從西鐵醒返之後……: 6
『判定時間到，合格人數：十，不合格人數：零。』
而家剩返十個人，分別係我、夏舞、駱譯、莉莉、斯文男，重有睇落兇神惡煞嘅鬍鬚男，遞手巾畀我嘅間條女，身穿恤衫嘅年輕男子，以及一個從未出過聲，戴住頭箍髮型all back少年。
不過，聽到所有人都安全嘅消息，卻無一個人露出高興嘅表情。
成功已經近在咫尺，但又被打返回原形，呢種感覺就好似先賜予希望，再賜予絕望一樣咁大反差。
「而家……得返五個回合，係咪真係有可能行到過去？」莉莉將眾人嘅憂慮道出。
不知不覺，我哋已經剩返最後五個回合。
「我哋唔好自己嚇自己住，重有五個回合可以行過去。」斯文男頓一頓，然後托一托眼鏡，「如果……真係行唔到過去，咁我哋亦只能聽天由命。」
「吓……咩叫聽天由命，我重未想死住呀！」間條女激動咁講。
「死唔死唔到我哋揀，由我哋暈咗一刻開始，生死嘅選擇權已經唔喺我哋手上。」斯文男冷靜咁講。
「即係話……我哋而家咩都做唔到？」莉莉擔憂咁講。
「我哋而家可以做嘅，就係等待。」斯文男講完之後，大家都沉默落嚟。
雖然離遊戲完結重有五個回合，但大家都感覺到事情往最壞嘅方向發展，而令大家有呢個諗法，係因為啱啱嗰下絕望嘅轉折。
「並唔一定係無嘢做到……我諗到一定可以上到車嘅方法。」我講。
我講完呢句之後，大家都將目光投放落我身上。
「你……有啲咩方法？」莉莉問。
呢個方法，係我將一直以嚟所觀察到嘅所有嘢，再加上夏舞同我講嘅話，而得出嚟嘅結論。
呢個方法，或者會俾人覺得係黐線，亦要冒住十分大嘅風險，但係我所見到唯一嘅希望。
或者，從一開始遊戲嘅過關方法就係如此——
「只要喺警報聲響起嘅時侯，避過所有箭，直接衝去車門。」
「你……話咩話？」斯文男好驚訝咁問。
「喺警報聲響起情況下，我哋再無步數約束，只要可以避過所有箭矢，就可以上到車。」
「黐線嘅咩！你咁即係叫我哋去送死啫！」金髮男大聲鬧道。
「有可能……做到咩？」斯文男猶豫地問，「同埋，有咩根據？」
「根據就係，警報聲響起時，車門依然處於打開狀態。」雖然我無親眼見到，但我相信夏舞見到嘅嘢。
倘若警報聲係為咗將所有人趕返去黃線後，咁車門就唔應該打開，因為就算絲毫機會，都有可能直接衝到去車門上車。
既然車門係保持打開，即係暗示我哋可以藉呢個機會直接衝去車頭上車。
而且——
「經我觀察，呢件事就並非不可能做到。當然呢個係一個風險好大嘅抉擇，唔到最後關頭都唔希望咁做。」
此時，廣播再次響起。
『請各位乘客，請前進三步。』
「但如果真係到嗰個時侯，就必須要作出抉擇——留低或者冒險。」
氣氛一片寂靜。
「我會選擇冒險……」聲音嘅主人正係夏舞，「因為……我想生存落去。」
「我都……我都唔想死……」駱譯雖然嘴巴顫抖，但佢仍講出呢一句話。
至於其他人，並無對呢番話有特別反應。畢竟要作出關乎性命嘅決定，並非隨便就可以做到嘅事情。
「到時如果真係咁，都無得我哋揀嘅……」莉莉無奈咁講。
呢五個回合入面，我哋可能安然無恙行到車門前，亦可能會遭遇多一次警報聲。
最壞嘅打算就係遊戲完結為止，都未能登上列車。
而家，我哋只能等待命運嘅審判。
大家懷抱住忐忑不安嘅心情，迎接最後嘅四個回合。
『請各位乘客，請前進五步。』
『請各位乘客，請前進五步。』
