從西鐵醒返之後……: 13

＊

駱譯、William、Ellie同阿曉四人從睡房出嚟，除咗夏舞之外，所有人聚首一堂坐喺大廳。

「做咩……叫晒所有人出嚟嘅……哇！」Ellie指住因為指甲被拔，而痛苦不堪嘅傑少，「佢做咩搞成咁？」

「逸哥，點解你會留咗喺大廳嘅？」駱譯問。

「提早叫你哋出嚟係有特別原因，而家發生咗啲預料外嘅事情。」我解釋道。





我哋開始向大家解釋現況，首先同唔在場嘅William、Ellie同阿曉講返第二個回合嘅指令，以及特別挑戰嘅事。

之後，家明開始講述我唔在場之後嘅事情。

「第三回合指令要求嘅係137.5毫升嘅血液，而出局條件係最慢嘅房間。之後有把鎅刀從天花跌落嚟，無得到獎勵嘅我哋唯有割傷自己去儲夠呢個量，但最後嘅結果係唔單止我哋達成唔到指令，其他房無一間達成指令，所以結果係無人受到懲罰。」

家明同莉莉手上有包紮繃帶，而傑少手上就無，至於修洛文……因為牛仔外套遮住，所以唔知。

令我最在意嘅係，家明同古朗佢哋一樣都有去儲滿137.5毫升嘅血液，放到目的地，但同樣唔知點解達成唔到指令。





「然後到啱啱嗰個回合，有把拔甲鉗從天花跌落嚟，而指令係一片指甲，出局條件同樣係最慢嘅房間。時間緊迫，在場我哋就以抽籤形式去揀由邊個人身上抆。」

被抽中嘅人係傑少，而打算去達成指令時侯，就受到襲擊。

「而且重有一件事，如果無聽錯嘅話，已經有三間房嘅人團滅咗。」家明講完之後望向我，「阿逸，你係咪遇到其他房嘅人？」

「無錯，佢哋係1009嘅人，同我哋一樣受到襲擊。」我將從古朗得知嘅事情講出，「再加上修洛文從襲擊者盤問出嚟嘅嘢，基本上可以肯定係有三間房聯手襲擊另外兩間房，阻止其他房達成指令，為咗確保自己達成指令後，唔會因為出局條件而受到懲罰。」

出局條件只會喺所有房間達成指令情況下先生效。只要有人無法達成指令，其他達成指令嘅房間就唔會因為出局條件而受到懲罰。





咁樣嘅話，就可以確保只要自己達成指令，就一定唔會受到懲罰！

「而家……係三對二嘅狀況。」一直都係局外人嘅William簡潔總結。

「雖然上一回合佢哋只係派咗三個人，但佢哋經過呢次之後，應該會派更多嘅人阻礙我哋。」家明推斷。

「係喎，嗰位學生妹妹呢？」William四周觀望。

「夏舞發緊燒，喺房度休息。」我解釋。

「喔……」William愣了愣，「原來發生咗啲咁嘅事。」

莉莉延續剛才嘅話題：「不如我哋而家開始就派人守住出邊，一發現有可疑就即刻趕走佢哋？」

「我唔贊成。」鮮有發言嘅修洛文罕有地提出意見，「如果將人手分散，守住出邊嘅人俾對方捉住，只會更削減我哋嘅人數。」





「咁唔通次次都由得佢哋，等指令開始時先強行突破？」

「對方只有三個人，我哋有十個人，人數上係有優勢。」修洛文解釋道，「既然要有心阻礙我哋，但只派出三個人，好可能佢哋人手數量不足。即使下回合佢哋增派人手，亦唔會相差太遠。」

