《有一晚，我喺學校操場遇到跌落凡間的天使》: 【14】
「嚟啦！」佢哋係咁叫我同小瑤去，搞笑嘅係我哋由頭到尾都無話唔去。
其實我哋呢班人相處得好開心，係中學入面一齊創造咗好多回憶，呢啲回憶先係中學最珍貴嘅嘢嚟。
當下可能有啲人覺得好無謂，好幼稚。
但其實好開心，甚至乎你將來諗返起，都好開心。
我同小瑤都無得揀，最後都要去啦。
我哋定係呢個禮拜六，因為下個禮拜大家就開始努力讀嘅讀，溫嘅溫。
可能因為見到咁樣，我開始明白，有啲人就算幾老友都好，都唔係時時刻刻可以陪喺你隔離。
佢哋都有自己嘅路要行，所以望返小瑤嘅事，佢遲或早要離開，都係注定需要面對嘅事。
倒不如趁可以聚埋一齊嘅時候，大家一齊開開心心。
我哋嚟到大埔，我哋打算由大埔開始踩，一路踩到入大美督。
嚟完已經聽到小男同肥蔥係度嘈嘈閉，我都好自然咁同小瑤一齊嚟，最後呀紫佢姍姍來遲。
「Sorry啊，屋企規定我唔可以咁早出門，同埋話要早啲返去啊。」呀紫抱歉地說。
我哋都紛紛笑笑口，話唔洗介意啦，我哋明嘅。
我哋出地鐵站，就去搵單車鋪，然後揀好自己嘅戰車。
小瑤今日一身陽光清新嘅打扮，好鬼乎合佢。
令我耳目一新嘅，都係呀紫，佢今日著咗短褲，露出修長纖細嘅雙腿，仲戴咗頂白色cap帽，果然係女神。
小瑤拎到架車之後，手忙腳亂咁，想跨過去，但又好似跨唔到？定無膽？
佢嘅動作就咁停咗係半空中，好似啲小狗係度痾尿咁。
「喂喂喂！你搞咩啊？」我衝上去佢度，要佢放返隻腳落嚟。
「我⋯⋯好似上唔到⋯⋯」
「你，識唔識踩㗎？」我問咗個重要嘅係問題，一個我之前無諗到嘅問題。
「唔係好識咋⋯⋯」小瑤佢笨拙地扶住個單車。
我當時已經心諗，大鑊啦⋯⋯
「咁你唔識踩又話嚟？」我知唔識踩嘅話會拖曬全部人進度，而且依家又無速成班，無得一時三刻教識佢點樣踩。
「咁⋯⋯我都係想同大家一齊玩咋嘛。」小瑤本來已經唔好意思咁，但我頭先嘅態度好似惡得制。
佢委屈嘅樣先令我意識到自己好似整喊佢咁。
但我覺得頭先唔算好惡姐。
其他人都上曬車，慢慢向前踩一段路仔，神情自若。
佢哋見到我哋兩個唔知係度做咩咁，都紛紛返嚟問我哋咩事。
「做咩事啊？」
「無嘢啊嘛？」
小瑤咬住唇，低住頭，唔講咩事。
所以我就話：「無乜嘢啊。」
「小瑤佢唔係幾識踩，我換架車，後面可以載人嘅單車，我車佢啦。」
「小瑤你真係唔識踩？」小男關心地問道。
我都以為佢係天使，求其用啲能力就得啦，結果好似無呢回事。
「唔係幾識，好似好易跌咁。」小瑤堅強地扶住個單車，係我哋面前艱難地坐上去，然後試下向前踩，但成部車搖搖欲墜咁，無幾耐又停落嚟。
我睇到佢咁，就知佢真係唔識踩，一時三刻好難教得識。
「一係你哋行先啦，我同小瑤搞掂完就追上嚟啦。」
「下？係就一齊出發啦。」連平時搞笑嘅肥蔥都認真起上嚟。
「係囉！我都覺得係咁話。」小男附和。
