從西鐵醒返之後……: 24
刀尖將要刺進倪少賢頸部時停下。
「喂喂……你又唔係戴住面具，拎把刀插過嚟做乜？」倪少賢高舉雙手。
「只係以防萬一。」對方傳出一把女性聲音，「但很抱歉，就算唔係面具人都唔會俾你內進。」
呢把聲音好熟悉……當我望見對方嘅身姿，我就一眼認出係邊個！
「莉莉，係我呀！」我向住莉莉講。
莉莉見到我時呆咗呆，將刀放低後講：「駱譯，係你？」
「係。」我掃視一眼倪少賢，猶豫咗下，但最後決定講：「佢係我同伴，而且係逸哥嘅朋友嚟。」
莉莉聽完之後皺起眉頭盯住倪少賢，但倪少賢始終展現從容嘅表情。
「我明白喇，快啲入嚟！」
我同倪少賢跟住莉莉進入烹飪室，發現裡面凌亂不堪，檯凳廚具柴米油鹽成地都係，而且……其中一邊廚櫃前有四條屍體喺度！
「唔使望喇，我哋嚟之前已經係咁，為咗無咁顯眼所以將佢哋搬埋一邊。」
有個同我一樣著住校服，但明顯年紀比我少嘅人行過嚟，佢手持住一個鐵鑊，而且不遠處重有大約五個同樣著住校服嘅人，同埋一個身型高大，皮膚黝黑，著住紀律部隊制服嘅男人。
估唔到……呢度竟然有個咁嘅集團。
之前廣播提及過有成百幾人嘅生還者，佢哋可能好似眼前呢班人咁，組成一個集團匿喺學校某個角落。
不過除咗制服男，其他人都以敵視嘅眼神望住我哋。
「你哋係咩人？」鐵鑊男講。
「佢……佢哋係我上個遊戲嘅同伴。」莉莉講。
「趕佢哋走，呢度唔歡迎佢哋。」
「點、點解？我哋無任何惡意，只係想嚟搵武器！」我解釋。
「唔得，同我走。」鐵鑊男神情洶湧咁行過嚟。
「等等，佢哋係信得過。」莉莉截停喺鐵鑊男面前。
「你啱啱都話嗰個傑少都係你同伴，結果係點你睇下！」鐵鑊男指住另外嗰群人，原來當中有個人癱坐地上，氣息萎靡，而且成身都係血跡！
「發、發生咩事嚟？」我問。
「我哋原本係匿喺體育館度，之後俾鬼追殺嘅時侯，嗰個傑少突然出手打傷我個friend，拎嚟我個friend做誘餌！」鐵鑊男十分激動，「結果我個friend俾鬼打中，變成而家咁……下次見到佢一定唔會放過佢！」
我望向嗰個癱坐嘅人，佢身上有處血肉模糊嘅傷口，不停流出血水，情況十分嚴重……如果唔送去醫院嘅話，基本上無得救……
但係，究竟點樣打先可以將一個人打到呢個程度……？
「所以我係唔會再信任何人，就算你係莉莉上個遊戲嘅同伴都好！同我走！」
「哈哈！我哋似乎唔受歡迎！」倪少賢輕笑一聲。
莉莉都好為難咁望住我哋，佢雖然想帶我哋入嚟，但似乎呢度話事嘅係嗰個拎鐵鑊嘅中學生。
「唔好意思……駱譯。」莉莉向我道歉。
「唔緊要，不過臨走之前，我可唔可以問你一啲嘢？」我向鐵鑊男講。
啱啱鐵鑊男所講嘅嘢，令我十分在意——
「你哋遇到嗰隻鬼係點嘅樣？」我問。
鐵鑊男皺咗下眉頭，然後答：「係一個著住單車服，非常大隻嘅人，佢戴住一副好嬲嘅面具，而且雙手唔知戴住咗啲咩，總之……一拳就可以打死人。」
鐵鑊男形容嘅面具人係我哋前所未見過，而且可以一拳打死人……咁究竟要有幾大力氣，先可以將一個人打到好似癱坐地上嗰個人咁……血肉模糊……
