《有一晚，我喺學校操場遇到跌落凡間的天使》: 【10】
依家小瑤仲係痛得好辛苦，我陪係佢身邊一段時間，但仲係發緊高燒，周不時都要拎水俾佢飲。
「喂，你真係好嚴重喎，不如帶你去睇醫生啦。」我緊張地道，見到佢病到咁，再唔去睇醫生我驚佢有事。
係唔係唔習慣人間嘅氣候呢？定香港空氣污染好嚴重？搞到佢如此尊貴、敏感嘅身軀頂唔順呢？
「唔洗啦，我抖返一日就無事。」小瑤依舊有氣無力，見到咁我更是徬徨。
「唔得！你都病到咁，我帶你去睇醫生。」我可能自己順便都要睇埋。
「我依家都無身分證，就……就算去到都無用啦……」
小瑤如此一說，我就反駁道：「你有超能力㗎嘛，你實有方法嘅。」
「我無啦……」
「下？咩啊，你點會無姐。」
「你記唔記得我今日幫你整返好個傷口啊？」小瑤會再次提返起，唔通係因為咁？
「其實……其實我唔應該幫你㗎，咁樣係違反大自然嘅規律，姐係就算有人係我面前死，我都唔可以幫啲咩手，所以我依家先會搞到咁……」
我頓時語塞，本來諗咗好多勸小瑤去睇醫生嘅說話，但全部卡喺喉嚨到，講唔出口。
「你做咩咁傻啊？搞到自己病。」
如果我知道會有咁嘅結果，我就唔會要佢幫我啦。
我疼惜地摸摸小瑤個頭，佢真係一個大傻瓜嚟。
漸漸地，小瑤嘅出現開始佔據住我生活，由一開始見面覺得佢好無哩頭，整古做怪，到依家⋯⋯
先真正認識佢。
佢成日就係咁，將人哋放係第一位，咩都緊要過自己，亦都唔會理人哋係咪值得佢咁樣做。
因為，我就係嗰個唔值得佢咁做嘅人。
「放心啦，我抖返一日就無事㗎啦，所……所以啊，唔洗去睇醫生啦。」
「你真係呢……」我唔知講咩好，只好用咁樣去掩飾自己嘅感動。
「聽日同埋後日都放假，等你好返就帶你出去玩啦。」我想做返啲嘢嚟報答小瑤。
「但你隻腳……」就算小瑤病緊，都不忘擔心我傷勢。
「放心啦，我有呀紫俾我嘅藥酒，好快都會無事㗎啦！」我氹住小瑤先，其實邊有咁快好啊，都要死頂㗎啦。
「哦……咁好啦，係呢，點解聽日同後日都會放假嘅？」小瑤好似聽到有得出去玩，個人比較有返啲精神。
「不嬲陸運會之後都會放一日假嘅，俾啲運動員休息返一日，但後日呢，就係教師發展日，所以好彩連放兩日！」我解釋道。
「好……好啦。」小瑤微笑著，用氣聲績說：「咁等我好玩帶我去玩啦。」
「你係會好返先好啊……如果你聽日仲唔好玩，就無得帶你出去玩㗎啦，就帶你去睇醫生㗎啦！」
「知啦，我實會好返……」
然後我同媽咪輪流照顧住佢，到咗第二日傍晚到啦，佢又真係好返曬喎，龍精虎猛咁。
我嗰陣係廳到睇緊電視，小瑤好似啲精靈咁跳出嚟，嚇我一大跳。
「做咩姐你？」我係俾佢個戇鳩樣嚇親，「咦？你好返啦？」我放低手上嘅薯片，走過去望下佢。
「真係咁神奇？一個鐘頭前入去睇你仲係床度死死下嗌飲水㗎。」
我再一次驚嘆：「哇，喱個世界真係無奇不有啊。」
「咁聽日係咪有得出去玩啦？」小瑤好興奮咁同我講，隻眼碌到大一大。
「係，我應承過你㗎嘛。」我唔會食言嘅。
「耶！有得出去玩嚕。」見到佢就諗起細細個會好期待學校啲一日遊咁。