「去換過架啦。」
佢哋幾個真係唔話得！只不過搵過第二車後面可以載人嘅單車唔容易，我哋後來退咗依家呢間，再去租第二間先有。
一路上，小瑤都好難過咁唔出聲，默默地推住佢架車。
見到佢，我真係於心不忍，只係想佢開心返，做返平時開朗活潑嘅小瑤。
「因為我頭先咁樣話你，你唔開心？」我平時好少會咁樣用溫柔嘅聲線同人講嘢，真係一啲唔man。
小瑤仍然唔理我，好似仲嬲緊我咁。
唔知點解，對於小瑤咁樣嬲法，總係覺得佢好可愛，好好笑。
有種捉弄佢，好好玩嘅感覺。
「仲嬲緊啊？」我藏起笑意，一手拎走佢推緊嘅單車。
其他人都已經出發，佢哋話會慢慢踩等我哋喎。
「對唔住啦，唔好嬲啦好無？」我唔識點樣氹人，只能粗糙地咁樣氹下，用自認為嘅方式⋯⋯
「我都係想同你一齊出去玩下姐⋯⋯」小瑤用蚊滋咁細嘅聲係度講。
「我知。」我用單手推住部單車，另一隻手就拖起小瑤。
「但你都要同我哋講你唔識啊嘛，你唔識我哋咪去玩其他嘢囉。」
「咁樣唔係咁好啊嘛。」明明唔係我錯咁，但依家反而係我認錯嘅？
愛情好似真係有種顛倒是非對錯嘅力量。
「我真係想試下啊嘛！」小瑤佢仲發緊小朋友脾氣，用力地、誇張地甩開我隻手。
我無好氣地嘆一口氣，用力佢甩開我嘅力度拉返佢。
佢先乖乖地跟住我走。
最後我哋揀到架可以載人嘅單車。
「你唔識踩，依家有我車你都唔錯啊？」係出發前，我同小瑤講道。
「做人要係要咁樣執生，樂在其中㗎啦。」
小瑤坐上嚟之後，真係好似紙咁輕，甚至乎我好似感受唔到我係載緊人咁。
我一出發嗰陣，小瑤好似失去重心咁，向後頃斜，然後用力咁捉住我條腰。
從此就無放開過。捉得緊緊的。
花咗大約半個鐘嘅時間，我先追到小男佢哋。
我哋一到，佢哋幾個好興奮咁講：「終於得啦！？」
「少咁你哋硬係覺得好似少咁啲咩囉！」肥蔥誇張嘅講法令我唔係幾信。
「係真唔係啊？」
「真㗎！我哋啱啱先傾完。」小男附和，小男笑得燦爛，臉色好似滋潤過咁。
我好自然咁懷疑佢同肥蔥係咪趁我哋兩個唔係度，發生咗啲咩事？
嗰種俾人隱瞞嘅感覺彷佛一直在都勾住你咁，仲要係勾一部分，令你會變得更加在意嗰一部分。
「我哋唔係話無嘢傾，但好多個時候會想問埋你哋，會想你哋一齊傾，但先發覺你兩個唔係度！」呀紫都有同感。
呢種氣氛都宣染著我同小瑤，我哋幾個嘅感情真係唔話得，一時感動到唔知點回應，但其實心入面好感激。
我感受到小瑤攬我用力咗小小，喺聽完嗰句之後。
佢哋一邊踩，一邊有講有笑咁。
有著微風嘅伴送，陽光打落河面，反射出嚟嘅金光刺入雙眼。咁樣嘅青春係會讓我記住一世。
只係我無諗到，原來有啲嘢係寧願從來無擁有過。
我哋好快都有講有笑，講下以前我哋無啦啦點解會識，好似係因為小男頂唔住肥蔥成個煩膠咁，係咁上堂㩒隻原子筆，嘈住小男上堂。
小男就粗聲粗氣咁屌鳩肥蔥。
