「唔通有其他人殺死咗面具人！」我道出唯一可能性。
「應該係。」阿武和應，「Anyway，總算係告一段落。」
「唔知其他人點呢……逸哥、夏舞，重有愛兒！」我望向莉莉同修洛文，「你哋有無見過佢？」
「愛兒……？」莉莉露出疑惑嘅表情，「阿逸同夏舞，遊戲開始到而家都無見過。」
「我都係。」修洛文回應。
「係喇，我都要去搵返雷爺同詩詩佢哋。」鬼仔向我哋講。
「我……都想去搵返逸哥佢哋。」我講。
「既然係咁，我哋一齊幫你哋搵。」阿武提議，「反正我哋都知我哋嘅同伴就喺烹飪室。」
「好、好……多謝你哋！」我答謝道。
「咁有趣嘅事可唔可以預埋我一份？」倪少賢興致勃勃咁講，「我都想睇下阿逸去咗邊。」
雖然因為啱啱件事令大家對佢有芥蒂，但無可否認佢係一個值得信賴嘅強力同伴。
處理好傷勢之後，我哋就出發去搵逸哥佢哋。
呢間學校的確十分大，單係行晒走廊都差唔多要成分鐘，而且重要有九層。
我哋兜兜轉轉，搵咗大約半個鐘，到達室內游泳池外面時，見到一道熟悉嘅身影——
「係阿逸！」莉莉指住眼前身影。
不過，映入眼前嘅係——
渾身血污嘅逸哥背夏舞從室內游泳池緩緩步出來