『請各位乘客，請前進十五步。』
步數指示回復正常，再無出現奇怪嘅指示。
然而，我哋將要面對嘅係另一個困境。
第二十九回合已過，我哋已經前行大約八十米，離車門重有一節車卡。
假如下一回合係步數指示，我哋就可以平安無事行到車門，但如果係警報聲嘅話，我哋就要冒住生命危險衝去車門。
下一回合，將會決定我哋嘅生死。
諗返起上一次警報聲響起嘅情況，腦海裡浮現出一個計劃。
呢個計劃可以引導大家安全地登上列車，但係我必須要作出一個抉擇。
雖然我想保持平靜落嚟，但我無法止住身體嘅抖震，以及掌心不停冒出嘅手汗。
我深深呼出一口氣，將心情平復落嚟後，向大家講：「大家，如果下一回合係警報聲嘅話，可唔可以將條命交畀我？」
所有人驚愕地望住我。
「屌……唔撚係講真㗎嘛……」就連金髮男都開始驚恐。
「萬一警報聲響起，我會即刻向前跑出去，你哋只要靠近方柱作掩護向前跑過去就得。」
「咩意思？」斯文男問。
「我會跑喺最前，由我嚟做誘餌，成為十字弓瞄準嘅目標。」
因為我哋離車頭只剩下二十米，十字弓要瞄準我哋嘅話就要將角度轉到十分大，即使我避開箭矢，亦只會射中月台幕門而唔會波及其他人。
「阿逸，你唔係打算犧牲自己嘛……？」夏舞愣望我。
「逸哥，你講真？」駱譯好驚訝咁叫咗出聲。
「梗係唔係，咩犧牲小我完成大我嗰啲嘢我先唔會做。其實啱啱我一直有觀察十字弓，所以我有信心避開所有箭。」我凝望前方，「時間差唔多，大家準備。」
大家聽完我嘅諗法，都默不作聲，不過即使有人阻止，我都會照樣咁做。
既然有人願意為大家做誘餌，相信無人會反對。
「你咁樣……萬一有意外，會無命㗎？」夏舞向我投來擔憂嘅眼神。
不過，擔憂對我嚟講係多餘。
「放心喇，我會平無安事上車。」
嗡——嗡——嗡——
第三十回合開始，果然——響起嘅並唔係廣播而係警報聲。
「快啲照我說話去做！」
月台剩下紅燈閃爍，大家聽到我嘅叫聲，即刻算去月台幕門一邊，而我就沿住走廊中心筆直去前奔跑！
呢個亦係當我迴避箭矢同時，箭矢唔會波及到後方眾人嘅最好方法！
遠方盡頭嘅天花緩緩打開，十字弓蠢蠢欲動瞄向我！
前幾次警報聲響起，逃走時極短時間嘅空隙之間，我有留意到十字弓發箭嘅模式——
十字弓射出箭前，先會以鐳射瞄準目標，而瞄準之後會有一秒停滯時間。
同埋每射完一箭之後，到下一次瞄準目標前，會有三秒嘅空隙時間。
我哋離車頭只有二十米左右嘅距離，喺呢段時間十字弓會向我射出幾多箭？一箭……定係兩箭？
我可唔可以捕捉到十字弓嘅空隙，迴避所有箭矢，護送所有人到達車門前？
死亡嘅威脅逐步逼近，腦海泛起一個疑問——
點解我會冒住生命危險，自願做誘餌去幫一班甚至連認識都談不上，只係見面無耐嘅陌生人？
係因為想做一個大愛嘅人去保護所有人？定係想證明自己比其他人更有能力？
唔係。
係因為我覺得自己能夠做得到，所以去做！
一道紅光向我射來，瞄準住我嘅頸部——
我趁十字弓瞄準之後停滯嘅一刻，向側邊躍去！
嗖—！劃破空氣嘅聲音從耳邊傳來，箭矢喺離我幾厘米嘅位置掠過！
離下一次瞄準會有三秒嘅空隙，而車門就喺我眼前不足十米距離！
我趁住呢三秒空隙，傾盡全力向前奔跑，只要跑多幾步，就可以到達車門！
呢個時侯，十字弓再次瞄準住我，而且更係瞄住我嘅頭——
大鑊了！
