從西鐵醒返之後……: 12
我心感不妙，馬止跟隨莉莉出去大廳。
一出到大廳，就見傑少低頭坐喺梳化上，神情痛苦咁撳住手指，而且茶几上重有啲血跡。
「做咩事？點解會咁？」我驚訝咁望住傑少狀況。
「你自己問佢哋做過啲咩好事喇！」傑少大聲反鬧。
正當我諗住追問落去時，莉莉卻拉住我嘅衣袖：「唔係呢度，有事嘅係出邊！」
我俾莉莉拉住咁行出走廊，映入眼前嘅係修洛文以及三個唔認識嘅人，重有靠喺牆邊，受咗傷嘅家明！
「發生咩事……你哋係咩人！」我忿然咁問。
「佢哋係嚟阻止我哋達成指令。」家明撳住右手，同樣露出十分痛苦嘅表情。
修洛文紋風不動企喺原處，同三個人對峙。
我問：「今次嘅指令——」
「係一片指甲，指甲就喺我身上。」身旁嘅莉莉打開手掌，一塊沾有血跡嘅指甲喺掌心上。
咩話……竟然係一片指甲？
我實在無法幻想，硬生拔出一塊指甲係有幾咁痛……唔係，等等！
唔通，俾人抆走指甲嘅人就係傑少？
「我會拖住佢哋，你哋快啲走！」修洛文大喝一聲。
「走？我唔會俾你哋任何一個人走。」對方其中一個壯漢講。
「你哋最好同我讓開。」修洛文冷冷地講。
「睇下點。」壯漢回應一句。
「哼！」
修洛文擺起類似拳擊嘅姿勢，一瞬間衝到其中一個戴cap帽嘅男人身前，對方甚至連驚愕嘅反應都未做得切，就俾修洛文嘅上勾拳直擊下顎！
帽子男搖搖欲墜退後幾步，企唔穩跌倒地上。
「你老母！」壯漢向修洛文撲去，將修洛文捉住。
雙方體格差異唔小，即使係身型高大嘅修洛文，比起壯漢依然係細一兩個碼，係力量方面係十分輸蝕。
但係，修洛文竟憑著蠻力擺脫壯漢嘅糾纏，更將佢壓去牆度！
「快啲過去！」
聽到修洛文嘅叫聲，拎住指甲嘅莉莉同我即刻向防煙門跑去！
呢個時侯，對方第三個人，一個身穿格仔恤衫，身高同我差唔多大嘅人亦擋喺我哋身前。
我同對方嘅體格差唔多，應該可以爭取一段時間俾莉莉拎指甲落去達成指令。
但係當我諗住撲向格仔男時，對方竟搶先一步撲向莉莉，將莉莉捉住！
「阿逸，係十樓𨋢門位置！」莉莉將指甲扔過嚟，剛好跌喺我腳邊。
格仔男見狀，放開莉莉向我衝過嚟！
我扮作踎低執起指甲，喺佢衝到嚟我面前，打算俯身搶走指甲嘅一刻，我突然企起身一腳踢落格仔男嘅下顎！
不過我呢一腳威力並唔勁，格仔男好快企返起身。正當我諗住再出手時，莉莉從後一腳踢落格仔男兩腳之間！
「啊啊啊啊！」
……好痛！
望見呢個情形，連企喺一旁嘅我都身同感受，受到爆丸一擊嘅格仔男更加跪喺地上慘叫。
呢刻霎時覺得莉莉好恐怖……
「快啲走！」莉莉大聲叫道。
我趁機會執起指甲，成功逃離呢度，沿住後樓梯跑落十樓。
當升降機已經映入我眼前，血陣清晰可見時，竟然有個著黑色背心嘅男人企咗喺離血陣後方！
竟然重有第四個人……！唔單止派人去我哋房門阻撓，就連我哋嘅目的地都俾佢哋搵到！
唔係……佢哋點會知我哋嘅目的地？
我猶豫咗一下，最後並無停下腳步，而係選擇毫不猶豫咁向前衝！
五步、四步、三步、兩步、一步——
我將指甲放落血陣之中，血陣亮出一陣紅光，連同兩樽水一同消失眼前。
指令總算達成，不過結果係點，依然係未知數。
與此同時，我抬起頭以戒備嘅目光望向眼前嘅背心男。我本身以為佢係嚟阻撓我，但我諗諗落對方無可能知道我哋嘅目的地，而佢亦無作出行動。
不過即使如此，我仍唔敢鬆懈落嚟。
佢似乎察覺到我嘅敵意，然後開聲：「等等，我唔係過嚟阻擾你哋。」
我皺起眉頭，不解咁望住佢。
「你哋，係咪有人阻礙你哋去達成指令？」
「係。」我照實回答。
「我哋都係。」
「同我哋一樣？」聽到呢件事，頓時感到十分驚訝。
唔單止係我哋，就連其他房嘅人都遇到相同狀況……？
「無錯，我哋係1009嘅人。上一個回合開始，就有班人守喺我哋房外，想阻止我哋去達成指令。」
上個回合……即係頭髮嗰一個回合？
「只要有人無達成指令，就只會懲罰無達成指令嘅房間。」背心男不齒咁講，「佢哋一定係為咗避免達成指令後會因為出局條件而受到懲罰，所以出埋晒呢啲卑鄙手段，阻止其他人達成指令！」