加埋呢個已經有四個面具人，會、會唔會……有第五個、第六個！
鐵鑊男問：「你問嚟有咩意思，你唔係想去對付佢嘛？」
「……啊……係、係！」
雖然聽完對方描述之後覺得好可怕，但係……如果咁樣可以完結呢場遊戲嘅話，就一定要嘗試做！
「竟然有啲咁嘅白痴去送死都有。」鐵鑊男搖頭嘆氣。
「送死嗰個係你咋掛？你留喺度遲早等死咋。」倪少賢嘲笑一句。
「你話咩話？」鐵鑊男似被倪少賢激怒。
「等等！」我馬上調停，「佢唔係咁嘅意思！其實……呢個遊戲嘅通關方法，就係要殺晒嗰班人去。」
「殺晒嗰班人？」
「正常情況鬼捉人係唔會完結，除非鬼捉晒所有人，如果我哋係作為『人』嘅話，呢個遊戲永遠都唔會完……」我解釋，「除非……我哋先係『鬼』，而面具人佢哋係『人』。」
呢個遊戲嘅名係百鬼夜行，既然係百鬼，我哋係「鬼」嘅合理性大好多，亦符合到呢個遊戲嘅通關要求。
鐵鑊男聽完之後大吃一驚，然後講：「你意思係我哋要去殺死嗰個單車手，遊戲先會完？」
「無錯……而且除咗佢之外，重有一個拎住機關槍嘅新郎，可、可能會重有更加多面具人。」
「咁啊……」鐵鑊男聽完後露出苦惱嘅表情。
「鬼仔，嗰個面具人好危險，我哋已經見識過！」佢其中一個女仔同伴向鐵鑊男講。
被稱為鬼仔嘅鐵鑊男思考一陣後講：「但係佢講嘅嘢唔係無道理，就算係假，殺死面具人都係對我哋有好處。」
「會死㗎，你竟然聽陌生人都唔聽我講！」
「唔係聽邊個問題，我覺得……就算留喺度遲早都一樣會死。」
「哈哈！呢個細佬講嘅就啱聽喇！」倪少賢講。
「咁即係……你肯相信我哋，兼且同我哋一齊去對付面具人？」我問。
「唔……」鬼仔思索一會，然後點頭講：「可以咁講，而且我知道單車手位置。」
無諗過鬼仔連面具人嘅位置都知道，咁嘅話就免去尋找面具人嘅時間同風險。
「你……你鍾意去送死就去送飽去，我要……留喺度！」少女不忿咁坐埋一邊。
「我都唔預你哋班女仔會去冒險，加上Anson受咗重傷……」鬼仔望向身受重傷，癱坐地上嘅嗰個男仔後，同另一個著住運動衫嘅男仔講，「雷爺，佢哋交畀你睇住。」
呢個著運動衫嘅男仔十分面善……我認得啦，係上個遊戲最終指令時同古朗一齊上嚟我哋房嘅運動男，當時佢無咩點出聲，所以我都差啲唔記得咗佢。
除咗鬼仔同雷爺，同埋瀕死嘅嗰個男仔，剩低嘅全部都係女仔。
「Bro no problem！但你係認真要去隊冧班面具人？」雷爺問，「加埋你都係得三個人。」
「我都會幫手。」莉莉講。
雖然有莉莉同鬼仔加入係值得開心，不過……我哋都係得四個人。
「我都會去。」一直企埋一邊，呢個集團最後一個人嘅紀律部隊制服男行到鬼仔隔籬，「細佬要出擊，大哥一定要去幫手。」
原來制服男同鬼仔係兄弟，而且佢身型高大，睇落好似幾可靠。
「就咁決定，雷爺你哋就留喺度，萬一……我哋出咗事，你哋都有個照應。」鬼仔講。
「白痴！你先唔理你會唔會死！」少女反鬧返鬼仔轉頭，呢個分別嘅氣氛並唔係太好。
