從西鐵醒返之後……: 23
＊
我仍然未反應到發生咩事。
啱啱逸哥諗到一個計劃去對付面具人——先將化學室所有窗封死，再將消毒酒精同磷粉灑落化學室兩邊門口，然後就由佢做誘餌，將面具人引入去化學室，再喺佢逃出嘅一刻將點著嘅火柴掟落兩邊門口，以火焰堵塞，將面具人困喺化學室入面。
我同另一個著衛衣女仔，即係愛兒，曾經阻止過逸哥咁做，逸哥已經唔係第一次做出誘餌嘅行為。
「既然佟逸霖……即係阿逸咁有信心，就交畀佢做啦。」
逸哥嘅一意孤行，加上倪少賢嘅慫恿，最後決定實行呢個計劃。
倪少賢呢個人，感覺好似有啲怪異咁，但我又講唔出係咩感覺……我最初遇到佢，就係喺地下層嘅走廊，當時樓上好多人俾面具人殺死，所以我就逃到地下層。
當時映入眼前嘅佢，係一副毫無警戒，悠閒自在，就好似唔驚俾面具人，一臉散步咁嘅模樣。
佢見到我嘅時侯，更展起笑容同我打招呼。
呢種咁反常嘅態度……令我打從心底裡對佢警戒起嚟。
逸哥準備好一切，獨自守喺化學室門外，而我哋就匿埋喺隔籬課室侯命。
無幾耐走廊傳嚟一陣腳步聲同電鋸聲，然後又有幾下嘈雜聲。雖然我哋唔知出面發生咩事，但我哋估應該小丑喺附近。
之後，逸哥發出暗號，我哋即刻去到化學室門前，等逸哥逃脫。
但喺逸哥未出到嚟前，有一個人卻將火柴燃點，然後掟落兩邊門口！
映入眼前嘅係發生爆炸，冒起熊熊大火嘅門口，以及——
仍然喺化學室內未逃出嚟嘅逸哥！
「你做乜嘢！」愛兒向住某個人大叫。
嗰個人——就係眼前呢個著格仔恤衫，叫阿樂嘅男仔！
「阿逸重未出嚟，你點解就要掟火柴落去？」愛兒激動咁捉住阿樂嘅衣領。
「萬一、萬一佢失敗咗，小丑走咗出嚟點算？」阿樂慌張咁狡辯，「我都係以防萬一，先咁樣做！」
「歪理！你知唔知咁樣會害死佢？」愛兒鬧返轉頭。
「咁又點……你幾時變到咁佢咁friend？佢係我哋敵人嚟㗎！佢哋重走嚟阻止我哋達成最終指令，我哋差啲死呀！」
阿樂一下甩開愛兒，愛兒啊一聲跌咗落地。
「你、你咁樣對女仔都得嘅？」我膽怯咁講。
「我鍾意點咪點，就係呢條大愛撚，又話乜乜唔可以傷害人，又要同人講對唔住，你以為咁樣可以保住條命呀？」阿樂繼續指住愛兒鬧，「我唔怕話畀你知，林仔佢已經死咗，係我推佢去死！」
「你、你點可以咁做？」愛兒手撐地上，露出一副就要哭出嚟嘅表情。
林仔……好似係有份襲擊我哋嘅人，我同夏舞、修洛文落去1609時曾經見過一眼，淨係記得係戴cap帽嘅男人。
「重有你條八婆，明明嗰場指令嘅出局條件係所有寫落紙上嘅人平均體重最重嘅房間，你竟然唔寫自己，寫我？我差啲俾你累死呀！」阿樂竟然舉起腳，想踢落倒地嘅愛兒身上。
「你停手！」我一嘢撞開阿樂。
「你條撚樣，你都係佢哋一份子！」阿樂兇狠咁盯住我。
就喺呢個時侯，一抹黑影從被火焰吞沒嘅大門中躍出。
嘰嘰嘰嘰嘰嘰嘰嘰嘰嘰嘰嘰——
唔通……！
血花四濺。