修洛文咁樣講一講，又好似幾有道理。

雖然亦有對方上回合只係試探嘅情況，但唔知點解覺得修洛文講嘅嘢有種可靠嘅感覺……

並唔係源於對一個人嘅認知而產生嘅依賴感，而係單純從言行、神色、動作之間散發出嚟嘅氣勢……係經驗嘅差距。

「如果我哋唔再用輪更制，以人數上嚟睇上個回合嘅險境係唔會再發生。」家明講。

「喔……」駱譯聽完低下頭。





「駱譯，唔關你事。你嘅諗法係為咗防範遊戲而諗，並無任何錯。只不過……我哋防到遊戲，卻防唔到人心。」我安慰駱譯。

「而家我哋就全部人留喺大廳等待，有無問題？」家明問。

「贊成。」我和應道，而其他人亦無人反對。

我哋坐喺大廳靜靜等待，再無任何人再出聲。

雖然有一點並無人道出，但我相信在座當中一定有人知道一件事。

至少，我估家明應該係猜測到呢件事——

指令，正朝向緊壞嘅方向發展。

由一開始嘅衣服同頭髮，之後係血液同指甲……指令殘酷程度逐漸上升。





無人預料得到，下個回合嘅指令將會係咩。

即使無出現襲擊事件，家明應該都會將所有人叫出嚟……

一旦發生類似指令，至少可以由更多人去抽籤決定，減少自己被抽中嘅機會。

「你、你睇下我包成點喇……」Ellie見到傑少傷勢，主動去幫佢包紮手指傷口。

「切……」傑少望一望手指公嘅紗布，然後嘖咗一聲。

有時，善意唔一定會得到道答謝。

氣氛一片寂靜，而家差唔多凌晨兩點。





正當我哋一臉倦容等待著時，突然有兩道黑影從天花而降，跌落茶几上。

碰—！

所有人被呢下聲音驚醒。

「係咩嚟？」家明十分戒備咁問。

然而，茶几上嘅係一本簿同筆。

呢個時侯，電視屏幕再次亮起——

「咩話……半數嘅人寫落白紙，失去意識？」莉莉驚愣咁望住電視。

「出局條件係平均體重最重嘅房間，即係……要將最輕嘅人寫晒落紙上面？」我皺起眉頭講。

「你、你……咁講咩意思？」Ellie驚恐咁望住我。

無錯……假如係要將最輕嘅人寫晒落紙上，體格比男性細小嘅女性一定會被優先寫落去！

呢間房入面嘅女仔，有莉莉、Ellie……重有夏舞！

「等等！點知寫咗落紙上邊嘅人下場會點？」William急切咁講，好明顯係為妹妹擔心，「萬一失去意識嘅人，醒唔返點算？」

「既然佢講話係暫時失去意識，咁總會醒得返。」家明反駁。

「我都認為風險太大，被寫落紙上嘅人好可能會……」我講。

「如果我哋唔照做，就會有人要受到懲罰……你都係擔心房入面嘅夏舞啫？」家明將我心中諗法道破，「暫時失去意識，總好過有人要死，現階段我哋無得唔去達成指令先。」

「咪係囉！你哋快啲搵人去寫喇，唔係重喺度呆等嘛？」手指受傷嘅傑少指點道。

雖然大家都知道失去意識呢件事風險好大，但係我哋不得不照做。

「阿哥，阿哥，我、我好驚……會醒唔返！」Ellie驚到眼淚就要流出嚟。

「唔使驚，無嘢㗎！一定無事！」William咬牙切齒抱住Ellie，不過佢嘅眼神亦相當動搖。

「阿逸……」莉莉臉有難色，雙手抖震，「或者呢個係我無幫到你嘅報應。」

要去達成指令呢件事已經板上釘釘，作為女生嘅莉莉、Ellie同夏舞會因被寫落紙中而失去意識。

「但係我哋呢度得三個女仔，重要……寫多兩個男仔落去！」駱譯講。

「咁根據體重決定。」阿曉平淡咁講，「我70kg。」

「我唔記得……七十幾左右。」修洛文唔肯定咁講，不過單睇體格，就知佢係最重嗰個。

「我、我……六十六。」駱譯口震震咁講。

「我68kg。」我講。

剩返家明、William同傑少，呢刻我察覺到家明神色有異。

「我……64kg。」William面有難色咁講。

當William講完之後，家明似是如釋重負。

「我65kg，之後……」家明望向傑少，「剩返你一個。」

原來係咁，家明對自己嘅體重無自信，所以先露出一副忐忑不安嘅表情，不過當佢知道William嘅體重後，就知結果係點。

家明向住傑少講：「你咁瘦，唔使問都知。結果呼之欲出，即係——」

「我屌你呀？我撚係最尾呀！我、我……65.5kg呀，重過你添呀！」傑少鬧返轉頭。

「咩話……」家明當堂臉容扭曲起嚟，佢望住瘦削嘅傑少，「你一定係講大話，啱啱重要講到口都窒埋！」

「你、你就講大話！」傑少反鬧。

家明不可置信咁望住傑少，而我向家明講：「家明，結果已定。」

「阿逸，唔係連你都相信佢講嘅大話呀？」家明焦急咁反駁，「你知㗎，我同佢邊個留喺度會有更大好處！」

「我只會盡力去避免死亡風險。」我將原話還返畀家明。

我唔知道傑少，又或者其他人有無講大話，但我亦只能根據大家所講嘅資訊去作出判斷。

家明咬牙切齒，握緊拳頭，平時從容冷靜嘅表情已經不在臉上。

「你諗真啲，咁樣都係為咗之後嘅回合，我有信心可以面對任何情況！」家明繼續辯解，「我同佢嘅體重唔差得幾多，根本唔會點影響結果。」

「但、但係都有可能會差嗰0.5kg㗎嘛？」駱譯膽怯咁講。

家明頓時語塞，無法反駁。

「……好，隨你鍾意！無我喺度你哋一定唔成事！」家明氣忿咁轉身離開，沿住樓梯返去閣樓房間。

結果已定，要被寫落白紙上嘅係夏舞、莉莉、家明同William兄妹。

「我……已經有定心理準備接受現實。」William萬般無奈咁講。

「……阿哥！」Ellie瞪大眼望住佢阿哥。

「不過，出面可能已經有人看守緊。」William講出另一個擔憂。

「我哋一齊衝出去。」修洛文講，「我會負責去牽制對方，你哋趁機逃走。」

我哋決定依照修洛文嘅提議去做，首先從簿中撕出一張白紙填上名字，而被寫下名字嘅人就先返到房間安置。

之後，由修洛文打頭陣，我同阿曉負責對付漏網之魚，而駱譯同傑少拎白紙落去。

不過——



我哋一打開門，卻發現有兩個人瞓咗喺地上。