由18蚊一包純簿萬 到宜家90蚊一包黑甩 看破紅塵: [人身第一飛純簿萬]

我人生第一支煙係發生喺中二果年，14歲(好似係)，地點我屋企。
 
仲好記得果日老豆老母去左旅行，屋企無晒人就得返我一個，我就請左我果時最老死既老死－李賣藝過黎屋企玩。
 
李賣藝黎條粉腸可以話係人渣中既人渣，我真係無吹過水，黎種人渣你身邊總有一個，而喺黎個社會仲越黎越多。
 
李賣藝黎條友我小學三年級就識佢，係一個新移民，插班入黎讀同一班，咁啱得咁喬原來住正隔離屋，所以好快就變得好friend。
 
但係黎個李賣藝真係好賤格，我敢講喺我小學生涯中從未遇過D咁賤格既人。
 




有功課佢會叫你一齊抄，出貓又會俾埋份卷你睇，偷小食部D珍珍薯片又會同你分。
 
好似好好人呢?你想問點解我會話佢賤呢?
 
你估真係咁好死咩!
 
你抄完、睇完、食完佢就會同你講:「嗱!你有份抄、睇、食架!你爆出去，我就爆埋你出黎架啦!」
 
仆你個街，你點會估到一個三年級既小學雞會咁攻心計?
 




真係盡得祖國既珍傳，無恥過民賤聯。
 
好彩你精我都唔柒，要捉人痛腳一齊捉囉，我又唔係D咩玉器，我都只不過係一舊細少既爛石，我唔可以出賣你，你亦唔可以出賣我，反正要爆都係攬炒，未驚過。
 
我地既爾虞我詐，不能分離既關係就咁開始。
 
講返果一晚，真係人生中一個大轉變。
 
“叮噹”門鐘響起，我一打開門就見到條粉人拎住個白色手抽袋，我心諗: 『西多過like…』
 




「喂~我帶左D好野黎呀~」李賣藝用上一個極淫蕩既樣同我講。
 
心諗咪又係夕樹舞子果咋野…我大把VCD啦。
 
「伸個頭埋黎睇吓先啦~」李賣藝打開個手抽袋...
 
『黎包…』我就伸個頭埋個手抽袋道…
 
手抽袋入面收埋左一包白色盒，仲有一個火機，仲要放得鬼咁整齊，鬼咁試正，十足十7仔Ddisplay咁。
 
『煙?』我有D驚訝，估唔到條粉人會帶包煙過黎我道。
 
「係呀~喺阿哥道偷返黎~試返飛啦~」李賣藝拎起包煙，攞左飛出黎，隊俾我。
 
成個畫面就正正係D仆街道人吸白粉咁…試下啦~唔會上癮架喎~一飛咋嘛~你唔係驚呀嘛?




 
喺黎D無知時期就梗係不失霸氣膽粗粗講句: 『怕你有牙? 戴卓爾夫人仆街果時我都未驚啦!驚你咩?不過我成家人都唔食煙，唔好搞到成間屋都係煙味得唔得先?』
 
「講黎D~入廁所咪得囉~我有個方法，學阿哥既~包掂~」之後我地就入左廁所，開左個水嚨頭…
 
“察”一聲，火光紅紅…
 
“斯”閉起雙眼用力抽一口…
 
就係咁，試左我人身第一飛純簿萬…