從西鐵醒返之後……: 15

當傑少打算執起搖控時，駱譯嘅叫聲從身後傳來。

「停手！」

「你……把鎅刀幾時喺你手？你想做啲咩？」

雖然無法動陣嘅我望唔到身後嘅情況，但呢刻傑少竟然停下手，露出遲疑嘅視線望向我身後。

「你記唔記得規則講過，如果投標之後無法付上代價，所有人都會受到懲罰。」駱譯嘅聲音從後方傳出。





「咁又點？我而家殺咗佢哋就得，況且佢哋失去意識，郁都郁唔到。」傑少講。

「標價係要你親手殺死三個女性，呢度得三個女仔，如果你、你唔可以親手殺晒三個，咁你完成唔到代價！」

我知道喇……我身後，係夏舞同莉莉嘅房！

傑少聽完駱譯嘅話，反而鬆一口氣，大笑咗出嚟。

「哈！我以為你想講咩……唔通你想講我唔停手，你就郁手殺死佢哋呀？」傑少自信滿滿咁講，「你夠膽咩，柒頭！你連寫個名嘅膽都無，我唔信你夠膽將把鎅刀插落去！」





「反正……反正都要死，點、點都要拉埋你陪葬！」駱譯顫抖嘅聲音傳來。

「我就唔信你真係夠膽郁手——」

「啊啊啊啊！」駱譯忽然大叫一聲！

我睇唔到身後發生咩事，但傑少嘅眼神由自信轉變為驚訝同恐懼。

「你、你黐線㗎！嗰頭話唔可以殺人，呢頭……」傑少口都震埋，「呢頭真係插落去個學生妹身上！」





咩話……學生妹！唔通……係指夏舞！

究竟發生咩事，駱譯對夏舞做咗啲乜！

「同我撳拒絕，如果唔係……如果唔係就一齊死！」

「你、你停手，你真係癲㗎……你咁做，我都、都可以去殺其他房嘅人！」傑少雖然咁講，但明顯係虛張聲勢。

「你覺得其他房嘅人會開門畀你咩？如果你咁有自信，咁我、我就插落去！」

「等……等等！屌，唔接受咪唔接受囉！」

傑少咬牙切齒，舉起搖控撳下紅色掣。

『標價已被拒絕，挑戰完結。』





廣播播出之後，身體頓時回復力氣同知覺，可以再次郁動！

我二話不說，就轉身衝入去夏舞間房，映入眼前嘅係雙手血跡斑斑，拎住一支滴緊血嘅鎅刀，神情呆滯嘅駱譯。

「逸、逸哥，你唔會怪我㗎？我、我都係迫於無奈咁做……」

駱譯身旁，係瞓喺床上，冚喺身上嘅棉被被拉開，身上校服染滿血跡嘅夏舞。

「你對夏舞做咗啲咩嚟？」我即刻抱起夏舞，然後——

夏舞身上完整無缺，並無任何傷口。

「呢啲血……」我望向駱譯，發現佢另一隻手不停流血，手掌上有幾個傷口……





唔通……駱譯為咗假扮要殺死夏舞，用鎅刀插傷自己隻手！

為咗唔被傑少發覺，所以將血跡濺落夏舞身上！

「咩話？你條撚樣……」行入房間嘅傑少發現真相，「你條撚樣竟然係扮殺人，fake我去拒絕呢次標價！屌你老味！」

傑少氣急敗壞咁向駱譯衝過去，我即刻擋喺傑少身前。

「停手！」修洛文從後將傑少一嘢摔落地上。

「啊啊啊！」傑少奮力咁掙扎，「屌你老母，明明我可以從呢場篩選解放，差少少㗎咋……點解，點解！駱梓譯，我屌你老母呀！」

「你仆街啦你！」我一拳打落傑少嘅臉上。

「阿逸，冷靜落嚟先。」出手叫停我嘅人係阿曉，「而家打佢都於事無補，你望一望出面先。」





處於憤怒狀態嘅我無法平息落嚟，但係，廣播原來未完結——

『挑戰成功，現將發放獎勵——最終回合的指令內容將會顯示於電視屏幕上。』

發放獎勵？但係……但係我哋三次標價都無接受到……

唔通……唔通從一開始，我哋根本唔需要透過投標去得到最終回合嘅指令！

只要完成三個回合標價並作出決定，不論有無投到標，都會視為挑戰成功而發放獎勵！

所謂嘅投標換取貨品，只係一場陷阱！

黑色嘅屏幕上顯示幾行文字，最終指令內容就喺我哋眼前。





然而——

你老母……你係咪同我哋開緊玩笑！

最終指令，竟然係指名一個人受到懲罰！

雖然啱啱嘅特別挑戰中亦有相同嘅內容，但假如我哋唔完成眼前嘅指令，就會有一個人受到隨機懲罰，但如果要達成指令，就要親手揀一個人受到懲罰！

換言之，無論我哋完唔完成指令，都會有人要死！

「只要選擇合作，才會擁有出路……？」阿曉皺起眉頭。

「我哋只有互相合作，先可以解決到眼前嘅指令。」駱譯講。

「合作？」阿曉不解咁問。

駱譯繼續講：「唔係我哋之間嘅合作，而係房間之間嘅合作。只要所有房間都唔去達成指令，就唔會有任何人受到懲罰……呢個情況已經出現過一次！」

「係血液嗰一個回合。」修河文講。