千均一發之際，我俯身向前打咗個前滾翻，避過奪命一箭！
我馬上起返身，但係翻滾完嘅我頓時無法重整方向同視線……！
「阿逸！」
就喺呢個緊張嘅關頭，我聽到一聲吶喊。
「呢度！手！」
另一道叫聲傳嚟，我聽清楚聲音傳嚟嘅方向之後，毫不猶豫向聲音嘅方向伸出手，一隻寬大而厚實嘅手將我捉住，然後猛然將我拉過去！
嗖—！
箭矢射落我啱啱嘅位置！
拉住我嘅人係鬍鬚男，其他人已經衝晒上車，佢雙腳橫跨列車同月台，一手將我拉入車內。
但係，十字弓並無停落嚟嘅跡象，正在調整角度瞄過來！
唔係掛……竟然重嚟！
就當我打算躲避嘅時侯，瞄到車門邊緣嘅十字弓忽然停止調整角度，保持不動。
雖然唔知咩事，但係我諗應該係安全。
我望入車內，眼前嘅映像再唔係燈光昏暗，被不祥嘅紅燈照耀住嘅月台。
熟悉嘅燈光同環境映入眼中，雖然有一剎那係唔敢相信，但毫無疑問我身處嘅地方就喺車上！
車內，警報聲變得無咁鳴響，而喘息未定嘅我，望住眼前呢個拉我一把嘅救命恩人。
「唔該晒你。」
鬍鬚男聽到我嘅道謝之後，並無特別反應，而係行到一旁，挨住車門企喺度。
『判定時間到，合格人數：十，不合格人數：零。月台將會在一分鐘後釋放毒氣——重覆，月台將會在一分鐘後釋放毒氣——』
終於……完結了嗎？
我望住頭頂嘅顯示屏，上面依然寫住尖東East Tsim Sha Tsui呢幾隻字，雖然明知呢一切都係假象，但居然有種安心嘅感覺。
「阿逸。」
我望向聲音嘅方向，夏舞企咗喺我身前。
啱啱叫我伸出手嘅人係修洛文，而另一把呼喚我名字嘅人，就係夏舞。
我清楚見到掛喺佢臉上嘅表情。
「Sorry，令你擔心。」我諗我需要向佢道句歉。
「你無事就好。」夏舞揉一揉雙眼，然後又向我露出微笑。
呢一刻，我見到隨住笑容而彎起嚟嘅雙眼，係有幾咁動人可愛……而且十分親切。
夏舞低下頭，慢慢行返去座位坐低。
我望向夏舞嘅小腿，手巾被染得血紅一片，更有少量血水沿住小腿染紅腳踝上嘅白襪……
望見夏舞嘅傷勢，心裡不由然泛起擔心。
上車之後，除咗鬍鬚男同埋頭箍男之外，其他人都搵咗個位坐低落嚟。
經歷完生死關頭之後，人嘅精神同身體都會隨即放鬆落嚟，呢個係人類精神調節機制。
「今次真係多得阿逸，如果唔係都過唔到關。」坐喺我對面嘅莉莉講。
「但係逸哥……點解你咁確信，遊戲嘅過關方法就係警報聲響起時跑過去？」同樣喺我對面嘅駱譯困惑咁問。
「大概……係因為直覺，同埋信任。」
「……信任？」駱譯露出不解嘅表情。
如果唔係有夏舞嘅提點，我都無可能發現到呢點。
「挪亞都算陰濕，一開始特登提到『狐狸先生幾多點』，而且重將好多規則輕描淡寫咁帶過，擺明俾陷阱我哋踩啫！」莉莉不忿咁講。
「正因為咁，先叫做遊戲。雖然係耳熟能詳遊戲，但一旦玩起嚟，就暗藏殺機。」斯文男講，「現實社會，唔係都一直玩緊呢種遊戲咩？」
呢個時侯，車內廣播聲響起：『請勿靠近車門……Please stand back from the doors……』
嘟嘟嘟嘟——
「呢架車……會駛去邊度？」間條女神情不安咁講。
「我唔知道，不過就算知道，都無咩意義。」我望向窗外遍地屍體嘅月台。
「因為選擇權早就唔喺我哋手中。」
＊
第一層遊戲生還者總結：
阿逸
駱譯
莉莉
斯文男
金髮男
鬍鬚男
夏舞
間條女
恤衫男
頭箍男