從西鐵醒返之後……: 20
一個戴住笑哈哈面具，身穿小丑裝扮，拎住電鋸嘅人出現喺油頭男面前，佢每行一步，鞋底都會發出「啾啾」嘅聲音。
「快啲返嚟呀！」
古朗大叫一聲，但已經太遲，小丑舉起電鋸，一下將油頭男嘅咽喉割開。
鮮血從油頭男頸部噴出，油頭男甚至未意識到發生咩事，就倒在地上，死態一臉驚愕。
「走呀！」我大叫一聲。
小丑將目標轉移到我哋身上，而我哋即刻從另一道門逃走，沿住走廊一直奔跑。
電鋸同小丑鞋嘅聲音交替傳來，對方追趕喺我哋身後，而且跑速十分快！
「拎住把鋸都跑得咁快！」古朗一邊跑一邊講，「咁跑法沒完沒了！」
我哋就嚟跑到B樓梯，此時我提出一個建議：
「不如兵分兩路，我上你下，撇甩咗之後再返化學室集合！」
「無問題！」
「我都跟埋你！」愛兒向我講。
到達B樓梯，我同愛兒向上跑，而古朗同Suki就向下跑。奇怪嘅係，同為房伴嘅阿樂竟然無跟隨愛兒一齊向上跑，而係跟隨古朗，反而鮮有發言嘅中年女就跟咗喺我哋身後。
「隻恐怖小丑……跟咗上嚟！」我從轉角位望到小丑嘅影子。
我哋連續向上跑咗兩層，但小丑窮追不捨，而且我察覺到愛兒十分吃力，唔擅長向上跑樓梯。
「呢邊！」帶頭嘅我到達七樓時，轉彎奔出走廊。
只要成功跑到下個樓梯口，即係A樓梯，就應該可以趁機撇甩佢！
但係愛兒嘅腳速十分慢，咁落去未跑到下個樓梯口，愛兒就會俾小丑捉到！
「啊—！」
一把女聲尖叫聲從身後傳出，但聲音唔係由愛兒發出，因為我知道呢道聲音嘅主人——
係Ellie！
我回頭一望，發現唔見咗小丑嘅蹤影，同時……慘叫聲不斷從某間課室傳出！
「你做咩唔跑？」中年女停低問我。
「裡面……有我識嘅人！」我講。
「咁又點，你唔通諗住去救佢哋？」中年女不悅咁講，「你手無寸鐵，只會俾佢一下鋸死。」
中年女講嘅話正中紅心……雖然我已經見識過好多人死亡，甚至親手殺死過人，但面對一個拎住電鋸嘅殺人狂，依然會感到害怕，雙腳不斷顫抖，似訴說著快啲逃跑。
「你要知道你眼前有啲咩人要救先。」中年女視線瞧向愛兒。
愛兒跟埋我哋一齊停低，但佢神情恐懼，手腳顫抖，不自覺咁繼續前行。
如果Ellie佢哋俾小丑殺死，都係因為我嘅過錯而引起，但而家嘅我係無可能，亦唔可以停下腳步去送死。
我咬牙切齒，轉身離去。
我哋沿住A樓梯跑落去，由我跑最前，愛兒中間，中年女最後。我諗過應唔應該而家返化學室，但我諗佢哋未必咁快上返嚟，向下跑可能會更大機會遇到佢哋。
跑到落某層轉角位。
砰砰砰砰砰砰砰砰砰砰砰砰砰砰——
身後傳嚟連續嘅槍聲，處於轉角位嘅我同樓梯中段嘅愛兒望去，發現中年女愕然咁企喺樓梯前。
突然，中年女向前倒下，滾落樓梯。
「快跑！」意識到咩事嘅我即刻拉起愛兒嘅手，猛然咁向下跑。
啱啱嘅槍聲……唔通就係愛兒口中所講嘅空姐！
開咩玩笑……竟然可以無啦啦就有人死喺我眼前，嗰個中年女人……我甚至連佢嘅名都唔知。
簡直係淫樂殺人遊戲。
我哋跑到落地下，正當諗住沿住走廊跑去時，卻發現一個戴住笑哈哈面具，著住空姐服，左手拎住刀，右手持槍嘅女人企喺不遠處。
對方發現我哋，舉起槍對準我哋。
我即刻將愛兒撲低，避過呢一槍！
但係點解空姐會喺度出現……唔通啱啱樓上開槍嘅人唔係空姐，而係重有其他人！
我哋而家進退兩難，走廊有空姐來襲，而樓上亦有另一個持槍嘅神秘人物，就算想跑出去校舍都會經過空姐嘅視線，接近無路可逃！
唯一嘅退路，就係向下跑！
依我睇過學校平面圖嘅記憶，呢間學校係有一層地下層，只可以透過A樓梯通往……即係我哋身處呢條樓梯。
而家已經無得畀我揀，我拉住愛兒嘅手，繼續向下層跑去。
