從西鐵醒返之後……: 18【3/F 百鬼夜行】
我緩緩張開雙眼，而家嘅我瞓喺床上。
如無記錯，呢度應該係睡房。
「阿逸。」
一道女性嘅聲音傳過嚟，我轉頭一望，瞓喺另一張床嘅人並唔係駱譯，而係夏舞！
「點解……我會喺呢度？」
「阿逸你喺大堂度暈低咗，所以我哋將你抬返上嚟。」
「但係，點解你會喺我隔籬……呢間房係我間房嚟？」
「呢間、呢間……」夏舞變得不知所措，「係我同莉莉嘅房嚟，係莉莉話廢時將你搬上搬落，所以就搬咗你入嚟。」
「喔……」我記返起暈低之前發生嘅事。
喺最終指令，我錯手殺死咗曾經嘅班主任李sir，之後我為咗向其他人傳達「希望」，付上「代價」去換取廣播權利。
跟住，我就暈低咗。
「我暈咗之後有無再發生咩事？」我問。
「昏迷嘅所有人都醒返，之後就無再有任何新嘅指令，不過基於安全起見，家明、修洛文同William繼續留守大廳，直到清晨為止。
「喺我暈咗之後竟然發生咗咁多事。」我摸一摸條頸，有塊膠布黏住，「係你幫我止血同黏膠布？」
「嗯，雖然係皮外傷，但頸部嘅血管好脆弱，一定要好好處理。」
「啊！係喇，你身體點？有無好返啲？」我將手放落夏舞嘅額頭，發覺已經無再好似之前咁㷫。
「已經退咗燒喇，應該只係普通感冒……啊！件外套……」夏舞將我冚喺佢身亢嘅外套還畀我。
「唔使喇，你著住件外套先。」我指住夏舞身上俾駱譯弄到血跡斑斑嘅校服。
「喔……喔，多謝阿逸。」
呢個遊戲，要多得夏舞、駱譯、修洛文同阿曉佢哋，加埋古朗出手相助，先可以成功破解囚徒困境，度過最終指令。
夏舞比其他人先醒過嚟，我諗當中並無咩特別原因，唯一解釋係大家早就體力透支，回復意識之後依然處於沉睡狀態，只有休息已久，精力飽滿嘅夏舞俾我嘅舉動嘈醒。
我同夏舞離開睡房，去廚房搵啲嘢食填飽個肚。大廳空無一人，家明同修洛文佢哋應該已經返咗房。
而家已經朝早十點，但係窗外景色依舊漆黑一片，並無太陽，十分詭異。
閣樓傳嚟一陣腳步聲，駱譯同莉莉從閣樓行落嚟。
落到嚟之後，駱譯第一句就問我：「逸哥，你重有無事？」
「無嘢，唔使擔心。」
「咁、咁夏舞呢？重有無發燒？」
「我都無事喇，已經退左燒。」夏舞臉上展現出精神嘅笑容。
之後，其他人陸續出到嚟大廳，從廚房拎咗啲糧食充飢後，就靜坐於大廳。
一片寂靜。
雖然我哋最後全員平安無事度過第二場遊戲，但我知道每個人都各懷鬼胎。
家明、傑少、William……即使係喺呢場遊戲有好大功勞嘅阿曉，我都睇唔透佢份人係點。聽講，李sir嘅老婆最後都係失救而死，不過……臨死前阿曉同佢之間好似發生咗啲事。
「大家，覺唔覺好似愈嚟愈焗咁……」駱譯解開校服頸喉鈕。
「我都覺……係咪無開冷氣？」莉莉用手掌撥風。
「已經開到最大，一係我去打一打開對窗先。」William行去打開窗，「咦！點解會打唔開！」
「……咩話？」我即刻去幫手，但所有窗都被緊緊鎖死，連絲毫都無法推開。
「啊……好暈……」Ellie嘅表情好似有啲唔妥。
「阿妹……」William說話未完，忽然倒在地上。
「唔通……」
我諗住衝過去將門打開，但雙腳忽然變得軟弱無力，直接倒在地上。
無錯！一定係……一定係……
我甚至連回頭大叫嘅力氣都無，就咁慢慢失去咗意識。
仆街……
喺短短幾個鐘之內，我第二次失去意識。
＊
白光刺進雙眼，我緩緩打開雙眼。
「呢度係……」我望向四周，卻發現身邊空無一人。
喺我眼前只有一棟學校，不過唔係我平時返開嘅大學校舍，而係一間中學。
「夏舞！駱譯！莉莉！」我周圍大叫幾聲，但無任何人回應。
令我更詫異嘅係，天空再唔係漆黑一片，太陽高高掛在天空之上。
『歡迎大家嚟到第三層遊戲，相信大家已經有充足嘅休息，咁事不疑遲我哋即將開始第三層遊戲。』
校舍內傳出廣播，果然第三場遊戲即將開始。
『第三層遊戲叫——百鬼夜行，相信大家應該玩過「鬼捉人」，遊戲嘅玩法就同鬼捉人同出一徹，我唔多解釋喇！一旦鬼捉晒所有人，就係鬼方嘅勝利，就係咁簡單。而家所有人都被隨機傳送到學校某個角落，好好咁享受呢個遊戲啦！順帶一提，千祈唔好諗住逃離呢間學校，否則就後果自負……嘻嘻嘻！』
挪亞簡潔咁講解完規則後，廣播就消失。
聽完講解之後，有幾件事已經清楚知道——
我哋係人，鬼存在學校某個角落，以及我哋要逃離鬼嘅追捕。
