《有一晚，我喺學校操場遇到跌落凡間的天使》: 【7】
「哦。」小瑤呆呆地應我，手忙腳亂咁除咗自己件外套。
小瑤除衫嗰下露出佢天使般白哲的皮膚，個一下動作十分迷人，坐係後面嘅男仔無一個嘅目光唔係放係小瑤身上，眼神全是色迷迷的。
我即刻細細聲叫小男，「喂，叫小瑤著返件嬲先啦，成班男仔望住。」
「小瑤，著返件嬲先啦，依家凍啊，唔好臨出賽病啦。」小男都識執生，胡亂作個藉口。
平時係屋企都唔覺小瑤咁有魅力，我真係呢……諗乜啊！？
「好啦。」小瑤唔為意，一副憂心忡忡嘅模樣。
我帶小瑤往高處走，下面成堆人係度熱身，上嚟無咁逼，但最好唔好俾人捉到囉。
「哇，喱度望落成個運動場好大好靚啊。」
「仲有好多好靚嘅嘢你未睇過添。」
「有你陪住我咪得囉。」
「下？你講咩話？」我搞唔清楚佢頭先嗰句係咩意思。
「我話有你陪我就咩都好。」小瑤天真爛漫地笑。
「咩意思啊？」
「咪就係咁嘅意思囉。」小瑤依舊維持住佢嘅笑容，意味深長地說道。
好快，佢就轉咗第個話題，問道：「咁依家要點熱身啊？」
接落嚟我就簡單咁教小瑤點樣熱身，其實佢唔需要搵我教佢熱身，佢求其搵個人都教到佢。
儘管心裡面有疑惑，但一時三刻你係唔會知道答案，甚至以後都唔會知道。
我見住小瑤笨手笨腳咁，搞到我都好擔心佢一陣跑八百米點算。
我叫佢舉高隻右腳，佢就舉高隻左腳；叫佢打開隻腳，雙手垂直擺，慢慢壓落去拉筋，佢就成個人趴落地下。
好不容易先糾正返佢，淨返些少時間可以拉筋。我叫佢原地跑下，等自己熱下，容易進入狀態。
然後我係一旁睇佢嘅姿勢，好似啲小學細路女咁，雙手拳頭握到實一實，兩頰因為做運動熱，而導致紅起上嚟，紅卜卜咁。
本來皮膚已經好白嘅佢，臉上一紅就更覺明顯。
好可愛。
小瑤同呀紫唔一樣。小瑤俾人感覺更親人；而呀紫嘅感覺就比較高冷。
「女子甲組八百米第一次召集。」廣播好大聲咁播出嚟。
我立即同小瑤講：「開始咗啦，第一次召集。」
「下？」小瑤一頭霧水。
「姐係你差唔多要去集合啦，就快比賽啦。」
「你一陣要俾心機啊！盡力就得㗎啦。」我送到佢去召集處，然後提提佢，怕佢會落場後緊張起嚟。
「知啦Kero。」小瑤輕鬆笑起上嚟，頭先嘅緊張感好似一掃而空咁。
小瑤緊握拳頭，深呼吸，然後向住召集區前進。
人仔細細嘅佢，此刻俾我嘅感覺卻好高大威猛。
反到去我並唔係第一時返黃社，而係搵捷徑去其他社，第一個經過嘅就係紅
社。
正當我想叫齊其他人一齊幫小瑤打氣嘅時候，我自然想搵咗呀紫先，但喺我走入紅社嘅時候，我見到呀紫好開心咁同其他紅社嘅男仔傾偈。
我認得嗰個男仔，確實係幾男神，每次社際接力佢都有份跑，而且仲要高我哋一from，師兄嚟。
又係嘅，呀紫咁靚女，無人想溝先奇啦，爭住做佢隻兵添啦。
本來心情好雀躍，急步走過嚟嘅我，都緩緩放慢腳步，心入面五味陳雜。
