從西鐵醒返之後……: 19
好耐之前曾經睇過一套電影，電影中嘅殺人魔戴著白色面具，手持各種武器去層殺平民。
聽完愛兒嘅形容，鬼嘅形象好自然同面具殺人魔嘅形象重疊起嚟。
而家我哋就喺墮入殺人魔嘅地盤中。
我同愛兒前往化學室。
選擇呢個地方嘅原因，係因為特別室通常都係雙門設計，另一方面……
我想確認呢間學校嘅真實程度。
我哋小心翼翼離開校務處，確保走廊安全之後，就由A樓梯行上去。
選擇由A樓梯上嘅原因係假如選擇中間嘅樓梯口就要同時兼顧兩邊走廊，而由兩端樓梯口行上去就只需兼顧一邊走廊。
我哋小心翼翼行上去，每到達一層我都會先睇下走廊情況，而愛兒就會觀察樓梯，確認安全先繼續上行。
沿途有幾條屍體瞓喺地上，佢哋全部都係中槍而死，幸好當中無我認識嘅人。
有驚無險，我哋上到五樓，到達化學室前。
我輕輕推開化學室嘅門，但突然有抹黑影從裡面躍出。
「你哋……！」
對方驚呆咁望住我，而我亦對眼前呢個人嘅出現感到驚訝。
「快啲入嚟！俾鬼睇到就大鑊！」
我哋遵從眼前人嘅指示，馬上進入化學室。
我輕力將門閂上後，向著眼前人講：
「估唔到竟然喺度撞到你……古朗。」
「我都估唔到……阿逸。」
啱啱出現我哋面前嘅正係古朗，除咗佢之外重有一個短髮嘅校服女，一個戴眼鏡嘅油頭毒撚，一個中年女人同一個著格仔恤衫嘅少年。唔知點解，格仔男好似有啲似曾相識。
「阿樂！」愛兒向住格仔男大叫一聲。
「喂！細聲啲！」短髮女手指放嘴巴，以壓抑嘅聲線向愛兒講。
「Sorry……」愛兒低下頭道歉，然後輕聲地向格仔男講：「阿樂你無事呀……堅哥同林仔呢？有無見到佢哋？」
我認得喇！佢就係上一場遊戲有份阻止我哋，最後俾莉莉爆丸一踢嘅嗰個男仔！
阿樂並無作聲，只係搖頭示意，同時我感覺到阿樂望住我嘅視線中帶有著膽怯。
「你哋係由邊度過嚟㗎？」古朗問。
「地下。」我乾脆回答。
古朗聽到之後好驚訝咁講：「你哋竟然可以安全咁由地下上嚟五樓，無遇到鬼咩？」
「我喺一樓嗰陣撞到，不過撇甩咗。」愛兒回答。
「唉……真係多得你哋唔少，萬一你哋嘅行蹤俾鬼發現，引咗入嚟點算……」短髮女雙手抱胸，十分不屑咁講。
「真係好對唔住，我哋無諗過呢個問題……」愛兒謝重咁向短髮女道歉。
「Suki，大家都係想躲避鬼嘅追捕，又唔係有心。」古朗出面調停，「況且呢個人，阿逸佢就係令我哋上個遊戲最後唔使自相殘殺嘅嗰個人。」
「喔……原來就係佢……」短髮女露出一臉輕挑嘅表情點頭，「咁又代表啲咩？唔通我要畀埋條命畀佢？」
「夠啦，Suki！」
「唔緊要，古朗。」我截停古朗，先將氣氛平復落嚟。
聽佢哋咁講，佢哋應該係上個遊戲同房嘅同伴。
呢個被稱為Suki嘅短髮女展示出極不友善嘅態度，但諗深一層，互不相識嘅陌生人出現衝突同猜忌係正常嘅事，我同家明以及傑少之間正係好好嘅例子。
「你哋呢？有無撞到鬼？」我問。
「無。」古朗搖頭，「不過我哋見到出面好多屍體。」
「嗰個男仔……佢喺度做緊乜？」愛兒指向油頭男，佢一直拎住部電話不停咁撳。
經愛兒一問，的確係感到奇怪，呢度應該收唔到網絡，咁油頭男拎部電話出嚟係撳咁啲乜？
「佢……」古朗苦苦一笑，「好似話要駭入呢度嘅網絡喎……」
「吓？」我愣然一聲。
「佢話如果成功嘅話，就可以向外界發送求救訊號，不過我望過去只係見到一堆亂碼。」
油頭男似乎聽到我哋嘅講話內容，然後插話：「嗱！呢啲就唔係亂碼，而係一堆加咗密嘅數據，唔識呢唔好亂講。我初步估計係用咗某種加密排列，睇嚟唔係簡單替換，而係多表加密，我而家推測緊佢哋之間嘅關連，相信不出半個鐘我就可以成功破解到。」
「喔，喔！事情大概就係咁。」一頭霧水嘅古朗點頭附和。
事實上，我同愛兒都唔知佢講緊乜，但佢又好似好有自信咁。
「係喇，啊……」愛兒欲言又止，尷尬咁望住我。
「我叫阿逸。」我講。
「阿逸，你特登上嚟呢個地方係想做咩？」愛兒問。
「萬一遇上鬼嘅話，赤手空拳嘅我哋係好難走得甩，所以我哋要搵一啲嘢去自保。」我拎起放喺其中一張檯上面嘅火柴盒，「譬如呢個。」
