從西鐵醒返之後……: 7【2/F 休息室】
列車駛入隧道已經十分鐘，自駛離「尖東站」後，窗外就漆黑一片，不見任何景色。
雖然現階段並無其他事發生，不過大家都唔敢完全放低戒備。
夏舞坐喺離我隔咗個空位嘅位置，雖然而家唔係一個輕鬆交談嘅時機，但我忍唔住問咗一句：
「我哋……以前係咪曾經見過？」
夏舞愣了愣，然後笑著答：「你可能認錯人喇，我哋應該無見過呀。」
「喔……」我微微點頭。
或者係我認錯都唔定，呢種可能係所謂嘅「既視感」。當人處於疲勞或者壓力大嘅情況下，記憶可能會出現短暫記憶混亂，而出現似曾相識嘅感覺。
身處死亡遊戲之中，會出現咁嘅情況都唔出奇。
要問點解我會知道呢啲事，係因為我平時鍾意睇一啲超自然嘅事情，例如夢、靈魂出竅、預知之類嘅事物，感覺好似幾有趣。
轟隆—！
大家默不作聲等待時，列車忽然震咗一下！
「哇屌！做乜撚事？」第一個叫出聲嘅係金髮男。
「唔通下個遊戲要開始……！」駱譯好慌張咁講。
「大家冷靜落嚟先，如果真係有新遊戲，應該又會有廣播先啱。」恤衫男出聲安撫大家，「既然無事發生，應該係咁啱經過凹凸不平嘅路軌啫。」
「但係……呢架車駛咗咁耐都未埋站，好恐怖……」間條女嘅表情顯得十分惶恐。
「冷靜啲阿妹，唔會有事！」恤衫男安慰道。
「等等！你哋……係兄妹？」莉莉驚訝地指住間條女同恤衫男。
「喔……無錯。」恤衫男點頭。
聽完之後有少許驚詫，竟然會有相識嘅人同時墮入呢個遊戲，不過諗返起一開始越過黃線而死嘅嗰對男女同埋金髮男三者都好似係相識。
『下一站係……沙沙……沙……station……沙……』
夾帶雜聲嘅廣播聲傳出，燈光閃爍不停。
「哎啊！好煩啊！你係要想玩遊戲就堂堂正正出嚟，唔好搞埋呢啲小動作！」莉莉焦躁到雙手撳頭大叫。
『咳咳……大家稍安勿躁，啱啱係收音方面出咗少少問題。』一講挪亞，挪亞就到，『喺呢度先恭喜大家通過第一層遊戲，而家列車係帶緊大家去休息室，喺第二層遊戲來臨之前，大家可以稍微休息一下。』
休息室……？喺港鐵入面嘅休息室我只聯想到通宵更工人用嘅臨時休息室。
『不過啊……都要睇大家有無運，可以成功抵達休息室……哇哈哈哈哈哈！』
挪亞留下惡趣味嘅笑聲之後，聲音就消失於廣播中。
燈光依然閃爍，一時光一時暗，而車內所有路線圖屏幕全部都變成雪花屏。
「大家小心……」我心裡有種唔好嘅預感，「睇嚟，即將會有啲唔好嘅事情發生。」
眾人保持住警戒嘅狀態，唔敢鬆懈。
隔咗一陣之後，所有屏幕變成黑色屏幕，然後顯示咗一個英文字。
「noitalever？」我不解咁望住屏幕。
轟隆—！
列車再次震動起嚟，而且震動不斷持續，並無間斷！
「啊啊—！」間條女忽然大聲尖叫，「阿哥，好恐怖啊！」
「阿妹冷靜啲，唔使驚！」恤衫男即刻安慰佢阿妹，但佢嘅表情亦十分動搖。
「大家坐定，捉實張凳或者扶手！」斯文男大聲叫道。
駱譯臉露驚色指住車長室講：「你哋睇下……」
我哋望向車長室，只見一絲絲黑煙從門罅漸漸湧嚟，分散嘅黑煙慢慢匯集起嚟，形成一團巨大嘅煙雲。
大家都意識到事情不妙，一同起身後退。
「呢團黑煙……係咩一回事？」我愣望住團黑煙。
「小心，唔好行咁近——」鬍鬚男企喺我哋身前。
突然，車廂內嘅所有燈全數熄滅！然後——
黑煙隨即朝我哋襲來！
「快啲向車尾跑！」鬍鬚男大叫一聲。