之後我哋喺烹飪室拎定所需武器，途中莉莉行到我身邊。
「嗰個……阿逸個朋友，你覺唔覺得佢份人好奇怪咁？」
我望向倪少賢，當大家搵緊武器時，佢喺度翻弄著調味料，唔知做緊啲乜。正如莉莉所講，佢的確係好奇怪，而且令人摸不著頭腦……
我回答：「佢份人係有啲奇怪咁……但、但係佢殺死咗其中一個面具人。」
「咩話？」
莉莉聽完之後已經大吃一驚，不過我將逸哥殺死空姐話埋畀莉莉知後，莉莉就更為驚訝。
做好準備之後，鬼仔同阿武……即係鬼仔嘅哥哥，就帶我哋前往單車手所在之處。
呢刻我嘅心情非常緊張，害怕嘅感覺無法停止……
雖然再次遇見莉莉，而且有更多人出手相助，但我哋而家係要主動去搵面具人……
我哋到達目的地，原來我哋要前往嘅地方原來離烹飪室好近，只要沿住走廊行過咗B樓梯之後，就到達嗰個地方——
室內體育館。
我抱住戰戰兢兢嘅心情，打開室內體育館嘅大門，一入到去係觀眾席嘅位置，而下方——
係血跡斑斑，屍體遍野嘅室內籃球場！
呢度，係目前為止見到有最多屍體嘅地方，而且大部分屍體嘅死狀都好恐怖……
「莫、莫非……」我雙腳不禁顫抖起嚟，「就係嗰個單車手做出嚟嘅？」
「無錯，而且屍體數量比起啱啱起碼多咗成倍。」阿武十分警戒望住眼前。
「面具人呢……？」莉莉擔憂咁問。
雖然籃球場上有好多屍體，但唔見鬼仔同阿武提及嘅單車手。
正喺呢個時侯，一下又一下硬物重擊嘅聲響起，源於籃球場對面某個房間！
「好似係從健身室發出。」鬼仔講。
雖然睇唔到房內嘅情況，但係……有種非常不妙嘅預感……
嘭！嘭！嘭！嘭！嘭！嘭！嘭！
房門忽然被打開，有一男一女從房間跑出嚟，而追住二人嘅……係一個身高接近米九，著住單車服，戴住面具嘅人！
「就係佢……！」鬼仔見到單車手，雙手不由然咁震起嚟。
只見其中女仔失平衡跌咗落地，正當女方驚恐咁望住單車手求救尖叫時，單車手卻同佢擦身而過，追上其中一個逃走嘅男仔，一腳踢落佢隻腳度。
嗰個男仔慘叫一聲跌倒地上，單車手行到佢面前，一拳一拳咁打落佢塊臉。
慘叫聲於體育館內徘徊，每一拳都發出清脆嘅聲音，每一拳都噴出鮮紅嘅血水，直到男子塊臉血肉模糊，連五官都認唔出之後，單車手先停低手。
「無、無、無可能……我哋打唔贏呢個人！」我感覺到下腹有股暖意。
至於另一個女仔望到眼前情景，癱坐地上失禁起嚟，連逃走嘅意志都已經失去，但單車手行到佢面前企喺原地，並無任何舉動。
「佢、佢放過嗰個女仔？」
但下一秒，單車手一腳踩落女仔嘅胸口上，女仔頓時噴出一口鮮血，身體不斷抽搐。
我明白喇……眼前呢個面具人同空姐、小丑唔同，佢唔會好乾脆咁了結他人性命，而係會用最殘忍、最痛苦嘅方式將人殺死……
而我哋，竟然想打算殺死呢個咁恐怖嘅對手……
單車手已經注意到我哋，佢將嗰個女仔踩低半身凹陷，確認殺死之後，就一步一步往我哋行過嚟。
「打唔過……我哋、我哋要快啲走！」
當我想走嘅時侯，發覺雙腳完全動彈不得，恐懼已經完全支配我嘅身體……
今次，係我第一次感受到徹徹底底嘅死亡威脅……