《有一晚，我喺學校操場遇到跌落凡間的天使》: 【15】
但睇得出小男係含淚咁講，然後小男嘅眼神有意無意咁飄去肥蔥身上，其實佢都好在意肥蔥。
之後我哋幾個就係度抖下，等小男好返啲就再出發。
係呢段時間，肥蔥都無過嚟講下嘢。
於是乎我就去同肥蔥傾下偈啦，因為其他人都無咁嘅意圖。
「點啊你？仲嬲緊？」
「無！」肥蔥語氣好狠，好明顯仲氣在心頭。
「你頭先好心痛小男？」我直問，我覺得男仔之間要傾偈無咩好隱瞞。
「梗係啦⋯⋯」佢都仲係好嬲，我都未見過肥蔥咁嬲，「佢頭先仆親嗰陣我真係好驚㗎，成個提心吊膽咁，點知佢一啲都唔緊張自己。」
「小男都係唔想我哋擔心姐，互相體諒下啦。」我拍拍佢膊頭。
「行啦喂！」呀紫喊道，我哋就草草完結呢個話題。
只不過一路上無頭先咁輕鬆愉快。
青春時期，就係咁容易有呢啲小插曲。亦因為青春唔完美，先導致有遺憾？先會一路記住？
我哋終於踩到大美篤嘅水壩。
上面長長，睇唔到盡頭嘅水壩真係好靚，加上湛藍嘅天空，散發住青春嘅氣息。
我認為人生最最最青春嘅時候，就係中五中六嘅時候，唔知點樣解釋，儘管需要讀書，要去諗好多關於將來嘅嘢，但就覺得將來充滿可能性，有一腔熱血。
我哋坐係石壩上面，係度有講有笑，只見肥蔥神情已經放鬆咗好多，但仲係度扮到悶悶不樂咁。
「想搞下笑，講返嘢咪做囉！唔洗係度扮cool喎！」我係佢耳邊，大大聲咁樣講出嚟。
肥蔥即刻面都紅曬，反駁我話：「我邊撚度有啊！？」
「我不嬲都係咁cool㗎啦！」
「你收皮啦！扮咩啊？」我笑住回道，確實我哋呢班人真係唔啱氣氛咁僵。
當一個人唔開心，其他人都會想盡辦法令到佢開心返。
係咩原因塑造成我哋咁呢？我都唔知。
「咪係！明明都唔嬲啦，仲要係度扮嬲。」呀紫都加隻腳入嚟。
「我⋯⋯真係嬲啊嘛！」呢句講完之後，肥蔥雙眼就已經俾人矇起咗。
係小男做嘅。
「係咪仲嬲啊？？？」
「喂喂喂！我咩都睇唔到啊。」肥蔥個嘴角不自覺咁樣抽畜起上嚟。
小瑤都加入戰場，幫手整古做怪，最後就係肥蔥把持唔住，嬲唔落。
又係度話，遲下一定會整返我哋轉頭，又話連嬲都唔撚俾佢嬲。
我諗⋯⋯
最開心嘅並唔係咩嚟呢度踩單車，而係一班人去到邊，都可以玩得咁開心，咁放肆。
我哋無因為呢個小風波而唔開心，我甚至大膽啲有個想法，就係唔會有咩事可以拆得散我哋呢班人。
而幸運同幸福嘅事，係有呢班好朋友，而喺呢班好朋友入面，搵到我鍾意嘅人。
最幸福嘅事，就係幸運地遇上可以俾到幸福你嘅人。
我同小瑤還車好近，而佢哋還車仲要還一段路，然後佢哋還完車再返嚟一齊坐車出返沙田。
我同小瑤還完車，就係度等，係呢個無其他人嘅地方，我哋終於可以做返對情侶。
偷偷地。
「之後都唔知有無得再好似今日咁開心啦。」到依家，我仍然仲有種幸福洋溢嘅不真實感。
「點解嘅？」我哋嘅關係仲未好自然，兩個人企係街度，都無拖下手咁。
會企到好埋，基本上係手背貼住手貼，之但係就邊個都無打算拖住邊個咁。
「因為之後都要讀書囉。」開心過後，係一陣惆悵。
「我同你相處嘅時間，都唔係好多。」小瑤提起我一件好重要嘅事。
「⋯」
我因為想更珍惜現在，而拖起小瑤嘅手。
「你知唔知我係點樣鍾意上你？」小瑤忽然講起呢個問題。
有時同女仔相處，就會突然間殺你一條措手不及嘅問題，嚇倒你。
上次呀紫都係一樣，我都唔知應該點答才好。
「唔⋯⋯唔知。」我尷尬地回道。
小瑤嘅手拖得我稍為用力咗，感覺我哋好似連埋一齊咁，拖住佢就感覺到佢個心情。好似頭先拖住佢咁，佢稍為用力少少，我就知佢緊張、肉緊我。
「喺平時不經意間鍾意上，喺不起眼嘅細節度，慢慢鍾意上。」
「我唔知我哋會剩底幾多時間，我落嚟嘅任務簡單而短暫。所以每一個瞬間對我嚟講都彌足珍貴，同時你對我嚟講都好珍貴。」
「你成日都會係屋企嫌我唔識呢樣唔識嗰樣，但只要我有咩問題，你都會即刻幫我，好似你會幫我落街買啲生活用品俾我，返上嚟就會話我，好似好嬲咁，卻令我明白⋯⋯呢一種另類嘅關心模式。」
「睇嚟你都唔知㗎啦。」小瑤嫣然一笑，同緊我講呢一切都唔後悔咁，因為佢眼睛無左搖右擺，直勾勾地凝視著我。
沒有動搖。
「本來我都唔清楚呢啲係咪鍾意，我都係第一次有咁嘅感覺，我甚至搞唔清楚自己點諗，直至某一刻，我先確定自己心意。」
「就係你整親嗰次，所有情緒蜂擁而來，之前我都有講過啦，哈哈！」
我動容了。
我真係確確實實咁感受到愛情，的確我之前係鍾意呀紫，就算依家面對佢，我間唔時都會勾起以前鍾意嘅回憶。
但我深深咁明白，已經過咗去，我同小瑤係有過經歷，有別於鍾意呀紫嘅感覺。
我輕輕摟住小瑤嘅腰，然後將佢攬過嚟。
原來擁抱嘅力量係可以咁強大，好似傳遞緊啲咩咁，唉我都唔知點形容，講到好撚中二病咁。
總之係種神奇嘅嘢啦！
「之後嗰一年，我哋都唔好提仲有一年好無？好好珍惜現在，到夠鐘啦，就由佢夠鐘啦好無？」我許下承諾，亦係我唯一做得到嘅嘢。
「好！一年喎，我哋仲有好多時間啊！又唔係得返聽日。」
小瑤總係可以樂觀咁去面對問題，由第一日識佢，佢已經係咁，呢一點亦係佢迷人嘅地方，係佢身邊就會有力量。
「係囉！大把時間。」呢句說話有點苦澀。