《有一晚，我喺學校操場遇到跌落凡間的天使》: 【16】
之後嘅日子，大家真係開始忙住溫書，開啟了認真模式。
我都有搵啲補習社，因為我都要追返啲成績，所以都有必要去補習。
我有諗過問小瑤要唔要補習，但其實條友成績又ok，而且都唔洗點將成績放在心啦，所以就打消咗呢個念頭。
但奇怪嘅係，小瑤有些時日係會消失咗。
姐係佢無講去邊，但就聯絡唔上佢，我無乜點為意，咁大家其實都各有各忙啦嘛，理唔到咁多，小瑤除咗咁之外，又無乜奇怪嘢，就無放係心上。
我哋兩個會係屋企溫馨多嘅，至少可以確保嘅係，每日都會見到。
甜蜜嘅時間多咗，我覺得好彩嘅，因為唔洗好似其他情侶咁，晚上要送啊，夜晚可能會掛住啊會打電話，我哋已經係隔離。
而小瑤佢係屋企變得越嚟越依賴我，但佢係街或者返學就唔會嘅。
小瑤一開始對呢段關係並唔係咁習慣，姐係好似未放得開咁，然後隨住時間越嚟越長，就越大膽。
例如條友會係返屋企嘅路上，無其他人嘅時候就會跳上我背脊，成個小朋友咁開心係度郁嚟郁去。
「Yeah！！！出發啦！夏晨號！」個傻婆無無聊聊都可以咁開心。
我哋雖然好似靠近咗，但無做其他嘢，就連簡單嘅接吻都仲未做⋯⋯
唔知我哋係咁純定點，覺得好似唔洗咁樣做都足夠sweet。小瑤佢帶俾我好多新嘅體驗，可能有別於普通中學拍拖咁，但對我嚟講係好特別好特別嘅回憶。
一世都無可能忘記。
我有時都會諗，其實我有好多瞬間想錫落小瑤度，但望住佢天真嘅臉容，就唔知點解會有停落嚟嘅衝勁。
我屋企人成日都好夜先返，我同小瑤就會坐係沙發度睇戲，係我做完功課之後，甚至我會一邊睇一邊溫聽日嘅小測。
小瑤就瞓係我大脾上面，當我大脾係枕頭咁，瞓得幾咁自然，幾咁舒服啊條友。
「個女主角好慘啊⋯⋯」其實我根本無睇到套劇，因為我係度溫緊書。
「係咩？又幾慘喎。」我抬一抬頭，望一望個電視，當係交下功課咁。
小瑤即刻坐返起身，我見到佢真係睇戲睇到喊。
「你都唔認真睇嘅！」佢拎起茶幾嘅紙巾，拭去眼淚。
我將小瑤攬住，捱係我心口度，道：「咁我溫緊書啊嘛，而且我都唔睇啲咩韓劇嘅。」
「成日思密達來思密達去咁，我不嬲都唔係咁鍾意韓劇，加上我聽日科X又要小測。」
「咁⋯⋯」小瑤仲好似收唔到聲咁。
「咁我問你啊，如果有一日我真係好似個女主角咁，有癌症咁走咗，你會點啊？」小瑤好認真咁問。
「⋯⋯」
本來我已經將一年後嘅事慢慢忘記，好好地珍惜依家嘅時光，但依家小瑤咁樣一提⋯⋯
我就諗起小瑤仲有大約9個月嘅時間，其實佢都係會有離開我嘅一日。
我唔知點答佢呢個問題，我可以點？我幻想到嗰種痛苦，亦因為咁我就同自己講唔好去諗。
咩都做唔到嘅無力感，開始入侵我全身，蔓延到每一個細胞。
「我會一世咁記住你囉！」我認真咁講，而且嗰陣嘅我，亦係如此深信著。
「就算你上返天堂又好，係鬼門關做鬼都好，我之後都一定⋯⋯」
「一定會搵你！！」我自己都暗暗發誓。
小瑤無講嘢，唔敢同我對望，但我偏偏好想去望下佢咩表情，於是同佢玩起上嚟。
「喂⋯⋯望下我啦。」
「唔要啊。」
「望下姐。」我郁下小瑤，佢就又俾我更力咁拉開我，唔俾我去望佢。
最後我騷一騷癢，佢先哈哈大笑咁轉過嚟捉住我隻手。
剛剛嘅淚痕還掛喺臉龐，眉頭一皺一皺的，笑容好似難得咁擠出嚟。
望住佢嘅表情，我先深知，其實小瑤同我諗嘅都係一樣⋯⋯
讀書嘅氣氛加劇了，小測同考試開始多，我哋又要忙住應付中五最後嘅考試。本來仲沉醉喺同小瑤時而開心快樂甜蜜，時而傷感嘅氣氛度，但都要被逼抽離，去應付學業。
好快，考完然後進入暑假，算係中學生涯最後一個暑假，你可以話考完DSE都係暑假，但意義好似已經唔同咗。
我都想留低多啲回憶，之但係同時都覺得DSE緊要，都學似其他同學咁暑假報啲補習班。
唔知係咪拍拖耐咗啦，我同小瑤都慢慢少咗見面，可能係因為考試嘅緣故？
補習到好夜，返到嚟係相處一陣，就已經攰到淨係想打機，想瞓，仲有其他練習要做呢？
唉，時間真係點都唔夠用。
然後最近難得有時得閒想同小瑤出去拍下拖，唔知係咪第六感關係，覺得小瑤好似有啲奇怪。
姐⋯姐係佢會好似無啦啦失蹤咗咁，又或者唔得閒。
好似今日咁，佢就話約咗人補習，神情古古怪怪咁。
咁有時我自己忙上嚟都無理到佢，係我做得唔好，所以小瑤咁樣我覺得都好正常，更覺得似係報應咁。
但就會好忐忑囉，個心十五十六咁，由之前無乜點見，依家專注力放返係小瑤身上，就想同佢出去拍下拖。
點知佢都係成日拒絕我，只有閒時去行下街睇下戲，而且佢好似虛弱咗不少。
最後就咁樣過咗成個暑假，不知不覺就嚟到尾聲。
一開學，就開始感受到DSE嘅壓力。
開始印好多past paper，同埋諗將來嘅出路。