當時我哋同古朗佢哋都嘗試去達成指令，但唔知點解最後無房間達成指令，但正因係咁，所以無房間出局，無人受到懲罰。

「黐線㗎！萬一其他房嘅人達成命令，我哋會受到隨機懲罰呀！」被壓在地上嘅傑少大叫，「既然係咁，不如喺昏迷嗰幾個人揀一個人寫落紙度咪得囉！」

「收聲。」修洛文加強力度，壓得傑少痛苦大叫。

老實講，我唔反對寫傑少嘅名落去，但一旦達成指令，就會牽連到其他房嘅人要受到懲罰。

「咁我哋點做？」阿曉平淡咁講，「老實講，我唔反對寫名落去，如果隨機懲罰同指名懲罰揀一個，我會揀後者，至少保證自己百分百安全。」

「只要我哋要去說服到其他人唔去達成指令，咁就唔會有人受到懲罰！」駱譯講。

「說服……有可能做得到？只要有人背叛，自己就要負上死亡風險。」阿曉冷冷咁講。

「但、但係……」駱譯一時口窒起嚟。

「唔試過，點知得唔得？」我講，「與其話得唔得，不如咁講……點解我哋一定要咁樣互相競爭，互相陷害？既然由一開始規則就講明只要大家都唔達成指令，就唔會有人受到懲罰，點解我哋重要咁愚蠢自相殘殺……挪亞想見到嘅，就係我哋做埋啲咁愚蠢嘅行為！」

我漸漸理解呢個遊戲嘅本質。

如果挪亞想單純睇我哋自相殘殺，點解要故意加一條咁突兀嘅規則？

挪亞想睇嘅，係明明眼前有條最簡單嘅出路，但我哋因為自私、恐懼、驚慌，而選擇另一條血腥嘅道路，然後盡情咁嘲笑我哋。

呢個遊戲嘅本質唔係在於做唔做到，而係當面對一件難以完成嘅事，我哋願唔願意放下個人利益，嘗試同其他人合作完成呢件事。

「既然挪亞咁樣公然挑戰我哋，我哋絕對唔可以屈服佢腳下！」我堅決咁望住阿曉。

咯——咯——

大廳大門傳來門柄扭動嘅聲音。

……係邊個？

對方打唔開我哋對門，但不斷咁扭動門柄。

我猶豫咗陣，最後決定行去將大門大開，而映入眼前嘅人竟然係古朗！

「古朗？」我大吃一驚。

眼前除咗古朗之外，重有另一個著住中學運動衫嘅男仔，睇落比駱譯更細。

「阿逸……你哋都完成咗啱啱嘅特別挑戰？」古朗注視大廳內嘅電視機。

「唔通你哋都……？」

「係，所以我先上嚟搵你，我唔諗住再去完成嗰啲狗屎命令！」古朗表情十分忿氣，「要直接揀人去懲罰，簡直係有病！」

估唔到喺我哋行動之前，就先搵到相同諗法嘅其他人。

「我哋都係同一諗法，只要所有房間合作，大家就可以平安無事度過最後指令。」

駱譯同阿曉行咗過嚟，同古朗照個面，確認係同伴之後，我繼續講：

「我哋而家要搵埋其餘三間房嘅人，不過……」

我擔心嘅係另外三間房當中，有人會不惜殺咗自己同伴保命，並且阻止其他房達成指令去避免隨機懲罰嘅人。

「得兩間房。」古朗講，「我上嚟呢度之前，去過1209房。去到之後發現門無閂上，一入去就發現裡面六個人全部死晒，入面有兩個人係他殺，四個人係受懲罰而死。」

「唔通……！」

「應該係。」古朗點頭，「而且阻止我哋達成命令嘅人，全部來自1209。」

1209嘅人可能都接受咗特別挑戰，而且有人接受咗第三次標價嘅內容，並且獲得解放，而同房嘅其他人就全員受懲罰而死！

「我哋要快手啦，要喺最終指令開始前說服另外兩間房。」古朗身旁嘅運動男講。

「無錯，事不疑遲！咁……」我望向駱譯同阿曉等人，「我同阿曉落去，駱譯你留底包紮傷口先，修洛文呢度拜託你睇住先。」

「無問題。」修洛文簡單回應。

我袋起茶几上嘅簿同筆，臨走之前去確認纖房內嘅人情況，大家呼吸心跳都正常，不過處於昏迷狀態。

望見完夏舞熟睡嘅姿容，我就與阿曉、古朗同運動男落去十六樓。

到達1609門前，基於隔音牆門關係，古朗重施故技，以扭動門柄去隔空製造嘈音傳入房內。

「古朗我要同你講定一樣嘢先。」我向扭動緊門柄嘅古朗講。

「咩事？」

「雖然你話襲擊你嘅全部係來自1209，但以我所知襲擊者係由三間房聯手組成，分別係1209、1409同1609。所以我哋要面對嘅，可能係襲擊過我哋嘅人。」

「喔！咁樣真係大頭佛。」

咯——

大門漸漸打開，應門嘅人係先前襲擊我哋之一嘅壯漢。

「你哋係咩人……係十八樓班人？」壯漢十分驚訝地望住我哋，打算即刻將門關上。

「咪使指擬！」

我一手頂住大門，但唔夠壯漢大力，好彩阿曉同古朗即刻頂住，我哋合三人之力成功將大門推開！

壯漢閂門失敗，表情轉變為憤怒，打算向我哋衝過嚟。



在此之前，有一道聲音阻止咗呢場紛爭！