從西鐵醒返之後……: 25
「喂！駱譯，單車手要嚟喇！」莉莉嘅聲音傳入我耳中，將我從恐懼嘅思緒拉回現實。
但就算係咁，我嘅雙手雙腳仍然不由然咁抖震，完全無法停止。
如果係逸哥嘅話，佢應該會有更好嘅辦法對付佢，但我……遍遍揀咗最蠢嘅方法……
「事到如今無得唔上，我打頭陣，你哋跟我喺後面，搵機會突擊！」鬼仔嘅哥哥阿武拎住兩個平底鑊，戰兢地向單車手行去。
二人距離不足五米時，阿武先發動攻擊，將平底鑊向單車手嘅頭拍過去。
錚—！
單車手用手擋住，發出清脆嘅金屬碰撞聲！
聽到呢一下聲響後，我明白點解單車手可以赤手空拳打到啲人咁，佢雙手都戴住類似指環嘅武器，即使普通打中臉都可以造成重創。
而且，最關鍵嘅係佢擁有十分強嘅力量。
阿武同單車手激烈咁打起上嚟，雖然阿武有武器，但單車手竟然輕鬆迴避晒所有攻擊……反而阿武先係處於劣勢一方！
「我哋……可以點做好？」我嘅身體不自覺咁顫抖著。
「我都想幫手，但係佢哋……」莉莉咬牙切齒企喺原地，「根本無辦法搵到機會出手！」
在場五人，大概只有阿武可以同單車手對打，企喺身邊嘅我哋根本無餘地去介入。
「Shit！」
單車手將阿武手上其中一塊平底鑊從手柄打甩出嚟，甩出嚟嘅平底鑊擊中阿武隻眼！
阿武即刻舉起另一塊平底鑊，但單車手飛身一拳，將阿武連人帶鑊打飛！
「啊啊！」阿武倒在地上，痛苦不堪咁呻吟。
「阿哥你點呀！」鬼仔緊張大叫。
「我隻手……好似骨折！」
就、就連我哋當中最大隻嘅阿武，喺單車手面前都係不堪一擊……
比起空姐同小丑，佢哋雖然手持殺人武器，但本身只不過係普通人，然而單車手無殺人武器，佢嘅存在本身就係無敵……
我、我哋根本打唔贏，要快啲走，要快啲走！
「駱譯，快啲冷靜！」喺我身旁嘅莉莉大叫，「我哋唔可以白費阿武嘅努力！」
單車手向住倒地嘅阿武行去，準備做出對啱啱嗰對男女一樣嘅事……
會死，佢會死！
「唔准你向我阿哥出手！」鬼仔唔知幾時推咗架籃球車，將籃球向單車手掟過去。
單車手竟然將籃球一手接住，然後嗖一聲將籃球如同炮彈掟返轉頭！
嘭—！
鬼仔俾籃球正擊臉門，噴出兩行鼻血，直接昏倒地上！
就喺呢個時侯，莉莉趁住空隙拎出廚刀，向單車手桶過去！
但單車手喺刀尖將要桶落胸口嘅一刻，單車手一手捏住莉莉條頸，將佢騰於半空之中。
「啊啊啊……」莉莉面色蒼白，痛苦咁掙扎大叫。
「放手呀！」
我大叫一聲，然後逕直向單車手衝過去，但單車手竟然將莉莉向我掟過嚟！
「啊！」我反應唔切，同莉莉撞埋一齊，然後一同跌倒地上。
我撳住額頭，撐住地下勉強將頭抬起，而單車手就好似死神咁漸漸向我哋步近。
「……莉莉，你有無事？」
「唔得，我郁唔到！」莉莉痛苦不堪咁講。
望住單車手嘅身影，莫講話將腰間嘅刀拎出嚟桶過去，我就連逃跑嘅力氣都無，只能待在原地任人宰割。
實力差距實在太大……
呢個時侯，倪少賢從我身旁經過，向單車手行過去。
「你、你想點？」我驚訝咁問。
「緊係要打低佢喇，唔通好似你咁驚到縮喺度唔識郁咩？」倪少賢身上只有一把廚刀，但佢無將廚刀拎出，而係從褲袋拎出一樣嘢。
「呢枝、呢枝係……」
單車手向住倪少賢衝過去，與此同時倪少賢將手中嘅嘢向住單車手噴去——
辣椒油穿過面具上眼睛嘅空孔，噴中單車手其中一隻眼！
單車手頓時似想撳住臉咁撳住塊面具，狼狽後退！
原來……倪少賢喺烹飪室時翻弄調味料，就係為咗呢個目的！
「既然你會俾辣椒油刺激到雙眼，咁證明你只不過係人類。」倪少賢笑住咁講。
不過單車手好快就重整好姿態，辣椒油只係噴中佢其中一隻眼，單車手重有另一隻眼睛嘅視力。
「吼吼吼吼吼吼吼吼吼！」單車手高吼一聲，似係向倪少賢發出宣戰。
但係倪少賢從容不迫，反而指住單車手……
唔係，係指住單車手身後——
「你睇下你後面。」
喀嘞—！