阿樂嘅側腹俾電鋸鋸開，內臟從斷口流落地上，而企喺阿樂身後嘅就係小丑！
「啊……啊？」阿樂唔敢相信咁望住自己下腹，佢甚至未意識到發生咩事。
小丑嘅衣服燒得破爛不堪，更有啲位置依然有火光燃燒，但佢竟然無懼火焰行出化學室！
望到眼前血腥畫面，胃囊不禁有翻騰嘅噁心感。
「救命，救……啊啊啊啊……」阿樂隨著電鋸不斷抽搐。
「阿樂！」愛兒大叫。
之後，小丑將阿樂攔腰斬開！
「嘻嘻嘻嘻！」小丑發出心寒嘅笑聲，「小丑嘅表演，小丑嘅精神，係never die……」
小丑拎住電鋸，步伐唔穩咁繼續向我哋行過嚟……
點、點算好……！
呢個時侯，倪少賢從褲袋拎出一樽嘢，直接潑落小丑身上，原本喺小丑身上嘅星火頓時變得旺盛，如同火人一樣。
終於，小丑緩緩向後倒下，啱啱好倒在阿樂身旁。
解、解決咗小丑？今次小丑真係唔會再企返起身㗎喇？
但係倪少賢並無停手，從褲袋拎出另一包透明袋，袋中裝有大量磷粉……
唔通……
「停手呀！」
愛兒向住倪少賢大叫，但已經遲咗，倪少賢將粉末掟落小丑身上，頓時產生猛烈大火，波及埋小丑身旁嘅阿樂！
「啊啊啊啊啊啊啊！」阿樂嘅慘叫聲徘徊於走廊之中。
咁樣……咁樣未免太殘忍了……
愛兒望見眼前情景，馬上企返起身質問倪少賢：「你點解、點解要咁做？」
但倪少賢一臉輕佻，滿不在乎咁講：「佢咁嘅樣已經必死無疑，同埋呢個係殺死小丑唯一機會，隻小丑喺入面咁燒法都唔死，所以一定要確保殺死佢。」
「你明知佢已經救唔返……重要令佢更加痛苦咁死去，點解你可以咁無人性？」
「小姐，唔清楚現況嗰個係你，係你哋話要殺死呢隻小丑。」倪少賢嘲笑住咁講，「同埋你啱啱無聽到佢講啲乜咩？佢根本無當過你係同伴，為咗自己佢可以推所有人去死，你重為呢啲咁自私嘅人著想做乜？正義法官。」
「你簡直、簡直係黐線！」
當二人爭執緊嘅時侯，我諗起一樣嘢——
既然小丑可以從裡面行到出嚟，可能逸哥佢都無事！
喺走廊不遠處位置，我見到滅火筒，我馬上跑過去將滅火筒拎落嚟，依照學校教過嘅方法將保險鎖打開，然後向住化學室其中一道門口噴去。
將火撲熄之後，我馬上衝入去化學室，但一陣刺鼻嘅氣味飄嚟。
「發生咩事……」我掩住鼻，觀望室內情況。
玻璃櫃燃燒著猛烈火焰，以及地上有個倒臥地上，斷咗一件手臂嘅人。
「逸、逸哥……佢死咗呀！」
「你哋講咩呀？」倪少賢從容行到面前，笑住咁指住地上嗰個人，「佟逸霖今日係著黑色高領衫，同我件白色嘅係情侶衫㗎，呢個人邊度係佢？」
「吓……」我望真啲，無論係衣著定髮型，呢個人的確唔係逸哥。
但、但係……呢個人好似曾相識……
「係、係佢！」我驚訝咁大叫，「點、點解……佢會喺度？」
我認得呢個人，喺第二場遊戲最終指令，到達1609時我曾經見過呢個人，佢好似叫做古朗。
但、但係……點解佢會喺度……而且重斷咗一條手臂？
呢度……究竟發生咗咩事？
