從西鐵醒返之後……: 8
話筒傳嚟一道駭人嘅笑聲。
「喂，你係邊個？」我問。
『嘻嘻嘻嘻嘻嘻嘻嘻嘻……歡迎致電死亡熱線，只要你付上相應嘅代價，我就會為你提供任何服務……』
「……咁我要即刻離開呢度得唔得？」
『當然無問題，不過代價就係……你條命……嘻嘻嘻嘻嘻嘻嘻嘻嘻嘻嘻嘻！』
「屌你老母！」
我啪一聲將話筒放返落電話上。
「做咩事？」莉莉愣望住我同金髮男。
「無咩嘢，只不過係挪亞低劣嘅惡作劇。」我搖一搖頭，然後坐返埋位。
討論驟然終止，即使大家聚首一堂，亦搵唔出任何逃離困境嘅方法。
呢個時侯，一道聲音打破寂靜嘅場面。
「大家聽我講……」將氣氛打破嘅人正係夏舞，「我覺得……雖然我哋除咗玩遊戲之外就無嘢做到，但大家可以團結起嚟，一齊去面對之後嘅遊戲！」
喺互相猜疑，互有衝突，被恐懼支配嘅氣氛底下，夏舞講出一番咁樣嘅話。
「團結……？」一直無出過聲嘅頭箍男因夏舞嘅話而首次開口，「我哋只不過係一班聚集起嚟嘅陌生人，連大家嘅名都唔知，重點講團結？」
「唔認識嘅話，我哋就而家互相認識大家。」夏舞企起身，以認真嘅眼神俯望全部人，「正因為係呢個艱難嘅環境，我哋先應該要抱持希望彼此信賴嘅心，團結起嚟。」
聽完夏舞呢番話，唔知話佢係天真好定咩好，但係喺而家嘅氣氛底下，或者——
需要一個好似夏舞咁嘅人，將氣氛往正面方向引導。
「互相認識合作，我唔反對呢種做法。」鬍鬚男望向夏舞，「我叫修洛文，多多指教。」
一直睇落兇神惡煞，生人勿近嘅鬍鬚男，竟然主動自我介紹。
「我係龔夏舞，你可以叫我夏舞。」夏舞微微一笑。
之後，我順勢將話題引導：「既然我哋十個困咗喺度，不如就互相介紹，方便稱呼都好……大家可以叫我阿逸。」
「呢個係唔錯嘅提議，我叫家明。」雖然一早就同斯文男交談過，但直到呢刻我先知佢嘅名。
「我叫駱梓譯……平時啲人都叫我做駱譯。」
「我叫莉莉。」
之後到其他唔認識嘅人。
「我叫William。」眼鏡男指一指佢阿妹，「我妹妹，Ellie。」
「阿曉。」頭箍男講。
「Hey！我叫傑少。」最後到金髮男。
大家互相介紹完，雖然要一下子記九個人嘅名字，不過並唔係咩難事。
「其實……我哋而家喺度有咩做？」Ellie問。
「既然呢度係休息室，咁就係俾我哋喺度休息，然後準備參加第二場遊戲掛。」我猜測道。
「但喺呢個環境底下，重邊有人會瞓得著呀……」莉莉嘅表情有點煩躁。
「我又唔係咁諗，既然挪亞特登畀我哋休息時間，好可能之後嘅遊戲會係更消耗精神同體力。」家明講，「如果我哋無爭取到呢段時間，蝕底嘅會喺我哋。」
「但係……一個人喺房嘅感覺好恐怖！」Ellie露出擔驚受怕嘅表情。
「每間房都有兩張床，係唔會出現一個人嘅情況。」我講。
「但係我唔想同唔識嘅人一間房……！」
「一係你同你哥哥一間房，我哋其他人再自行分房，有無問題？」我提議道。
「喔……好……」Ellie低下頭回答。
「麻煩晒你。」William補充多一句。