「你好好地休息下先啦，雖然睇落好似好返曬，但都抖下啦，養足精神聽日出去啊。」我叮嚀著。
小瑤聽到喱句，先至安心咁去瞓。
小瑤嘅出現成日都令我擔心，對住佢我就無辦法唔理佢。我唔理佢嘅話，佢會唔知做出啲咩事。
望住佢天真嘅面孔，就好容易衍生出保護佢嘅慾望同埋衝動。
與此同時，擾亂我個心。
到咗第二日，小瑤佢真係乜事都無，唔似得琴日咁頹。
「真係好好多喎！」我不忘約定。
「梗係啦，休息陣就無事，係呢，今日我哋去邊啊？」唔知佢係咪因為有得出去玩先咁快好返呢？
「你想去邊啊？去海洋公園定迪士尼？」
「係咩嚟㗎？」
為免解釋咁多，我直接打開電腦google俾佢睇，睇咗陣，我以為佢會揀去迪士尼啦，因為迪士尼都係女仔鐘意去㗎嘛，又卡通又童話故事咁，點都係同女仔扯上關係，而且小瑤又咁細路女。
但出乎意料地，小瑤說：「喱個啊，啲海洋生物好似好得意啊，好想睇佢哋啊！」
「我仲以為你會去迪士尼添。」
「下？睇落都唔有趣。」
決定好去邊之後，我哋就起行。要知道我要請埋小瑤去海洋公園，真係洗我一舊錢啊……
算啦，講好咗要帶小瑤去見識下喱個世界嘛。
仲未入場，小瑤見到咁大個樂園就已經興奮得要死。
「哇！好大啊啊啊啊啊啊！」
「你依家見到嘅只不過係一半咋，後面仲有㗎。」我忍唔住笑佢傻。
「真係㗎？咁快啲去囉！」小瑤拖住我隻手，就係喱一下，開始認清我對小瑤嘅感覺。
喱一下，如果換著呀紫，我諗……我會覺得好甜，但頭先，感覺就好似拖住唦妹咁。
之前我以為自己可能鐘意上小瑤都話唔定，但頭先我好似無喱個感覺。
但小瑤並無察覺到啲咩，拉住我直衝門票處，我哋買完飛之後，經過大門口入去嗰陣，露出小朋友該有嘅興奮。
一路上，我好似帶住呀妹咁嚟玩咁，不過見到佢開心我都開心嘅，琴日嘅嗰份感動，看似喜歡上嘅感覺，並無因為咁而有更進一步。
我哋有去睇大熊貓，我仲取笑佢話，你睇下隻熊貓幾似你？
佢笑住咁打我，然後我係佢面前扮熊貓，一路睇，就一路嘈，打打鬧鬧咁。
我哋去對面玩咗成日機動遊戲，佢未玩之前，就話睇落好似好好玩咁，但一去玩啦，玩完返嚟又驚到乜咁。
小瑤撓住我隻手，好用力咁撓住，然後痴到好埋，口震震咁講道：「頭…頭先…真…真真係好得人驚，我個心仲跳得好快快…」
又要玩又要驚。
「都同你講，唔係個個都覺得好玩㗎，你唔玩得就去玩青蛙跳樓機啦。」
無錯，佢一嚟就打大佬，話要去玩跳樓機。
跳樓機一路上去，佢帶點淘氣地同我講，「你話呢，我哋升上去會唔會見到天堂啊嗱？」
「我呸，我仲未想死啊。」
「咁上面真係最接近天堂啊嘛，你睇下，我哋嚟個天越嚟越近啦。」
「你好掛住上面咩？」一下子我擔心起上嚟，我哋啱啱先熟咗，咁快就要走？
「無啊，我只不過計緊我同你嘅距離咋嘛。」
「我哋嘅距離咪依家咁囉！」我摵下佢手腎，由小瑤第一日嚟嘅時候，我就應該知道佢有一日係會走。
我哋存在住無論點樣都拉唔近嘅距離。
「你睇下，上面幾近我哋，話唔定之後你企高啲，我就會見到你呢？」
「咁我係咪都會見到你先？」我問道。