雖然挪亞無講到俾鬼捉到會有咩下場，但相信都不言而喻。
我身處嘅位置相當易辨認，前方就係校舍，後方就係大閘，毫無疑問就係學校嘅入口。
所有人都被傳送到呢度，即係話除咗我哋房，以及9字尾房號嘅古朗同愛兒等人，我哋重會遇到酒店內嘅其他人。
大家唔知被傳送咗去邊，駱譯、莉莉、修洛文，重有……夏舞！
今次嘅遊戲再唔可以團體行動，只能由自己去保管自己嘅性命……又或者一邊逃避鬼嘅追捕，一邊將其他人搵出嚟，再作打算。
反正鬼捉人嘅要點，就係要不斷移動藏匿點。死守喺一個地方，最終都會俾鬼發現。
我獨自一人徑直進入校舍，進入門口後就係接待處，左邊係樓梯，右邊係走廊。走廊比想像中要長同闊，睇嚟呢棟校舍都相當大，至少比起我以前讀嘅屋邨中學大成倍。
我沿住樓梯慢慢向上行。
當我上到一半，處於轉角位時，微弱嘅腳步聲從上方傳出，話唔定有其他人喺上面。
砰—！砰—！
幾下槍聲忽然響起！
係……槍聲？點解會有槍聲？
「救命啊！」
「跑啲走啊！殺人啊！」
求救聲四方八面響起。
正當我愣站原地，不知所措時，一抹身穿衛衣嘅身影出現喺我面前。
「你係……愛兒？」我記得佢係1609嘅衛衣少女。
「你係1809……」愛兒見到我愣了愣，然後向我跑過嚟，「快啲跑！」
砰—！砰—！砰—！砰—！砰—！砰—！
槍聲接二連三響起，我同愛兒即刻跑落地下，向住走廊奔跑。
「繼續向前跑會俾鬼射中！」愛兒拖住我隻手，「呢邊！」
愛兒將我拉入右面嘅一間房，係一間好多辦公檯嘅房，應該係校務處。
我哋入咗去角落嘅一間小房間，將門閂上後，再匿入鐵櫃裡面。
鐵櫃十分狹窄，而且只有我膊頭咁高，我哋身體互相貼住，臉頰只有幾厘之距，先可以勉強兩個人同時迫入鐵櫃中。
愛兒手指放喺我嘴巴上，示意我屏息。
砰—！砰—！砰—！砰—！
幾下槍聲再次響起，外面傳嚟微弱嘅腳步聲，只有一雙腳步……
莫非係鬼？
噠噠噠噠噠噠——
腳步聲漸漸往我哋走近……
咯——
出面房門俾人打開咗！
我望向愛兒，佢用力咬唇屏息，將呼吸聲調節到悄無聲息。
呼——呼——
出邊嘅人喺房內來回徘徊，我哋一直維持絲毫不動嘅狀態，直到腳步聲完全消失為止。
愛兒打開鐵櫃門，馬上大啖大啖唞氣。
我從鐵櫃內走出嚟，然後問：「啱啱發生咩事？點解會有槍聲？」
「係一個左手拎住武士刀，右手拎住手槍，戴住一個笑哈哈面具嘅空姐。我喺一樓某間房醒返，一行出走廊就遇到佢同一大班逃命嘅人，於是我就即刻逃跑。」
「左手拎刀，右手持槍……？」聽到事實嘅我十分驚呆。
原來——
鬼捉人中「捉人」嘅意思，係指嘅係「殺死」咁解……！
「啱啱如果跑慢一步，就會俾佢殺死呀……！」愛兒心有餘悸咁講。
我原以為只係普通嘅鬼捉人……果然，事情無咁簡單！
呢場遊戲，挪亞唔再拘泥於複雜嘅遊戲規則，而係進行簡單嘅屠殺！
「留喺度遲早會俾佢發現，到時真係會無路可走！」愛兒整頓一下姿容，「同埋，我想去搵堅哥同林仔佢哋。」
我認得堅哥呢個名，即係壯漢……林仔，都係佢嘅同伴？
雖然眼前呢個女仔係襲擊我哋房嘅人嘅同伴，但直覺話畀我知佢唔係壞人。
即使見識過死亡嘅威脅後，仍然選擇冒住風險去尋找其他人，而唔係將自己性命擺喺第一位。
或者，愛兒同壯漢等人並不同。
而且，愛兒呢一番話，令我明白到我想做嘅事。
「我都諗住去搵我啲同伴。」我同愛兒講。
「啊！我啱啱好似喺出面張檯見到學校嘅平面圖！」愛兒靈機一觸。
「邊度？」
我同愛兒離開呢間狹小嘅房間，行到其中一張辦公檯前，檯上黏咗一張樓層平面圖。
我細心閱覽呢張平面圖。
（以下為平面圖，僅供參考）
呢間學校十分大，連游泳池同體育館都一應俱全，不愧係用嚟玩大逃殺嘅場地。
而家我哋身處校務處，而學校總共有三條樓梯，分別係我哋啱啱跑落嚟嘅A樓梯，走廊中間嘅B樓梯，同埋走廊另一端嘅C樓梯。
「我哋應該去邊好？」愛兒問。
既然對方係有刀有槍，空曠嘅地方就可能避免，因為太過一目了然。
廁所，同埋B1層嘅倉庫同校工房都要避免，雖然呢啲地方係絕佳嘅隱匿位置，但一旦被發現就無處可逃。
課室嘅話就要視乎間隔，假如唔係雙門設計嘅話入咗去就無路走，而且通常課室走廊方向都會有窗，有無人一眼就睇得出，太過暴露。
「我諗到一個地方。」
「係咩？」愛兒疑惑咁問。
我哋要去嘅係既容易逃走，亦有隱蔽匿藏點，而且有特殊用途嘅地方。
「……化學室！」