Ellie同佢阿哥一間房，之後同為女生嘅夏舞同莉莉一間房，剩低嘅閣樓三間房由六個男人分咗去。最後，我同駱譯一間，家明同修洛文一間，阿曉同傑少一間。
分完房之後，我哋就各自返房，睡房嘅風格同大廳差唔多，而房內只係得兩張床以及廁所。
即使留喺大廳，我哋亦無咩可以做到，下個場遊戲既未開始，又搵唔到逃離呢度嘅方法，留喺大廳只會令到氣氛更尷尬。
我將枕頭墊喺背部，半臥床上。
回想起第一場遊戲嘅情況，當時如果唔係修洛文拉我一把，恐怖我已經命喪箭下。而家諗返起的確會有出冷汗嘅感覺，但當時嘅我並無顧慮到咁多。
總言而之，我活下來了。
坐喺另一張床嘅駱譯問我：「你對之後嘅遊戲有咩睇法？」
「有咩睇法……哈！無㗎，見步行步囉！」我苦笑一聲，「話說，你做咩成日叫我做逸哥？」
「因為你感覺好有……大哥嘅feel。」駱譯竟然臉紅起來。
「大哥……？」我無視駱譯嘅反應。
「嗯……唔知點講，總之就係咁嘅feel。」唔知點解，駱譯番話愈講愈令我不安，「你介意我咁叫你？」
「唔介意，隨你喜歡。」我答完之後，合上眼睛。
「逸哥，其實……你真係唔驚嘅咩？」駱譯嘅表情突然轉變為不安，「我哋可能隨時會死，就好似上一場遊戲嘅人咁……」
「你問我，其實又唔係唔驚嘅……但比起諗住隨時會死，我會諗住點樣生存落去。」雖然好老土，但呢個係我真實想法。
駱譯聽完之後，便靜下來。
唔同嘅人有唔同嘅思考方法，就算我講完我嘅想法，都唔會令駱譯嘅諗法變到同我一樣，更何況並無話邊一種思考方法先係正確。
我張開眼，向駱譯講：「我出一出去大廳先。」
雖然我有份提出休息呢個建議，但對住四面牆果然好壓抑，我都係鍾意比較廣闊嘅空間。
我沿住樓梯行落大廳，之後觀望大廳一圈。廚房有足夠食水同糧食，無需擔心飲食嘅問題。
窗外嘅晚空同樓宇雖然睇落與正常無異，但唔使講都知道眼前景象並唔係我哋熟悉嘅現實，更何況望落去連半個人影都唔見。
喀拉——身後傳嚟開門聲。
「阿逸？你點解會喺度？」出嚟嘅人係夏舞。
「我唔想對住四面牆，所以出嚟行下」我回答，「你呢？你又出嚟做咩？」
夏舞微微一笑，然後回答：「同你一樣。」
我留意到夏舞嘅小腿，不但係包紮傷口嘅手巾，就連腳踝上嘅白襪都一片深紅。
「你隻腳而家點？」我擔憂咁問。
「暫時無咩點流血，但係要好返就需要重新處理同包紮過傷口。」
要處理同包紮傷口，就必須要有繃帶同消毒藥水等嘅急救用品……
「邊度會有啲嘢呢……咦！」
電視櫃上有個印有十字嘅紅色箱。
「嗰度有first-aid kit！」我打開急救箱，將消毒藥水、紗布、綿花、繃帶，所有用得著嘅嘢都拎過嚟茶几度。
「呢啲……」夏舞愣了愣。
「雖然我唔識first-aid，但我估呢啲嘢應該有用。」
「唔該你……阿逸。」夏舞慢慢將包紮小腿嘅手巾拆開，雖然鮮血無如湧泉流出，但見肉嘅傷口清晰可見。
夏舞拎起棉花同消毒藥水，開始處理傷口。
唔知係咪著住裙唔方便，夏舞嘅手勢顯然有啲笨拙。
「使唔使幫手？」我問。
「咁啊、咁要麻煩晒阿逸你……」