燈光隨著下去而變得昏暗，到達地下層，眼前只不過係一條空曠得嚟燈光比較昏暗嘅走廊。我哋繼續沿住半昏暗嘅走廊奔跑，直至盡頭位置。
呢度並唔存在任何樓梯，只有一部升降機，而屏幕上顯示升降機停留喺六樓。
「我哋點算……」愛兒憂懼咁望向我。
我撳下升降機掣，但此時後方傳來一陣腳步聲。
噠！噠！噠！噠！噠！噠！
我心感不妙，即刻拉開身旁房間嘅門——
砰—！砰—！
灼熱嘅感覺從後背傳來，子彈啱啱好擦過我身後，我同愛兒匿入房間之後，就即刻閂埋門。
眼前只係一間雜物房，有幾箱紙皮同垃圾，並無任何出口。
清脆嘅高踭鞋聲逐點逐點迫近，甕中之鼈嘅我哋只能等待著鬼嘅來臨……
唔通……我哋就咁樣玩完？
我摸一摸褲袋，拎出一盒火柴。如果我當時有拎到磷粉，或者就可以向對方進行反擊！
「愛兒，對唔住累咗你，如果我唔係做錯決定，你就唔使陪我一齊死。」我向愛兒道歉。
「阿逸……唔緊要，有時可能係天注定。」愛兒雙手握緊，聲音顫抖咁講。
呢個時侯，房內傳出第三道聲音：「喂喂，你哋……佟逸霖，係你？」
「你係……！」我驚訝咁望住眼前呢兩個人，以及佢哋手中嘅物品。
＊
喺半昏暗嘅走廊上，獵人正在追捕弱小嘅獵物。
喺動物界中，當動物遇上比自己更強大嘅敵人，佢哋嘅反應盡數不同。
有啲動物會聽天由命，由任宰殺；有啲動物會嘗試逃命，苟且偷安；有啲動物會極力反抗，搏上性命。
不過有一種生物，佢哋會將獵人同獵物嘅角色調轉，將原本狩獵自己嘅獵人狩獵返轉頭。
他們被統稱為人類。
人類係脆弱嘅動物，遇上強大嘅動物並無任何反抗之力。
以生物學來講，人類無其他動物嘅力量，亦無其他動物嘅速度，點解仍然能夠企喺食物鏈嘅頂端？
因為佢哋擁有智慧，能夠將獵人同獵物呢兩個角色調返轉，呢個就係人類優勝嘅地方。
戴著笑哈哈面具的空姐右手拎長刀，左手拎槍，慢慢咁沿住走廊前進，就嚟到達走廊盡頭嘅最後一間房，將匿咗入去嘅兩隻小動物終結。
噠！噠！噠！噠！噠！
殺人魔故意加強腳步，等嗰兩個人可以聽到逐漸變近嘅腳步聲，盡可能將最大的恐懼傳遞畀佢哋。
有啲獵人會俾獵物爽快咁死去；有啲獵人會慢慢咁折磨獵物。
而呢個殺人麝喺獵人當中亦算係最惡劣嘅一群，因為佢樂於玩弄對方嘅心，將恐懼帶畀對方，喺殺害對方前先將對方嘅心折磨一番。
死亡係大部人恐懼嘅事情，而會將人類對死亡嘅感情擴大嘅人，可以話係心理變態。
空姐終於到達門前，佢將手槍放回腰間，只係手握長刀，然後準備扭動門柄。
佢期待嘅畫面，係兩個驚到全身發震，但又無路可退，只能哭著求饒嘅一男一女。佢甚至將手槍收起，諗住用最殘忍嘅方法去虐殺佢哋。
空姐扭動門柄，然後慢慢拉開大門——
忽然有堆紙皮從房內飛出，空姐反應唔切，俾紙皮一下子撞落地上！
驚愕嘅空姐甚至未知發生咩事，就有一陣液體倒落佢身上。
好苦……好臭……係咩嚟？
空姐即刻從腰間拎出手槍，準備應戰。
但係呢個時侯，一道火光映入佢眼前。
「啊啊啊啊啊啊啊！」空姐忽然全身冒起熊熊大火，以沙啞嘅聲音慘叫。
「原來佢識嗌㗎，真係意識不到。」
叮噹—！
眼前升降機門打開。
「快走！」
四抹身影從房間躍出，而空姐縱使俾烈焰燃燒，佢仍然想去執行自己嘅指令，將手槍舉起瞄準佢哋。
只要……可以殺晒，就可以……回……到……
空姐嘅手，最終無力咁緩緩垂下，然後倒在地上。
佢萬萬都想唔到，原本應該係作為殺人角色嘅佢，最終竟然會俾人殺死。
獵人同獵物嘅角色一度調轉，人類憑著武器將敵人壓制。
但係最後都係回復原狀，獵人以壓倒性實力捕殺獵物。
空姐嘅身體連同紙皮一齊俾烈焰劇烈燃燒，縱使如此亦無法望到笑哈哈嘅面具下係一副點樣嘅表情。
或者，眼前呢個面具人根本唔識思考，面具底下只係一個空殼。
一個鐘嘅時間已經過去。
鬼捉人，剩餘三人。