「睇下我俾唔俾你見啦，嘻嘻……」
「嘻……哇哇哇哇哇哇哇哇哇哇哇哇哇哇哇！」
小瑤再次講嘢嘅時候，已經係落到地下嗰陣啦。
「你得唔得啊？」我輕輕扶住佢，點知佢就成個捱埋嚟。
「定我哋去睇海豚啊？」我提議道，因為無幾耐海洋 show就開始，順便俾佢休息下。細路女始終都係細路女。
我哋仲趕得切睇最近嗰場海豚show，只不過就多人到呢……我哋一係坐好側邊，一係就坐山頂。
「都無乜位囉，不如我哋坐山頂啊？」我提議道。
「嗯。」小瑤佢淡淡地回應我。
我以為佢應承企山頂，點知無幾耐佢就話係下面搵到，拉住我過去。
我哋坐得好邊邊，但都算前嘅位置。
「你寧願坐喱度睇唔清都唔坐上面啊？」
「喱度可以睇得清啲海豚嘛。」
咁佢喜歡就好，好快海豚show就開始。
一開始小瑤都甚是興奮，覺得啲海豚好得意啊，好可愛。
但當海獅出嚟同大家打招呼嗰陣，佢就講咗句：「佢哋好慘……」
「咩話？」突然轉得咁快，我跟唔切。
接住落嚟，我手機傳來一陣陣震動，我下意識去睇下手機。
係呀紫sd whatsapp過嚟，問我今日傷勢點樣，有無好度。
當下我由心發出一個好窩心好暖嘅笑容，我心情好抗奮，就係因為一句關心我嘅whatsapp，但我又要盡量唔好表現得太明顯，可能唔想俾人覺得我好奇怪吧？
但我收返起手機，個腦係度盤算緊點覆嗰陣，小瑤就起身走咗去。
？？？
我滿腦子問號，但我都即刻跟上去。
等佢行到離開人群之後，我就捉住小瑤，問佢做咩事。
小瑤遲疑了一下，然後說道：「我只係睇唔落去，我覺得佢哋好慘，要困係一個咁細嘅地方生存，明明前面個大海先係佢哋嘅家。」
「小瑤，我明你唔開心啲乜，但其實我哋個世界好複雜，就算要解釋都唔係一時三刻可以解釋得清楚。」
「咁既然你唔想睇海豚，我哋就唔好去睇啦，我哋去玩其他啦！玩……玩…海盜船！」
我拉住佢隻手，但拉唔郁，然後再拉幾拉，「行啦，去玩下先啦，一場嚟到。」
然後小瑤就成功俾我拉走咗。
因為陪住小瑤，令我唔記得覆呀紫。
去到海盜船前面，我自己都淆淆地，驚暈，但我都頂硬上。
「嗱！玩海盜船一定要最後先好玩嘅！」
估唔到我會淆底到呃小瑤，但見到佢如此雀躍嘅表情，我又唔捨得潑佢冷水。
「你係咪真係好想玩啲機動遊戲啊？」我拉住佢去咗玩旋轉觀光塔，見佢熱情減退咗唔少。
「唔係啊！」小瑤真係一個咩表情都放曬係臉度嘅人，就連我都睇得出佢強顏歡笑緊。
「我只不過係咩都想試下姐，但我知道你唔係咁鐘意玩機動遊戲啊嘛，只要係同你嚟，有無玩機動遊戲都唔係咁重要。」係高處望落去，我察覺到小瑤嘅眼神只停留係機動遊戲度。
「跟住落嚟去邊啊？」小瑤臉上面嘅笑容好似少咗咁。
「決定帶你去玩盡所有機動遊戲！」
「下？點解嘅？」佢問完喱句之後，好快就明白點解。
「唔要啊，我唔想你勉強自己。」
我解釋道：「你咪又係成日勉強自己，今次輪到我唔得咩？」
「可能天使成日都要滿足人哋嘅願望，今日就等我嚟滿足返你喱個天使啦好無？」
小瑤無再講啲咩，佢嘅笑容好似識講嘢咁，有聲嘅。