「喔！所以你就揀嚟化學室！」愛兒恍然大悟。
無錯，如果呢間學校係百分百仿照真實嘅校舍建設，咁化學室裡面一定火柴、酒精、化學品之類嘅嘢。
就算唔可以用嚟反擊，至少都可以傍身。
「我都有拎。」古朗拎起一盒火柴同一包粉，「呢包係磷粉，可以製造爆炸。」
其他人手中都有拎住啲嘢，只有油頭男一直雙手拎住部電話喺度唔知做乜。
雖然閂埋門之後睇唔清走廊狀況，但而家暫時聽唔到出面任何聲音，而且呢間房係雙門設計，即使鬼從其中一邊入嚟，我哋可以由另一邊逃走。
「你哋望下出邊。」愛兒指住窗外。
除咗油頭男外，我哋沿住愛兒指嘅方向望去，喺樓下籃球場位置，有幾個人打算爬欄逃走。
「規則已經講明唔可以逃走，嗰班人真係自尋死路。」
呢場遊戲同前兩場遊戲唔同，並唔係喺密封嘅室內空間進行，所以會有可以逃走嘅空隙出現。
不過事到如今，竟然重會有人打算逃走。
『請勿逃走，逃走者將會受到嚴懲！』
離我哋五層樓嘅籃球場傳來隱約嘅廣播聲，之後爬咗上欄嘅嗰幾個人忽然跌晒落地下，捏住自己條頸不停抽搐。
雖然睇唔到佢哋嘅表情，但大概已經知道發生咩事。
過咗無耐，佢哋就停止咗抽搐，而地上多咗幾灘鮮血。
「嗰班人真係蠢，遊戲玩到而家都重想逃走。」Suki嘲諷住嗰班人。
「Suki，佢哋人都死咗，對死者畀返少少尊重。」古朗不滿咁講。
「好好好，我收聲。」Suki敷衍咁講咗句，然後行返埋一邊。
之後，為咗可以觀測到走廊嘅舉動，同埋可以作出最快反應，我哋分開監視住兩對門，透過門上嘅一小塊破璃去觀察走廊狀況。
靜待咗十五分鐘，雖然有幾下慘叫聲同槍聲發出，但聲音並唔係來自附近，我哋暫時處於安全。
「其實……我哋要匿喺度匿幾耐，個面具人可能好快就搵到上嚟……」一直無出過聲嘅中年女人忽然講。
正當我想回答呢條問題時，卻發覺答唔出……
係喎……
我哋要匿到幾時，遊戲先會完結？
印象中挪亞只係講解咗鬼捉人嘅規則，但係無講過幾時會完結呢個遊戲……
「理論上，如果無時間限制，鬼捉人係唔會完結。」油頭男突然將電話放返入褲袋，「除非所有人俾鬼捉晒為止。」
「你唔係駭入呢度網絡咩？結果點？」愛兒一臉天真問。
「有啲難度，重未連上任何網絡，如果去電腦室整嘅話或者會有辦法。」油頭男講。
「呢條友真係傻傻地……又話半個鐘內就搞掂，而家重想去電腦室整，未去到已經俾人鋸死咗喇！」Suki輕聲咁講，而古朗今次似乎都默認Suki嘅話。
「你哋唔識嘢唔怪你哋，不過呢件事關乎到大家生死，所以大家而家要出發。」油頭男以命令口吻講。
「哈哈！你唔係認真嘛？」Suki忍唔住恥笑出聲。
「正一係雞……」油頭男以極微嘅聲量講出。
「吓？你講咩話，你唔係以為我聽唔到呀？」Suki聽完之後，表情變得十分不悅。
「Suki，安靜。」古朗向Suki勸道。
「等等先。」我將話題拉回正題，「既然鬼捉人係唔會完結，咁我哋要點樣先可以將呢個遊戲通關？」
問題道出後，氣氛沉默下來。
我哋以為鬼捉人完結就可以通關，但如果呢個遊戲唔會完結，咁要點樣先可以通關？
唔會完結嘅鬼捉人，係咪即係代表我哋要無止境俾啲鬼追殺到盡頭……？
「等等，我想問一條問題。」呢個時侯，愛兒露出疑惑嘅表情望向Suki，「你啱啱係咪話會俾鬼鋸死？」
唔知係咪因為俾油頭男激嬲，Suki顯得有啲唔耐煩：「拎住咁大把電鋸，唔係鋸死唔通射死咩！」
「……咩話，但我明明見到隻鬼只係拎住一把長刀同一把槍咋喎……？」愛兒皺起眉頭講。
「吓？」Suki愕視愛兒。
「你係咪叫愛、愛兒？」古朗向愛兒問，「你見到隻鬼係點嘅樣？」
「戴住笑哈哈面具，左手拎刀右手拎槍嘅空姐。」愛兒好肯定咁答。
「唔通……」古朗露出十分驚愕嘅表情。
望到古朗嘅反應，我都猜到係咩一回事。
如果係咁……我哋嘅情況都幾危險！
「你哋快啲行喇，我哋要盡快破解呢場遊戲去。」油頭男講完之後，自己一個行去門口。
「喂，等陣！」
正當我想叫停油頭男時，門外傳來「嘰嘰」嘅聲音……