大家即刻轉身向車尾奔跑，但黑煙以極快嘅速度湧上，緊隨我哋身後！
黑煙速度愈嚟愈快，同我哋之間嘅距離瞬間縮短。
唔使幾秒，黑煙已經貼近我哋身後，就嚟追上跑得最慢嘅間條女。
「跑快啲啊！」我向間條女大叫。
間條女奮力奔跑，但黑煙速度更快，將間條女半邊身體吞噬掉。
「阿妹！」恤衫男回頭向佢阿妹衝過去。
「喂！唔好！」我打算阻止佢，但已經太遲，二人已經消失於黑煙之中。
黑煙將間條女同恤衫男吞噬後，速度異常地變快，一瞬間將幾個人吞噬掉，我甚至無餘力去留意邊個人遭到吞噬！
眼前只剩下鬍鬚男、頭箍男，同埋夏舞，但係我哋已經跑到列車車尾，再無任何退路！
我回頭一望，黑煙就直接湧上來，我哋無從躲避，只能任由被黑煙吞噬。
眼前嘅映像就只剩下一片黑色。
然後——
『歡迎大家嚟到休息室，剛才嘅餘興節目玩得盡興嗎？』
我驟然張開雙眼，映入眼前嘅係金碧輝煌嘅酒店大堂。
「呢度係……酒店？」
唔單止我，啱啱列車上嘅所有人，包括被黑煙吞噬嘅間條女同恤衫男等人，全部人都身處於此，一臉愕然望住眼前景象。
明明上一秒我哋重喺列車上，但下一秒——
我回頭一望，俾黑煙吞噬嘅車卡消失得無影無蹤，只有一對酒店大門。
將我哋帶到來歷不明嘅列車，彷似真實西鐵站嘅地方，都尚且可用現實世界常理解釋。
但由列車瞬間移動到酒店，實在係超乎現實……
「喂！今次你又想玩乜嘢？」率先開聲嘅係鬍鬚男，睇嚟呢度完全唔懼怕嘅人得佢一個人。
『哈哈！大家玩得開心嗎？啱啱只係同大家開個玩笑，嚇下大家！』
「你……真係黐線！」莉莉不忿咁講。
『隨你哋點講，不過你哋再嘥時間嘅話，就會少咗休息時間㗎喇！事先一提，你哋係最後一組到達，本身就比其他人輸蝕部分時間。』
「你話其他組……即係重有除咗我哋以外嘅其他人？」斯文男驚訝咁問。
『咁係當然喇！遊戲係要愈多人先好玩，唔通你哋以為自己係俾上天選中嘅十個細佬，要我同你慢慢玩遊戲啊嘛？哈哈哈！』
原來除咗我哋之外重有其他人，而且我哋只係其中嘅一組……
不過當下最重要嘅事情唔係呢樣。
「夠喇！挪亞，快啲帶我哋去休息室。」為咗唔想再聽挪亞嘅冷嘲熱諷，我乾脆吐出一句。
『都係佟先生夠爽快！廢話唔再多講，請大家向前行乘搭升降機，升降機會將你哋送到去休息室嘅樓層。』
眼前升降機保持打開嘅狀態，我哋跟隨指示進入升降機。
𨋢門關上後，升降機就開始向上移動。
最後，升降機停咗喺十八樓，𨋢門緩緩打開，映入眼前嘅係左右分岔走廊。
「我哋應該行邊面？」莉莉問。
「我都唔知……唯有見步行步。」我講。
我哋向左邊行，沿途經過幾間嘅房間，而且全部都上晒鎖，打唔開。
如果無估錯，挪亞口中嘅其他人，同我哋一樣經歷完剛才嘅途戲，而家身處喺呢啲房間入面面。
我哋兜咗成個圈，發現呢條走廊係一條循環走廊，最終會返到去一開始左右分岔嘅另一邊。
差唔多行返去升降機嘅位置時，眼前有間房嘅門並無關上。
我哋順而將門推開，映入眼前係一個白色風格嘅大廳。大廳設施基本齊全，媲美五星級酒店，另一邊更有樓梯通上去閣樓。
「呢間房真係好大……」莉莉驚嘆咁講。
「呢度……應該就係休息室。」我講。
第一次見到複式套房，實在令我感到吃驚。的確假如唔係有錢富豪，作為普通人嘅我哋係一世都無可能會住到呢種豪華房……
只不過，呢刻就算有得住，我都唔會有任何開心嘅感覺。