呢個時侯愛兒亦進入化學室，佢見到瞓喺地上嘅古朗，馬上檢查佢嘅情況，但睇嚟……已經返魂乏術……
「你哋睇下。」倪少賢指向窗口位置，其中一塊窗嘅玻璃係被粉碎，「佟逸霖應該走甩咗。」
「唔通逸哥由呢度跳咗落去？」我走過去窗口望，樓下卻唔見逸哥嘅身影。
「哈哈！應該係喇！」倪少賢笑咗笑，「果然係鍾意玩命。」
「點解、點解你呢刻重可以咁開心笑出嚟，你個腦究竟係唔係正常？」愛兒以十分厭惡嘅眼神盯住倪少賢。
「反正我哋已經墮入咗呢場篩選，無得選擇，咁不如就輕輕鬆鬆當係遊戲咁玩囉。」倪少賢聳一聳肩，「最多咪係死。」
愛兒愣望住倪少賢，大概係無諗過會得到咁樣嘅回答。
「你哋……黐線㗎！」愛兒掃視我一眼，然後轉身離開，「我要一個去搵返阿逸返嚟！」
「等等，我都——」
「唔好跟住我！」愛兒大喝一聲，然後從化學室離開。
我、我原本都想幫埋一份去搵返逸哥，但係……係咪因為我太無用？
無論係過去定現在，我都係一個懦弱兼且無用嘅人，總係幫唔到其他人手，只會識得拖後腳……
我以為自己喺上一場遊戲成功改變自己，但、但原來唔係咁……
當逸哥主動要做誘餌，我卻無勇氣自薦頂替逸哥；當愛兒要冒住危險尋找逸哥，我卻企喺度咩都幫唔到手。
我，果然係一個廢柴……
「喂，走喇！我唔想再吸毒氣。」倪少賢掩住鼻，向門口行去。
「你……諗住去邊？」我無法判斷眼前呢個人可唔可信，佢份人的確係好異常，但佢又係逸哥嘅朋友……
最重要嘅係就結果嚟講，佢係殺死小丑嘅功臣。
「去邊？當然係去捕獵剩低嘅面具人喇！」倪少賢舉起手指數，「一個？唔係，或者唔止。」
「我、我……想去搵逸哥……」我鼓起勇氣講。
「哈哈！」但結果換嚟倪少賢嘅笑聲，「你……真係唔明而家情況。」
「咩、咩話？」
「你又唔知佢去咗邊，點搵呢？更何況一日未殺晒所有面具人，大家都會有危險。如果要去救人嘅話，盡怏殺晒所有面具人先係上策呀。」倪少賢轉過頭望住我，「如果唔係，到時有危險嘅唔單止係佟逸霖，重有啱啱個女仔，同埋你識嘅其他人。」
雖然倪少賢嘅態度好輕浮，但佢講嘅……又好似啱。
「你想點樣決定？漫無目的去搵人，定係盡快了結呢個遊戲？」倪少賢露出認真嘅表情。
「我想……」或者呢個人講嘅嘢係啱，「殺晒所有面具人。」
「OK！咁我哋先去搵武器。」
倪少賢離開化學室，我即刻跟上，喺我哋離開化學室時，倪少賢拎住滅火筒向住仍然焚燒嘅小丑同阿樂噴，然後將把電鋸拎起嚟。
突然，倪少賢好似觸電咁抽搐一下，然後即刻掟返低把電鋸。
「哈哈……」倪少賢額冒冷汗，「睇嚟挪亞先生唔打算俾我哋拎住把電鋸做殺人狂。」
竟、竟然，有拎起面具人武器嘅限制……
之後，我哋落咗一層，同樣地走廊空無一人，只有幾條屍體。
雖然倪少賢睇落毫無戒備，但彷彿有道氣牆……好似睇穿一切咁。
倪少賢行到烹飪室門前，將門打開。
忽然一抹黑影冒出，拎住一把刀向倪少賢插去！