從西鐵醒返之後……: 22
眼前冒起熊熊火光，我無法睇到係邊個將火柴掟下。
門口被火焰堵塞，我馬上停下腳步，但接踵而來嘅小丑追到嚟埋嚟，高舉電鋸準備劈下！
嘰嘰嘰嘰嘰嘰喀嘞喀嘞喀嘞喀嘞——
怪異嘅電鋸聲傳出，原來係古朗用佢僅餘嘅手臂舉起一張木凳擋住咗！
「阿逸，我嚟頂住，你走先！」古朗大聲咆哮。
我心裡猶豫咗一下，但係我已經無救到Ellie，我唔想再有人死喺我手中。
電鋸將木凳鋸開，將要鋸到古朗嘅一刻，我拎起另一張木凳，掟落小丑嘅臉上！
小丑俾木凳擊中，狼瘡後退數步後，非常戒備咁企喺原地，無再即刻攻擊。
除咗原本逃脫嘅門口，我哋跑入嚟嘅嗰對門口都冒起烈焰。而家我哋三個都被困於化學室，喺兩邊出口都俾火焰堵塞嘅情況下，等待我哋嘅結局就只有吸入過多濃煙而死。
「阿逸，我哋而家點……」古朗額上冒汗，氣若如絲，「係咪有方法可以打低佢？」
古朗到呢刻，依然信任住我嘅話，對打低小丑呢件事深信不疑。
我更加唔可以辜負古朗對我嘅期望！
「阿逸！你點呀？」門外傳來一把女聲，係愛兒。
雖然我唔知邊個背叛我，提早將火柴掟咗落門口，或者係我太天真，太輕易相信其他人。
但係，並唔代表我就要咁樣放棄。
「我無事，放心！我會完成任務。」然後我向古朗問，「古朗，你褲袋重有無磷粉？」
「有。」古朗單手將磷粉拎出，遞過嚟我手上。
我將磷粉接過，加埋我本身袋住嘅磷粉，然後灑落身後嘅玻璃櫃上。
「你見唔見到玻璃櫃上有堆化學品？」我向古朗講，但雙眼不忘盯著小丑，「我哋將小丑引過去，然後我再將火柴撻著，將啱啱灑喺地上嘅磷粉引爆……希望櫃入面嗰啲全部都係易燃物，通通爆炸將小丑炸死！」
「哈！真係夠crazy，話唔定連我哋都炸死埋添！」
「夠唔夠膽搏一舖？」我問。
「哈！嚟咪嚟，我咁嘅樣重有咩好驚！」
古朗拎起木凳，氣勢洶湧向小丑衝去，小丑馬上舉起電鋸，向古朗劈落去！
喀嘞喀嘞喀嘞喀嘞喀嘞——
電鋸卡住喺木凳上，我趁住呢個機會拎起另一張木凳，從旁接近小丑，但小丑將電鋸抆出嚟，轉身向我橫劈過去！
千均一發之際，我雙手舉起木凳擋住呢一刀！
心裡頓時冒出冷汗，木碎不停從木凳飛嚟我眼前，我無諗過用木凳擋住電鋸係咁吃力，更無法想像只有一臂嘅古朗係點樣做到！
就喺呢個時侯，古朗高舉木凳，啪一聲重擊小丑頭部！
小丑俾古朗打得步伐不穩，向我橫劈嘅電鋸亦脫咗力。我趁住呢個機會，向住小丑嘅後腦補多一擊，受到衝擊嘅小丑向前倒下，啱啱好就喺玻璃櫃前。
機會來了！
我撻著手中火柴，向玻璃櫃掟去！
「趴低！」
轟隆—！
玻璃櫃發生大爆炸，冒起劇烈火焰，但幸好爆炸威力唔大，無波及到我同古朗二人。
「咁樣……應該殺死喇掛！」趴喺地上嘅古朗忽然露出痛苦嘅表情，「啊……」
「你點樣？」我即刻問。
「無事……我哋快啲搵方法離開呢度！」
濃煙不停飄過來，而且夾帶著刺鼻嘅味道……可能係某啲化學品燃燒後產生嘅化學反應。
但係呢度所有窗都俾強力膠黏實，一時間打唔開窗口，而且即使成功打開窗通風，刺鼻嘅化學氣體，猛烈燃燒嘅火焰……我哋最終都逃唔出呢度！
「咳咳！聽講……人死咗之後，既唔會上天堂，亦唔會落地獄，而係會去一個叫樂園嘅地方。」呢個時侯，古朗忽然講出意義不明嘅話。
「你想講咩？」
「樂園係世上最美好嘅地方，嗰度無紛爭，無悲劇，大家都可以開開心心，無憂無慮咁生活……咳咳！」古朗狼瘡咳嗽一聲，「我一直都想喺咁樣嘅地方休息，永遠咁休息。」
我察覺到古朗嘅意圖，馬上講：「喂！唔好放棄，我哋重有出路……重有希望！」
「無錯，我哋重有希望，而呢個希望就要你繼承落去……只要希望存在，我哋就會得到勝利！」
「古朗——」我嘗試叫喚古朗，但佢馬上將我嘅話打斷。
「阿逸，去喇！一定唔可以死，要通過所有遊戲，然後還我哋一個公道！」古朗用盡力氣咁講，「同埋……小心Suki。」
呢刻嘅古朗已經連手撐地上嘅力都無，鮮血不停從斷口流出，但佢嘅表情並無死去，雙眼依然蘊含住希望……以及對我嘅寄望。
「我明白喇。」
我企起身，忍著刺鼻嘅濃煙，舉起木凳，一下一下打落窗口上。第一下打唔爆就打第二下，第二下都打唔爆就打多幾下，喺濃煙同烈焰交錯嘅環境，我忍著所有不適，奮力將呢道窗打破！
啪嘞—！破璃應聲粉碎，碎屑從高空掉下。
我從缺口爬出，外牆上有條筆直嘅水管，水管一路延伸到一樓，於是我小心翼翼咁爬到水管度，用盡四肢嘅力量擒住水管，忍住手掌皮膚被擦破嘅痛楚，慢慢向下滑落去。
終於，我從一樓位置跳落，到達校舍對出嘅籃球場上。
手心傳來灼熱嘅感覺，但係我已經唔在意。
古朗因為我嘅決定而被困於火場之中，但佢由始至終都信任我，甚至因此失去性命。
同樣地，中年女人同Ellie都係一樣，佢哋都係因為我嘅誤判，而遭受到連累。
究竟，我做緊啲乜？
又或者咁問，我其實想去做啲乜？
想去救助所有人，定係想去逞無腦嘅英雄主義，定係純粹滿足自己嘅熱血感？
呢一刻我已經搞唔清楚。
籃球場同埋對住嘅飯堂躺著幾條屍體，我由飯堂轉入走廊，行到同校務處方向另一個末端嘅樓梯，即係C樓梯。
我沿住樓梯上到一樓，如無記錯呢層係室內游泳池。
遊戲開始到而家，我仍然未涉足到呢度，所以我估呢度可能會好多人，畢竟仍然有一百二十四人生存，但啱啱我經過咁多地方都唔見——
所以呢度好可能會有其他人。
愛兒、駱譯、倪少賢佢哋應該暫時平安無事，但重有其他人，例如夏舞、莉莉、修洛文、家明等人依然下落不明。
佢哋可能仍然生存，又或者喺我唔知嘅情況下被殺，但無論如何我都想搵埋其他人出嚟。
我穿過無人嘅男更衣室，到達游泳池。
然後——
我終於遇見到佢。