清脆嘅聲音響起，一支長長嘅木棍從後擊中單車手嘅頭部，將面具打出一條長長嘅裂痕！
係、係邊個……？
單車手勉強頂住身體，並無倒下，而佢身後，襲擊佢嘅呢道高大身影——
竟、竟然係修洛文先生……！
修洛文身上雖然有啲血污，但睇落並無大礙，而佢手上拎住一支木棍，睇落……就好似係從廁所嘅地拖拆出嚟一樣。
修洛文掃視周圍一圈，簡單問咗句：
「呢度咩情況？」
「呢度……」我簡單將情況道出，「只要殺死所有面具人，就可以過關！」
「原來……係咁。」修洛文聽完後，將目光移到單車手身上。
呢雙目光，我曾經喺生物堂睇片時見過……係老鷹見到獵物時，準備作出獵食嘅目光！
單車手亦將目標轉移到修洛文身上，只不過……修洛文就連比佢大隻嘅壯漢都可以打低！
如果係修洛文先生……應該可以打贏單車手！
「吼吼吼吼吼吼！」單車手向天咆哮一聲，然後向修洛文衝過去。
唔知係咪因為俾辣椒油噴中眼，單車手變得十分躁動，不斷咁向修洛文揮拳踢腿，作出猛烈嘅攻勢！
但係修洛文唔單止避開單車手所有攻擊，更加手法自如咁耍動地拖棍，將單車手打得落花流水！
望住修洛文先生嘅背影，充斥著心中嘅恐懼頓時煙消雲散……
可以、可以……修洛文先可以將單車手打低！
單車手不斷後退，雖然無法睇到佢嘅表情，但佢嘅行動話畀我知……佢係害怕緊對方！
無錯……就如倪少賢所講一樣，佢係人類！佢會驚痛，會識得害怕！
「小心！」修洛文突然大叫。
單車手同修洛文拉開咗一段距離後，突然向我同莉莉衝過嚟！
就喺千鈞一發之際，修洛文從後用地拖棍將單車手條頸勒住，但原來單車手呢下只係佯攻，佢一手捉住地拖棍，另一手肘擊修洛文嘅肚部，將佢打倒地上！
佢真正嘅目標係令修洛文分心，將佢打低……！
修洛文因為呢一擊而痛苦不堪，而單車手將地拖棍屈斷，拎住其中半支棍，將尖銳嘅斷口瞄準修洛文插落去！
修洛文先生為咗救我先會咁，我、我唔可以俾修洛文先生有事！
我奮不顧身衝過去，出盡全力將單車男牢牢抱緊，但單車男力量實在太大，輕輕轉身就將我摔落地上！
唔可以……我要救修洛文先生……
我已經唔想做一個礙手礙腳，無用嘅人啦！
斷棍將插落修洛文嘅一刻——
噗哧—！
有個人出現喺單車男身後，將一把刀插落單車男身上！
「……家、家明？」我驚訝咁望住眼前呢個人。
「呼—！」家明深深呼出一口氣，「我喺附近匿咗咁耐，總算係搵到機會，殺死呢個面具人。」
單車男中刀之後，斷棍從佢手中滑落，慢慢跪落地下。
「我一早就發現呢個遊戲嘅真正規則，作為『鬼』嘅角色唔係佢哋而係我哋，我哋要做嘅係殺死呢班面具人。」家明轉過身望向我，「不過我一直都搵唔到機會殺死佢，直到你哋出現，我先從中搵到機會殺死佢。」
「你……你意思係，你係當緊我哋做誘餌？」我講。
「隨你點講，我只係選擇對自己最有利嘅決定。」
「就係因為咁，所以……大家俾人打低，甚至修洛文差啲俾單車手殺死時，你都唔出嚟幫手？」
「我無可能冒住性命風險去救晒所有人，喺呢個隨時可能會死亡嘅情況，，同伴就只係得一個，就係自己。」家明瞧一瞧修洛文，然後講：「更何況，就結果嚟講我都救咗佢，都算係皆大歡喜。」
「家明！你望下咁樣叫救咗修洛文？」莉莉慢慢撐起身，不忿咁盯住家明，「唔通我哋之間一啲要計到咁盡，連少許信任都唔可以有咩？」
「呢個遊戲中係無人可以信任，就算口講做同伴，但到最後關頭大家都會為咗自己嘅利益而做出背叛嘅行為。」家明淡淡咁講，「與其係俾人出賣，不如更加愛惜自己，只要顧及自己就已經夠，其他人係點……已經無所謂。」
我……覺得家明講嘅或者係無錯……
只要顧好自己嘅事，其他嘢咩都唔使理，咁樣先係最好嘅生存之道——
不過，我所仰慕嘅嗰道背影，佢嘅目光卻放喺更遠之處。
「無論係你，定係阿逸，一個二個都太天真，能夠相信嘅人就只有——」
此時，家明身後嘅單車手緩緩站起……