《有一晚，我喺學校操場遇到跌落凡間的天使》: 【8】
等其他人返曬嚟無耐，我哋都差唔多要準備啦，所以啱啱好等到小瑤返嚟。
佢嚟到嘅時候，我咁啱要去拎釘鞋。社入面可以借釘鞋，跑完還就得啦，但係有時啲釘唔齊全，就算齊全都唔一定有自己碼，所以一係靠運，一係換釘。
我就唔好彩，要換釘，搵到嗰嘅釘都要時間，所以最好早啲搵，如果唔係釘都無。
係我準備去搵釘嘅時候，小瑤就食完飯返嚟。
「Kero，要比賽啦？」小瑤見我諗住出去，於是問道。
「未啊，我去拎釘鞋，一陣要返嚟著鞋。」然後就匆匆去搵釘鞋。
搵完之後就已經第一次召集啦，我返到去急急忙忙著好鞋，小瑤係隔離緊張地道：「你加油啊！一陣用盡全力啊。」
「知道啦，你喱啲說話我頭先都有同你講啊，我會唔知咩？」我淺淺一笑。
「咁……咁人哋真係想幫你打氣啊嘛。」小瑤好是著緊，我感覺得出。
「知啦，我會俾心機㗎啦。」我摸摸小瑤個頭，好似呀哥摸細妹個頭一樣感覺。
然後我就急急腳咁走，因為真係趕時間。
誰不知小瑤係我身後嗌道：「Kero！加油啊！」
瞬間瘀曬皮。
好似係度叫緊外星人咁，仲要係叫隻傻瓜外星人。果不其然，周遭嘅人望實我，有啲仲帶點笑聲。
「知啦。」我尷尬回完之後，就走了。
我知小瑤係關心我姐，但真係好柒啊媽咪……
去到召集處，肥蔥佢哋已經準備好曬，但肥蔥就粒聲唔出咁坐係度，神色崩緊，唔洗問都知佢淆緊底啦。
「點啊？準備好跑社際接力未啊？」我串道。
「下……？咩啊？」肥蔥依家先識得反應過嚟。
「話你淆底啊！」
「咁真係緊張啊嘛。」
「第一次難免會緊張啲，放鬆啲啦處男。」
「你第一次唔緊張嘅？」
「你打個飛機咪唔緊張囉。」
「唉，你唔明㗎啦，你都唔記得咗第一次嘅緊張感啦。」肥蔥出奇地一語中的，初初我玩短跑嗰陣我都會緊張，但已經好耐以前，所以依家係肥蔥面前，我可以好輕鬆咁叫佢唔好緊張啦，慢慢就慣㗎啦，其實都無理過肥蔥感受。
「係，你依家緊張無問題，但你落去到場嗰一刻，你要十分專注，投入。」我認真地說。
「你放心啦，後面交俾我哋就得㗎啦！」
「知啦。」肥蔥口講話知姐，但最後咪又係繼續緊張，算啦，慢慢佢就慣，諗通就得㗎啦。
我哋落到場之後，就各自各去唔同嘅線，所以我都唔知肥蔥佢點，希望佢無問題啦。
我望住隔離同我一樣跑最後一棒嘅同學仔，個個都胸有成竹，雙眼炯炯有神，唔洗同人講都知佢好有自信。
比賽前，鬥嘅係氣勢。
我都扮個不可一世嘅樣出嚟，嚇一嚇佢哋。
原地拉下筋，跑幾野，show出自己有幾咁專業！
係遠處，見到第一棒嘅人已經開始蹲低，準備緊起跑。
我哋都聚精會神咁留意住比賽，企返係自己個位度。
唔洗好耐，就聽到比賽嘅槍聲，一下子就進入緊湊嘅氣氛，我都俾喱種急促嘅節奏搞到有些少緊張。
第一棒、第二棒……
好快就去到第三棒，我哋係第二線道，第三棒入彎嘅時候我哋佔有優勢。喺不遠處，我見到我哋班嘅女仔，算係爬緊頭，不過好快俾第一線嘅人追上，內彎要過人比較快，所以真係無法子。
一瞬間佢已經跑到接棒區，我都準備好接棒。
我開始起跑，因為佢係女仔，所以我都盡量就返佢速度。無意外，順利接到棒之後，就起勢咁向前衝。
我一跑嘅時候，前面得第一線嘅男仔，而旁邊係無人，姐係我哋依家係第二名。前面第一嘅男仔距離我不遠，我只顧著用自己全力去接近佢。
當你接近佢之後，就可以超越佢。
慢慢地，我拉近咗同佢嘅隔離，咁樣追逐拉扯下，好快就已經臨近終點。