我唔識有關first-aid方面嘅知識，只係識用野蠻人方法去處理傷口，不過喺夏舞嘅指點下，總算成功幫夏舞個傷口消毒，再用繃帶重新包紮好。
「多謝晒你，阿逸，一次一次咁幫咗我救咗我。」
「唔使，舉手之勞啫。」
啱啱幫夏舞消毒傷口時，佢幾乎無露出任何痛苦嘅表情，即使係一旁嘅我見到都覺得痛，只係咬緊牙關，合上眼睛，無發出半點聲。
如果係我嘅話，我諗我會毫不猶豫放聲大叫，然後不停嗌stop了……
「阿逸。」
「做咩？」
「雖然我好多謝你救咗我，但如果下次有咁嘅情況……你唔好再冒住生命危險咁樣做……」
「……點解？」
「如果你因為我而死嘅話，我會……覺得內疚。」夏舞低下頭講。
「吓？」我愕然大叫一聲。
「吓……？」夏舞俾我嘅叫聲嚇咗嚇。
「邊有咁嘅白痴會因為俾人救咗條命而唔開心，如果有嘅話佢一定係聖母瑪利亞再世。」
「阿逸……我講真。」
「如果你會因為咁而唔開心，咁麻煩你唔好展現出要人救嘅姿態喇。」我講完之後，就背向夏舞，行去窗邊望風景。
無錯，夏舞的確係天真，而且十分愚蠢。
『沙沙……哈哈！各位，我哋又見面喇！唔知大家有無掛住我呢？』
挪亞嘅聲音忽然從大廳處傳嚟……係天花板上嘅內嵌廣播器！
『相信大家都知道我出現嘅目的，無錯！遊戲即將開始。第二層遊戲係——休息室！哈哈！你哋唔係以為真係有得休息嘛？難得嚟到咁好嘅地方，當然就係要同大家玩遊戲喇！』
果然……成件事唔係咁簡單，休息室只係個掩眼法，第二場遊戲準備開始。
『必須要喺指定時間內完成指令。啊！順帶一提，今次嘅廣播係採用中央廣播到多間房間，所以全部房間嘅玩家都會聽到同一番話。』
其他房間內有著同我哋一樣情況嘅「玩家」。
「發生咩事？」駱譯從房間行出來，「係咪……遊戲開始咗？」
我向駱譯點頭示意。除咗駱譯之外，並無其他人出嚟大廳。
『首先……大廳嘅各位先望向眼前嘅電視屏幕先。』
電視屏幕突然亮起，但只有一片藍屏。
『你哋會根據房間號碼最尾嘅數字，分成十個組別。電視會不定時向其中一個組別發放指令，只要喺限時內將指定嘅物品放到指定地方就算達成指令。呢個遊戲只有兩個情況下出現懲罰，假如所有房間都達成指令，會根據出局條件選出至少一個出局者，而果如有並非所有房間都達成指令，就唔會按出局條件去篩選出局者，而係無達成指令嘅房間都會出局。』
出局……？係咩意思？
唔通……係成間房嘅人都受到懲罰？
『假如出局嘅話，就會隨機挑選出局房內其中一人，啟動體內嘅納米機械作為懲罰。當然，如果無房間達成指令，就唔會有任何房間出局。注意，物品必需要符合種類同數量，多咗或者少咗都唔得，而且唔可以放置多餘嘅物品落去，否則都會視為無達成指令。』
咩話……竟然係隨機挑選！
一旦出局，房內每一個人都有可能面臨懲罰嘅危機！
『遊戲規則就係咁簡單，遊戲即將開始。第二層遊戲會喺第二朝清晨完結……祝大家有個美好嘅夜晚！聽朝見！』
挪亞興致勃勃嘅聲音消失後，大廳再次寂靜無聲。
駱譯慌張咁問：「逸哥，我哋而家應該點……」
原本只有一片藍色嘅電視屏幕上，出現幾行黃色嘅文字——