從西鐵醒返之後……: 14

我認得其中一個倒地嘅人，係先前見過嘅帽子男！

除咗倒地嘅兩個人，我重見到壯漢同另一個身穿衛衣嘅女仔。

壯漢見到我哋，兇神惡煞咁企返起身，打算行過嚟。

「堅哥！停手！」此時另一個女仔卻叫停壯漢。

「點解啊？愛兒？」壯漢好驚愕咁望向衛衣女。





「係我哋呢邊出手先，我哋唔可以再錯落去！」被稱為愛兒嘅衛衣女扶起昏迷嘅帽子男，「我哋快啲搬走林仔佢哋。」

「……切！」

壯漢好不甘咁嘖咗一聲，然後返轉頭，搬起另一個人之後，就急急腳離開咗呢度。

「佢哋係……咩一回事？」駱譯不解咁問。

「我都唔知……但既然危機解決，我哋就快啲達成指令。」我講。





由於不知名嘅原因，對方放棄咗襲擊，而我哋平安無事咁完成咗指令。

『1009、1209、1409、1609、1809房間達成指令。所有房間達成命令，根據出局條件，1209將隨機挑選一名玩家作為懲罰。』

呢個回合平安無事度過，不過代價係半數房間嘅人失去意識……

失去意識嘅人，後果會點樣……

夏舞，佢幾時先會醒返？





「你哋睇下……電視重未熄！」駱譯愣然指住電視。

電視屏幕唔單止無關上，而且重顯示另一段文字——

『Hello！又係我呀！我知道大家都等得好苦，所以就話過好消息畀大家。下個回合將會係最終指令，不過啊……喺最終回合開始前，當然要玩多次小遊戲先喇！』

挪亞嘅聲音突然傳出。





『今次唔講咁多，挑戰內容同樣會喺接受挑戰後先顯示，唔接受挑戰唔會有任何懲罰，你哋有五分鐘時間考慮，接受嘅話就撳落藍色掣上，唔接受嘅話就撳落紅色掣上。』

竟然……係第二次特別挑戰，而且下個回合係最終指令！

『經過啱啱嗰次教訓，你哋應該知道應該點樣選擇……哈哈！接唔接受，後果自負！哈哈哈哈哈哈哈……』

挪亞嘅聲音消失後，駱譯慌亂咁講：「我、我哋……」

「接受喇！」我即刻下決定。

「接、接受？」駱譯驚訝咁問。

「既然輸咗係無任何代價，當然要接受！」我講出原因，「記唔記得上次特別挑戰嘅獎勵，係下個指令嘅獎勵……今個回合嘅獎勵係最終回合嘅指令，如果提早知道嘅話，可能會影響之後嘅命運。」

「我贊成。」修洛文簡短吐出一句。





「我都唔反對。」阿曉平淡咁講。

「吓、吓？」傑少依然未知發生緊咩事，「咁、咁……」

「一於就咁決定。」我拎起搖控，撳下「YES」。

下個回合就係最終指令，過咗最終指令就可以解放……

而且只要挑戰成功，我哋就可以提早知道最終指令嘅內容。

『已接受挑戰。』

一道機械式聲音隨即傳出，電視屏幕變得一片漆黑，剩下一個倒數計時。





『拍賣遊戲正式開始，現在有一件貨品「最終指令內容」，屏幕上會顯示建議的標價內容，你們可以選擇是否接受標價，總共會有三次的投標機會。一旦接受標價，而你們必須按照標價內容付上相應代價。作出投標後要在五分鐘內付上代價，若然未能付上代價，將會懲罰房間內全部人。』