然後我帶佢玩越礦飛車，連後面新開嘅機動遊戲都玩埋，瘋狂咗一日，玩到小瑤紅都臉曬。
今日同小瑤嘅感覺好close，係開心嘅，但我都係分唔清對佢嘅感覺。唔知有幾多人明呢，就好似份感覺俾人硬生生拆開咗幾份咁，小瑤一時又似細妹咁，要我照顧；一時又好似情侶般快樂；而自己仲對呀紫有遐想。
先唔好話要追要表白，我連自己啲感覺都唔清唔楚，點好姐。
依家只能夠好好享受當下吧。
小瑤玩到爽曬，汗流浹背咁，本來有點微涼嘅天氣，都俾佢玩到好像夏天咁。
「嗱，應承咗你陪你嚟海洋公園啦，開唔開心先？」我問小瑤。
「梗係開心啦，係最最最最開心嘅一日！我永遠都會記住㗎。」
見到佢滿足嘅樣，本來仲想問佢真心咩，依家嚟睇唔洗添啦。
返到屋企，佢攰到沖完涼就瞓，連飯都無食。
我入房終於睇手機，發現呀紫又再send咗兩個WhatsApp過嚟，問我傷勢點樣，又問點做咩唔覆佢，睇得出佢緊張我，隔咗幾個鐘就send一次，頓時內疚感超重。
嗰陣時睇完msg都唔記得覆返佢添！搞到佢擔心咗咁耐。
我覆返呀紫，呀紫即刻on咗whatsapp，令我感到一陣驚喜。
呀紫：咁耐先覆我！（嬲嬲emoji）
我出返嚟坐係沙發上覆呀紫。
「同邊個whatsapp得咁開心啊？」我俾把聲嚇親，一睇，原來係小瑤。
「乜你唔係瞓咗啦咩？」我下意識地收起部手機。
「原來係呀紫⋯⋯」本來佢好開心咁走過嚟嘅笑容，頓時消失不見。
「做咩收收埋埋喎？」我見小瑤講完喱句之後，隔咗幾秒先牽起個笑容。
「無⋯無⋯無啊⋯⋯」唔知點解，我有莫名嘅心虛感，「關你咩事姐！」
「你頭先唔係好攰嘅咩？」我嘗試兜第二個話題。
「我發惡夢啊，個夢係高處跌落嚟咁，可能係今日玩太勁掛，跟住我就瞓唔返⋯⋯」
「你洗唔洗飲下牛奶等自己好瞓啲啊？」我問道，但我只好關上手機，停低同呀紫嘅whastapp。
但其實我個心已經一早飄去同呀紫whatsapp度，我根本抽離唔到。
「唔啦。」小瑤搖搖頭。
「你⋯可唔可以陪我瞓啊？」小瑤可憐兮兮地望住我，然後坐上沙發。
「下？」我愕然。
「我瞓唔著⋯⋯」佢個表情，幾⋯幾可愛。
「好。」我承認，我有一刻諗歪曬。
小瑤露出一個燦爛嘅笑容，唔知點解，望落去有股傷心嘅味道。
入到房之後，小瑤瞓低之後，我坐係床邊，諗住跟住瞓埋落去。
「做咩啊你？」小瑤驚訝地望住我。
「下？又⋯⋯又係你話要我陪你瞓嘅？」我腦海盡是疑惑。
「噗」小瑤笑出聲。
「哈哈哈哈！」
「我係想叫你係床邊，俾我拖住你瞓姐。」
我塊臉當堂紅曬，我誤會曬。
「邊個叫你講啲唔講啲姐！我點知喎！」我即刻坐返起身。
「你想瞓落嚟都得嘅，哈哈哈！」小瑤都仲笑緊。
「唔洗啦！」我都跟住笑道。
我坐係床邊，小瑤撓住我手臂瞓，佢就算無食飯，都沖咗涼先瞓，可能係沖咗涼嘅關係，小瑤散發住一股香氣。
好似女仔身上都會有種獨特嘅氣味咁。
「晨⋯⋯我想玩喱個啊⋯⋯」小瑤好快就瞓著，然後講夢話。
小瑤發住夢都係度笑，但喱個笑容先好似係發自內心咁。
我見佢瞓得咁沈，我都開返whatsapp覆返呀紫。