肥蔥就話：「咩姐，整下都嘈住你？咁你小息瞓教打鼻寒就無嘈住我嘅？」
就係咁響起呢場革命嘅號角，之後就成日都係度嘈，激到小男日日都爆炸咁制。
我同呀紫係因為佢睇唔過眼我小測咁差，就上堂會提點下我。
我先醒起，嗰陣我仲好尷尬呀紫咁樣教我，好鬼無面。
當聽到我同呀紫嘅事，小瑤用力地係我大脾扭咗一下，我大脾即刻出曬紅印。
我踩緊單車，我睇唔到小瑤嘅表情，亦都無做咩回應，點知佢好似以為我唔知咁，覺得好似唔夠大力，就打我背脊。
於是我都轉頭，俾佢呢個可愛嘅動作搞到笑：「咁都好呻醋啊？」
「咩啊？我邊有！」
「明明就有。」
「你再屈我啊？」小瑤把聲聽起上嚟就係講：係啊！吹咩？
我突然間加速⋯⋯
「啊！！！」小瑤驚訝地失聲尖叫。
「咩事啊？！」佢哋因為聽到後面小瑤嘅叫聲，紛紛慢緩落嚟，同時回望我哋睇下發生咩事。
就係因為小男佢回頭嗰一下，佢無留意前面側邊有個石壆。
一下就隡咗上去，成個人失去咗平衝。
連平時有做開運動嘅小男，都會失平衝，成日扑咗落地。
我哋即刻停低曬，去睇下小男有無大礙。
首當其衝嘅，係肥蔥。佢一臉緊張咁衝埋小男度，睇下佢有無咩，即刻扶返佢起身。
我哋幾個都圍係旁邊，睇下小男傷勢嚴唔嚴重。
我哋都好關心小男嘅傷勢，但最擔心嘅就係肥蔥。
「有無事啊？」我同呀紫輪流問。
「我無事啊！」小男堅強地說。
我轉眼望一望小瑤，諗返起上次運動場嗰次，小瑤都用能力幫我，所以佢應該可以幫到我。
但小瑤佢搖搖頭。
下？我不解。
但當下我無細問，因為得我知小瑤有咁嘅能力。
反而肥蔥話小男：「你睇下你，行路都唔帶眼咁，搞到依家咁啦！一陣踩唔到咁點算！？」
本來堅強嘅小男，見佢強忍痛楚，然後聽到肥蔥咁講，就反擊。
「關你咩事姐？我都話我無事囉！」語氣都唔好得去邊，仲帶點怒意。
仆街啦⋯⋯我哋感到氣氛唔係幾對路，紛紛協議和解。
「唔好嘈啦，依家處理咗個傷口先啦。」
肥蔥輕輕捉起小男嘅手腕，小男手心同埋手肘都擦損咗，膝頭哥就無乜嘢，因為小男扑之前有稍少卸一卸力。
肥蔥用佢支屈臣氏水嚟幫小男清整傷口，但成個過程一粒聲都無出過，默默地幫小男處理個傷口。
我同呀紫小瑤眼望望，均唔知點算，唔知出唔出手幫好，唔幫又好似過意唔去咁，幫又覺得好似阻住佢兩個咁。
肥蔥意外地令我覺得佢心細，因為佢銀包原來有放膠布。
雖然唔多，得幾塊，但夠幫小男貼曬傷口，啱啱好用曬。
然後肥蔥咩都無講，就上返㗎單車度，係度等。
好明顯佢係嬲緊⋯⋯
平時肥蔥成日有講有笑咁，講嘢有時係幾賤嘅，但心地好好。
我都係第一次見肥蔥佢嬲到唔講嘢。
「依家點算啊？」呀紫問我，呢個環境好似層相識，好似係肥蔥同小男表白嗰陣呀紫有問過我。
「依家咁尷尬，我都唔知點化解，但搞好小男個傷勢。」
「你有無事啊？」我哋幾個輪流問下。
「我無事啊，之前做運動都成日整襯㗎啦，呢啲小事啦。」小男溫柔咁講。