《有一晚，我喺學校操場遇到跌落凡間的天使》: 【17】
「你哋諗住點啊？」班主任俾張紙我哋寫，叫我哋諗下將來有咩路向之類。
於是我哋就圍埋開會。
我真係好鍾意佢哋呢班朋友，成日都帶俾我熱血沸騰嘅感覺。
「我⋯⋯唔知啊。」呀紫十分迷惘，臉上嘅愁容同佢說話如出一徹。
「咁你呢肥蔥？」我問道。
「我？想讀商啊其實我，但未知讀咩好。」嗯⋯⋯至少肥蔥有大方向。
呀紫就問小男。
「我想做社工啊。」小男回道。
「你？你做社工打人啊？」肥蔥一插話就是惹怒小男。
「我做到社工就第一個打死你！」小男毫不客氣地回話。
「你唔洗做社工就可以打死我啦⋯⋯」肥蔥喃喃道，唔敢再大大聲話小男，睇怕呢段時間佢好似學乖了。
「但其實你都幾啱做社工啊，又肯幫人。」呀紫認為呢個目標幾啱小男。
「小瑤呢？」小男問道。
只見小瑤支支吾吾地說：「唔知啊⋯⋯」
有種尷尬係入面。
最後問到我嘅時候，我將來呢排嘅諗法同佢哋講⋯⋯
「下？你諗住去台灣？」佢哋異口同聲地說。
「我⋯只係唔想留係香港呢個無希望嘅地方，而台灣都幾好啊，生活得又舒服，我想出去試下啊。」
「哇，咁多個之中得你最嚇親我。」肥蔥個表情似乎唔係幾信嘅。
「我想去讀室內設計，而且以我依家嘅時候，要係香港讀到自己想讀嘅都難。」我都苦惱㗎其實，而且我知同小瑤拍拖嘅時間無多，到時候真係分開嘅話，我已經知自己會好好好傷心⋯⋯
其實去另一個地方都好嘅，容易啲放低。
因為唔想到時候傷心欲絕，就變得更加唔捨得⋯⋯
呢一種感受真係唔知幾多人會明。
每個人都有自己嘅目標前進，而我同小瑤嘅關係開始進入最後嘅倒數階段。
而且⋯⋯
而且倒數嘅，唔單單係我同小瑤嘅關係，其實我哋幾個嘅關係都一樣，仲有大約3個月時間左右，就last day。
到時，我哋幾個就唔會再聚係一個班房入面。
其實我好唔捨得⋯⋯
咁難得遇到一班好朋友，但我哋又必須要前進，現實當中充斥住種種矛盾。
不停地相遇，分離，組織我哋成個人生。
每一日都過得好快，比我想像中仲要快好多，每日返學，有時間就操卷，溫小測，同小瑤拍拖嘅時間都相對少咗。
因為我哋都明，有陣時需要理性，無得話將所有時間都放曬係拍拖度。
亦因為咁，我哋拍拖反而少咗嘈交，因為時間少，就更珍惜相處時間。
只不過⋯⋯
小瑤好似有啲嘢瞞住我，佢有陣時會消失咗，然後去到聖誕節。
就迎來我哋嘅唯一一次嗌交，仲要係大嘈。
我好後悔，好後悔嗰陣會同小瑤大嘈一餐，點解自己要咁先得㗎！
我哋維持呢種相處模式已經一段時間，除咗啱啱一齊嗰種時間比較甜蜜，之後就比課業嘅壓力、升學壓力佔據我哋唔少時間。
甚至⋯⋯
有時會忘記小瑤係天使咁樣嘅存在。
成件事就要由聖誕之前講起⋯⋯
嗰陣時我哋都有傾聖誕節有咩做，上年我哋係一齊出嚟食飯，出去感受下聖誕氣氛。
所以今年都問下有咩搞。
然後當我哋係呢個時候同佢哋講我同小瑤拍拖嘅事⋯⋯
「下！？」眾人嘅反應會咁大，都係預料之內，仲有啲飄飄然添！哈哈哈。
「死仔！溝到個咁正嘅，你執到啦！」肥蔥投以一個羨慕嘅眼光。
呀紫嘅反應好似好驚訝咁，但有啲唔太自然，我諗以佢平時咁觀察入微，應該唔多唔少都察覺到。
小瑤都同意我哋公開嘅。
「你好好錫住小瑤啊！！」小男作勢兇我咁，見到佢哋咁，其實幾窩心，佢哋嘅祝福都收到曬。
「所以今年聖誕，我哋就無得過啦，哈哈！」我裝出一副嬲打，塵囂嘅態度。
其實呢個係我同小瑤唯一一次，而且係最後一次嘅聖誕，我只想好好地珍惜最後嘅時光。
希望佢哋可以原諒我嘅自私，心裡想著。
「你個死仔，依家有異性無人性啦下話？重色輕友啦話？」小男扭住我個耳仔，聲大夾惡咁講，耳仔微微感受到痛楚。
「痛痛痛！！」
「下年仲可以過㗎嘛，之後仲有機會！」我嘗試兜兩兜，先願意放過我。
「之後大家都畢業睇你仲有無機會！」
其實大家都心知肚明，畢業後要再相聚，唔係一件容易嘅事，大家都各散東西。
網上好多人都話，中學識嗰班係最純真嘅友情嚟，之後上咗大學，出咗社會都未必會再遇到。
所以我先慶幸識班呢一群人。
「不過你都係同小瑤過啦，你兩個拍下拖好應該。」最後小男都放過我。
「但係睇你都唔係啲浪漫嘅人㗎啦。」呀紫一旁扇風點火，仲同小男擊掌起來。
「咩姐！我實會俾小瑤幸福嘅！」
小瑤係一旁食花生，神態自若，彷彿此事如她無關般。
「問小瑤先，係咪真㗎⋯⋯？」佢兩個就好似小八婆係咁問我哋嘅事，我就無辜地俾人擺上針板上。
之後聖誕嘅氣氛開始來臨，每年呢啲時候就係人煩求偶時期，男男女女都會想盡辦法令自己唔好自己一個，都想希望有人可以慰藉一下自己。
理得佢邊個叫耶蘇啊！
我亦都準備好曬節目，一早已經。