竟然……重可以有咁嘅方法，確保只要自己達成指令，就一定唔會受懲罰嘅方法！
呢個方法，就係將其他房嘅人當做替死鬼！
「係喇……」突然，我諗起一件更重要嘅事情，「我要返去聽呢個回合嘅結果！」
「等等！」背心男馬上將我叫停，「我可以幫你去聽結果，你可唔可以等我一等，我有啲嘢想問你。」
我疑惑咁望住背心男，背心男睇落並無任何敵意，而且佢似乎掌握我唔知嘅情報。出於好奇心，我答應咗佢嘅請求。
過咗大約一分鐘，背心男就返到嚟我面前。
「啱啱嘅結果係全部房間達成命令，而最慢而受懲罰嘅係1209。」
聽到受懲罰嘅唔係自己房間，總算係暫時鬆一口氣。
「即係話，今次八間房都達成指令，所以就根據出局條件去揀出一間房懲罰。」
「八間？」背心男皺起眉頭望住我，「而家只係剩返五間房。」
「咩話？五間？」我震驚叫咗一聲，以為係自己聽錯。
「無錯，係五間。」背心男再次確認多次呢件事，「雖然有一間係今個回合先消失，但上個回合你有聽廣播嘅話，應該知道有兩間房嘅房號無俾播出，估計係已經團滅。」
上個回合係由我同夏舞去達成指令，亦係我第一次聽到廣播，我當然重記得……如果當時有房跑無被廣播提及，我應該留意到先係……
唔通……
我問背心男：「上個回合嘅指令係咩？」
「喔？」背心男似乎無預料過我會咁問，遲疑咗下，「係137.5毫升嘅血液，我重為咗呢個指令去割傷自己，但最後竟然達成唔到指令……不過好彩無房間達成到指令，所以先無事。」
竟然係血液，而且血液……就係特別挑戰嘅獎勵！
背心男為咗證明畀我睇，展示包紮佢手上，仍染有血點嘅繃帶。
「點解你好似咩都唔知咁？」背心頭露出十分疑惑嘅目光望住我。
「喔……我啱啱有啲事要做，所以唔知。」我將話題轉移返去本來傾緊嘅事，「你想問我咩？」
「我想搵出呢件事係邊間房嘅人做。你唔介意嘅話，可唔可以同我講你係邊間房？」
我打量一下背心男，無論係外表、言語定係行動，睇落佢都唔似係敵人。我猶豫咗一陣，如果佢真係敵人，就無必要問我嘅房號。
「1809。」我將房號如實話畀佢知。
背心男默默點頭，然後喃喃自道：「1809……即係話嫌犯就係1209、1409同1609呢三間房其中之一。」
聽完背心男咁講，我好快理解到現況係點，1809嘅我哋以及1009受到其他房襲擊，而嫌犯係1209、1409同1609，即係話團滅嘅係409、609同809。
但係，唔知點解好似有件事對唔上……
「如果俾我搵到係邊間房做，我一定唔會向佢哋客氣！」背心男握緊拳頭，憤怒咁講。
無錯，1209、1409同1609呢三間房，佢哋當中有想阻擾我哋去達成指令嘅人！
既然係競爭，不擇手段係正常不過嘅事，不過理解並唔代表認同，亦唔成為任意襲擊他人嘅理由。
就如即使明白對方嘅殺人緣由，亦唔代表佢嘅做法就係啱。
既然佢哋向我哋作出挑戰，咁我哋就要還擊！
「喂！我叫古朗，點叫你？」背心男好直接咁問。
「阿逸。」我乾脆回答。
「阿逸，希望我哋遲啲會再見！」古朗轉身準備離去，「記住唔好死！」
「你都係。」我回應一句。
我同古朗道別之後，就返去自己房間。
一打開房門，只見莉莉、修洛文、家明，同仍然表情痛苦撳住手指嘅傑少靜坐大廳。
莉莉率先開口問：「阿逸，你咁遲先返嚟嘅？我哋以為你發生咗啲咩事。」
「無事，我啱啱喺十樓撞到第二間房嘅人，同佢哋交換咗啲情報，所以先遲咗。」我回答。
「啱啱修……修洛文先生都捉住咗對方其中一個人。雖然最後俾佢走甩咗，但我哋都問到啲嘢出嚟。」
我好奇問：「咁你哋問咗啲咩出嚟？」
「雖然佢哋死都唔肯講佢哋係來自邊間房，但係佢哋講咗句，佢哋嘅勢力係由三間房結盟而成。」莉莉將事情講返畀我知。
「三間房……？」
排除我哋同古朗佢哋，以及團滅咗嘅三間房，剩低落嚟嘅就只係得三間房——
事態或者比我想像中更要嚴峻……