正當我諗住用盡力，向前壓嘅時候，突然一下子失平衡，成個人向前仆。
但咁樣仆唔係向前碌，而係成個人向前滑，地面仲要係凹凸不平嘅，痛楚直接傳入我大腦入面。
我見到已經有一個人爬咗我頭，我第一時間嘅反應就係起身跑埋落去，根本顧唔到身上嘅傷勢。
現實中，根本無咁多時間俾你諗要做啲咩，一係就繼續趴係度，直接俾人爬曬頭，一係就盡埋最後一分力。
基本上遇到喱啲情況都係靠臨時反應、下意識去做嘢。
唔似得啲動漫，姐係有套講籃球嘅，每一步都可以思前想後，諗好多嘢。係分秒必爭嘅運動入面，第一反應尤其重要。
本來諗住可以搏返個第一返嚟，點知依家得返個第三。
我一衝線之後，肥蔥先啱啱喺第二棒區行返嚟，佢見到我手臂上面滿是傷痕，即刻走過嚟。
「喂，你搞咩啊？」肥蔥緊張地問。
我笑笑口道：「無嘢啊，咪仆街囉。」
「仆街啦，你個仆街仆街啦。」
喱啲粗口嘢，當然係細細聲，同埋無乜人嘅地方講啦。
「頂！」我俾佢喱句整到我笑咗，嗰一下係令我短暫地忘記傷痛嘅。
肥蔥都好識做，識得扶下我。
我哋慢慢行返入觀眾席嗰邊，呀紫同小瑤即刻衝過嚟，緊張地問道：「你點啊？」
「Kero，你有無事啊？」
「小事姐。」我裝作堅強，就算痛到仆街，都唔想佢哋擔心。
「你流曬血都話無事？」呀紫見到我手臂上嘅傷口流好多血。
我頭先有睇一睇個傷口，成個傷口白曬，但無出血，點知依家過一排，啲血就係咁流，依家手臂好似瀑布一樣。
「哇……」小男見狀，驚訝到叫咗出嚟，「快啲去醫療室啦。」
「傻嘅咩，喱度運動場邊有醫療室姐？」肥蔥又串小男，佢真抵打。
呀紫因為小男嘅提醒，即刻醒起：「喱度都有救傷隊，快啲去救傷隊嗰邊！」
佢哋幾個即刻帶咗我過去，我強忍痛楚，任由醫療隊嘅人幫我包扎，而佢哋就係一旁緊張兮兮咁望住我。
後來知道我無咩事之後，就無再點理我，掛住係度傾偈，班友仔真係呢。
我包扎好之後，就同小瑤返去黃社，沿路上佢神色嚴峻，同平時活潑嘅佢成反比。
但我已經無咩力氣再去問佢咩事，等我返去坐下抖陣先啦。
我原以為返到去之後，小瑤會好啲，會關心下我啦，點知越嚟越惡……
「小瑤，可唔可以幫我拎支水過嚟？」我隻手好痛，郁一下好吃力。
「自己拎啦！」佢一副嬲嬲爆嘅樣，我都唔知幾時得罪咗佢。
「哦！」我有啲頂唔順，無啦啦發咩神經，所以我都好悔氣咁同小瑤講。
我強忍住手邊嘅痛楚，慢慢伸隻手去書包度拎支水出嚟。
小瑤見狀，即刻幫我拎支水出嚟，然後自己霸住唔俾我。
「喂……」我低吼一聲。
小瑤由我語氣中聽得出嬲嘅感覺，於是乎佢都坦白。
「邊個叫你唔好好地照顧自己身體，你知唔知你整親之後我幾擔心啊？」
「你知唔知我頭先幾驚啊……」
「我咁大個人都未層咁驚過……」
小瑤講著講著，雙眼開始紅起上嚟，眼淚係佢眼睛周邊打轉緊，嘴唇時而緊閉，委屈全都藏喺心裡面。
小瑤嘅溫柔當堂令我心都軟埋，頭先發兇都全部吞曬落肚。
「仲要咁兇對我……」佢講完喱句之後，淚水終於忍唔住，順住佢臉龐一路滑落嚟。
「好啦，對唔住……係我唔好。」我盡是內疚，但唔知講咩好，我亦都唔識點樣安慰女仔，最怕就係見到女仔喊啦，嗰一刻覺得自己好衰。
竟然搞到咁善良嘅小瑤喊，整喊天使會遭天譴㗎。
「我都唔想整親㗎嘛，邊個想整親自己姐。」
「我唔理啊！」小瑤喊完之後又嬲嬲爆咁。
我睇到出曬神……小瑤咁樣真係好可愛。
我諗，小瑤唔單單係樣貌可愛咁簡單，而係成個性格都好可愛，好討喜。
「罰你無得飲水。」佢講完之後，我先醒過嚟。
「下……？我依家好口渴啊。」