呢個挑戰果然係有詐，講就話挑戰失敗唔會有懲罰，但結果都係會有懲罰嘅情況出現……而且係懲罰全部人！

突然，身體感到軟弱無力，失去感覺！

咩事……！我重未反應得切，就跌咗落梳化上。

「哇！你哋做咩瞓低晒！係、係我被揀中？」

「做乜撚嘢，咩又標價又交易，完全聽唔明噏乜鳩！」

嘴巴無法動彈，但視覺同聽覺依然存在，所以我知道被揀選為挑戰者兩人係邊個——

係駱譯同傑少！





『挑戰即將開始，若接受標價請按藍色按鈕，不接受標價請按紅色按鈕。』

我、修洛文同阿曉三人都癱軟咁瞓咗喺梳化上，莫講話一根指頭，連一粒聲都出唔到。

雖然唔知咩原理，我估多數同體內嘅納米機械有關。

「逸、逸哥，我應該點做？」

駱譯慌亂咁望住我，只不過你咁樣望住我都無用，我就連用眼神回應你都做唔到。

而家，就只能寄託喺你同傑少身上。

屏幕上倒數計時開始，而且浮現咗幾行白色文字——

咩話……竟然係要揀一個人嚟懲罰！

或者我哋做錯選擇，呢個挑戰……根本就有問題！

「將一個人寫落白紙上，好簡單啫！求祈寫一個昏迷緊嘅人落紙度咪得。」傑少講。

「但、但係俾人寫個個會受到懲罰！」駱譯講。

「咁又點？死嗰個又唔係我哋，反正佢哋都唔知醒唔醒得返！」

「如果佢哋係醒得返……我哋咁做就會變做殺人兇手！」

「屌！你咁撚多事做乜？」傑少唔耐煩咁大鬧，「呢個遊戲唔係你死就我亡㗎喇！又唔係自己死，咁多事做乜？」

「要、要為咗最終指令嘅而殺人嘅話……不如唔好要呢個獎勵！」

「……挑！你真係弱智！」

傑少懊惱咁撳住額頭，忽然靈機一觸。

「啊……既然你咁想幫人，不如就寫你個名落去好無？唔寫其他人，寫你個名落去，其他人又唔使死，又可以幫大家拎到最終指令內容，一舉兩得！」

傑少個人渣……竟然咁樣慫恿駱譯！

如果可以郁嘅話，我一定要捉住傑少暴打一頓！

駱譯……千祈唔好聽傑少咁做！

『標價已被拒絕，將會再次更新。』

「……咩話？」聽到廣播嘅傑少好驚訝咁望住屏幕。

「今次唔接受，都重有兩次機會……」駱譯支支吾吾咁講，「我哋唔應該為咗個唔知有無用嘅獎勵殺人……」

原來，喺啱啱爭吵過程中，駱譯偷偷地撳下紅色掣，拒絕咗呢次標價。

「你個戇鳩仔！你係咪玩嘢呀而家！」傑少好氣忿咁衝過去駱譯度，打算搶走搖控！

此時，新嘅標價已經顯示於屏幕上——

失去意識嘅人永遠不能甦醒，即係夏舞、莉莉、家明佢哋……會死咁解？

而且，呢次嘅標價多咗個額外獎勵，重係指名要駱譯作決定？

傑少見到標價後停低手，一臉驚呆咁指住電視屏幕。

「吓？點解、點解只有你一個可以豁免第三場遊戲？」傑少忿然咁望向駱譯，「我知喇！原來你話更好嘅標價就係咁，所以啱啱先唔俾我接受標價！你老味……我先唔會俾你接受！」

傑少一嘢從駱譯手中搶走搖控，然後撳下紅色掣。

嘟——嘟——

「哇！屌，又做乜撚！」傑少俾警報聲嚇到即刻將搖控扔走，一個屁股坐落梳化上。

『注意，此標價只能由駱梓譯作出決定！』

「……咩話？」傑少驚呆咁望住電視。

屏幕上「請選擇是否接受標價」前面，的確有指名駱譯……

照咁講，即係只有被指名嘅駱譯，先可以對呢次標價作出決定。

傑少咬牙切齒不忿咁講：「……挑！咁樣陰鳩我哋，你開心喇，得償所願啦！」

駱譯從地下將搖控執起，雙手顫抖握緊搖控，然而眼神並無聚焦喺電視上。

「我……的確好驚，由一開始直到而家都係……我、我，無逸哥、家明、修洛文先生佢哋咁冷靜，咁堅強，我真係好驚自己下個回合就會死……」

「咁驚死咪撳掣囉，反正你講到話唔想人死，其實自己最驚死啫！」一旁嘅傑少挪揄道。

「我從細個開始就係咁懦弱，永遠淨係識逃避，唔敢去面對……但係，我好憎咁樣嘅自己，我想去改變，改變成大家可以對眼另眼相看嘅人！」

駱譯撳下搖控上嘅紅色掣。

「我唔會為咗自己，而犧牲其他人！」

『標價已被拒絕，將會再次更新。』

駱譯……！

你的確係個勇敢嘅人……！

駱譯放棄咗自己平安嘅機會，換取大家嘅安全。

「哈哈！正一傻仔，咁好嘅機會都唔要，講兩句就縮晒沙！」傑少大聲嘲笑道。

望住傑少醜陋嘅面容，我嘅憤怒已經到極點！

如果可以嘅話，我第一時間一定要打鑊傑少！

屏幕上嘅標價再次更新，我哋已經拒絕咗兩次嘅標價……換言之，下一次標價係最後一次標價！

我哋可唔可以得到最終回合嘅指令，就要睇下一次標價嘅內容。

然而，屏幕上嘅標價⋯⋯

簡直係至今為止最惡劣嘅狀況——

「從呢場篩選中解放，唔通……」傑少望見標價內容後，打從心底笑咗出嚟，「哈哈……哈哈！真係天助我也！哈哈哈！」

絕對……絕對唔可以俾傑少接受呢個標價！

但係，呢次標價係指名要傑少作決定，無法郁動嘅我無任何辦法去阻止傑少接受呢次標價！

正當傑少打算接受標價時，駱譯卻搶先一步將搖控搶走！

「我、我唔會俾你接受呢次標價！」

「你老味！畀個搖控我！」

傑少打算將搖控搶返過嚟，同駱譯發生激烈爭執！

駱譯一時甩手，跌咗個搖控落地下！

「同我死開！」傑少一嘢將駱譯撞開，然後衝過去執起搖控。

如果傑少撳下藍色掣接受嘅話，我哋全部人都會玩完……傑少成功付上代價，我哋全部人就會受到懲罰，但就算駱譯成功阻止傑少殺人……

我哋都會因為投標後無法付上代價，而全體受到懲罰！

無任何辦法可以阻止傑少接受呢次標價……



唔通……我哋要命喪於此？