由18蚊一包純簿萬 到宜家90蚊一包黑甩 看破紅塵: [伴我走過中學的純簿萬]

中二就開始食煙既我點解會食煙?
 
無他既，不外乎朋友食囉，人食我食囉，型囉，鬼佬牛仔都食，我當然要跟住食啦，仲有一個好重要既原因－平。
 
當時97前後一包純簿萬都只不過係18蚊。
 
唔係你宜家食緊果D濕鳩雞煙，係正正常常喺7仔/Circle K入面果D放得靚靚仔仔既港旗。
 
18蚊，對一個中二學生黎講，可能係扭18張白卡，4支可樂，9舖街霸，１餐lunch...
 




18蚊，其實對一個中二學黎講真係唔係D咩錢。
 
真係可以隨手都買得起，問題在於，你買唔買到?
 
買煙要18歲先準買，講架姐，實質黎個社會好自由，你入得去，基本上就賣俾你。
 
不論7仔/Circle K/報紙佬，有錢收有邊個唔收?
 
18蚊有廿飛煙，圍起上黎真係１蚊支都唔駛，而對啱啱開始食既初哥黎講，廿飛，太多...
 




一包煙一個人可以食足一星期。為免走晒煙味，所以我地就會夾份買煙。
 
18蚊，好易計。兩個人夾每人9蚊，三個人夾每人6蚊，20除3既話咪7-7-6咁分囉，朋友無計既~
 
如果搵唔到人夾又煙癮起咁點算?
 
果陣時仲有一樣售賣方式叫散炮~
 
係D舖頭阿姐阿叔將自己食緊果包煙分拆黎賣，專賣俾D放lunch既學生哥，飯後一支煙，快活過神仙。
 




兩蚊飛，真係賺死佢地。
 
每日lunch或放學都著住件校服既我，一班friends閃埋一二角/後樓梯扯返飛，果種自由既空氣宜家既你係唔會感受得到。
 
18蚊包煙，你宜家食緊既雞煙(所謂既免稅煙)都唔只黎個價啦。
 
下等人、中等人、上等人，人人都有權去享受黎種呼吸空氣既自由，所以話，自由可以幾咁平，自由可以幾咁大眾化。
 
當時黎講，自由...會有人在意嘛?
 
喺97前，真係好自由，但你又點會估到，自由原來可以咁短暫...