套房裡面總共有五間房，分別大廳隔籬有兩間，閤樓有三間，每間房有兩張床。我哋有十個人，而呢度啱啱好有十張床，彷彿係為我哋準備一樣。
大家觀察完房間，就聚集喺大廳位置，不過全部人坐低咗之後無人出聲，場面漸變得尷尬。
沉默半響，終於有第一個人出聲。
「我想向大家確認一件事情……」開聲嘅係斯文男，「你哋係咪都係突然失去意識，醒返之後就喺西鐵上面？」
「我本身係同緊阿妹搭緊巴士，搭搭下唔覺意恰著咗，醒返之後就唔知點解喺架西鐵度。」恤衫男率先回答。
「我本身應該喺學校上緊堂……唔係喺車度。」
「我都係，本身應該喺火車上面，而唔係西鐵。」
之後，大家都道出佢哋狀況，而我嘅狀況比較特別，所以我到最後先講。
「我本身就係搭緊西鐵，所以唔覺得有任何怪異。」我講，「不過，我諗我其實同你哋都一樣，只不過我係由一架西鐵去咗另一架西鐵咁解。」
「喔……大家都係一樣，喺唔知情況下上咗西鐵……」斯文男點頭。
「我哋……係咪好似啲恐怖電影咁俾個殺人狂捉咗去一個無人知嘅隱蔽地方，然後玩佢設計出嚟嘅變態遊戲？」間條女膽怯咁講。
斯文男托一托眼鏡，然後講：「我記得佢講過『篩選』呢個隻字，就好似為咗某個目的而設計出呢啲遊戲。」
「有咩目的啊？你咪撚聽條友亂噏，繼我話條友一定有精神病，先可以喪心病狂到設計埋啲變態遊戲！」金髮男氣焰嘅神情，同剛才嘅驚慌表情判若二人。
「我覺得眼前發生嘅事情，已經難以用我哋嘅認知去理解。」我提出我嘅見解，「舉個例，瞬間移動呢件事係無可能發生，但我哋啱啱就已經經歷咗一次……由西鐵瞬間轉移到酒店。」
「無錯，而且屏蔽所有網絡信號，製造一個同尖東站一樣嘅月台，呢啲根本唔係一般人可以做得出嚟嘅事情，無可能會唔俾人發現。」斯文男亦贊同我嘅說話。
「你哋咁講，即係咩意思？」恤衫男疑問。
「雖然聽落好難令人相信，但我哋而家陷入嘅……可能係超乎現實嘅事情。」我講，「呢個只係其中一個揣測，實際上係點無人知道。唯一嘅線索，係啱啱喺車上嗰一隻英文字。」
「我記得係n字頭，好似係n-o-l-i-a……」莉莉苦惱咁講。
「n-o-i-t-a-l-e-v-e-r。」我講。
「noita……noi-ta-lever？呢隻字點解？」恤衫男問。
「我都唔知，從來無見過呢隻英文字。」我講。
「會唔會唔係英文，而係其他語言？」斯文男托一托眼鏡，「又或者，係一個密碼。」
我哋糾結咗喺呢個不明嘅英文字，然而在場無人解釋到當中含義。
「我哋而家唯一知道嘅事就係如果要生存，就必須遵從挪亞嘅指示玩晒所有遊戲。」
「挑！你咁講完同我無講有咩分別啊？我夠知要玩遊戲先唔使死咯！」金髮男露出不屑嘅表情。
「喂！你咁叻，你又有咩建議呀？」莉莉唔耐煩咁望向金髮男。
「建議……打電話報警囉！」金髮男指住放喺電視櫃上嘅電話，「我唔信房入面嘅電話都無訊號！」
「慳啲喇……你幾時見過綁匪會擺個可以打出去報警嘅電話畀人質呀？」
「挑！唔試過點知呀？」
金髮男走去電視櫃前拎起話筒，撳下三個「九」字。
雖然去嘗試任何可以求救嘅方法係好事，但我亦同意莉莉嘅話，認為挪亞唔會蠢到放部可以向外求救嘅電話喺度。
所以，我預咗金髮男嘅舉動係徒勞。
「哇！哇！哇！屌你老母咩！」但係，金髮男忽然似受到驚嚇般大叫起來，甚至將話筒扔落地下，倉皇咁跌落地下。
「做咩事？」
我行過去將地上嘅話筒拎起，然後——
『嘻嘻嘻嘻嘻嘻嘻嘻嘻嘻嘻嘻……』