醋意？酸？唔知點好？真係各有千秋，打曬結。
一步一步行過去嘅時候，我都好希望呀紫有注意到我，但並沒有。
證明佢哋都傾得幾開心，幾投契啊。
我幾乎行到佢哋正前面，先識得木納地舉起隻手，禮貌地說：「嗨！」
呀紫依家先見到我，露出驚訝嘅表情，但都擋唔到佢頭先開心嘅笑容。
「做咩事過嚟嘅？你唔係黃社嘅咩？」
「無……一陣小瑤佢跑800米，諗住叫埋你哋一齊去幫小瑤加油打氣咋嘛。」
「小瑤有參加啊？」呀紫比頭先見到我更加驚訝。
「有啊，乜佢無同你講咩？」我以為其他人都知添。
「佢好似都無同我哋講。」
「我都係今日返學先知嘅……」
「好啦，我哋一陣去幫佢加油。」我哋無視咗個師兄，搞到佢好尷尬咁企係度，唔理嚕，我理得佢啊。
「唔好意思啊，我一陣要幫個朋友加油，我要走先啦，我哋下次再傾過啊。」
「咁好啦，下次再傾。」師兄臨走前仲望下我，雖然唔明佢個眼神係咩意思，但唔方好得去邊啦。
「依家點啊？」呀紫問道。
「去搵埋其他人，搵個靚位囉。」
我叫埋其他人之後，係臨近終點嗰個位等候小瑤。
「小瑤又會咁大膽參加都有嘅？」小男為此感到不可思義。
「又唔叫埋我！」小男原來係嬲喱樣啊？
「叫埋你佢咪會輸囉，哈哈！」肥蔥串到應一應，最後當然免不到皮肉之苦。
「你咩意思啊死人蔥！」
「哈哈！」我同呀紫都俾佢哋逗笑。
「你哋覺得小瑤會跑第幾啊嗱？」呀紫問道，喱個問題實在唔好答。
「開賭開賭！」我拎定個銀包出嚟。
「我買20蚊，第四！」肥蔥好快就和應我。
「喂啊，你哋好衰啊，拎自己個fd嚟玩。」小男睇唔過眼。
「講笑咋嘛，我哋邊似啲咁嘅人姐。」肥蔥即刻變死狗。
「我買50第一！」小男怒吼一聲，嚇親旁邊嘅人。
「咁先係fd㗎嘛。」
「屌！」我同肥蔥異口同聲地說。
終於等到小瑤出場，佢傻更更咁跟住大隊行，個樣真係好好笑，其他人見到都跟住笑。
「小瑤係咪緊張得制啊？」呀紫睇得出。
「睇怕係啦。」
小瑤漸漸靠近我哋喱邊，我哋絲毫唔理會旁人嘅目光，係度大呼小叫：「小瑤！小瑤！小瑤！」
小瑤終於注意到我哋，朝我哋露出一記幸福嘅笑容，簡單嚟講，姐係傻瓜笑容。
「加油啊！」
我哋係咁叫小瑤靠過嚟，小瑤走在人群旁，半邊臉龐係怕醜仔，另一半邊臉龐係開心仔。
「唔好咁緊張啊，放鬆啲啦，你得㗎！」小男不停地鼓勵著小瑤。
呀紫亦是如此，鼓勵著小瑤：「我相信你得㗎，俾心機啊。」
「小瑤佢會唔會出術㗎？」肥蔥問咗一條我問過嘅問題。
「啪」一聲，好明顯喱下係邊個打嘅，然後理直氣壯地道：「小瑤佢先唔會囉！」
「小瑤都講過佢唔會啊。」我幫忙回答。
「哈哈！我一早知佢唔會係啲咁嘅人，頭先都係想測下你哋對小瑤嘅友情咋嘛！」肥蔥無嘢叻，最叻就係狡辯。
「吹啊你。」
無幾耐，佢哋就已經各就位，係運動場嘅大屏幕上，清楚地見到小瑤嘅名，佢係第六線道。
「喂喂！小瑤啊。」肥蔥指著屏幕。
「開始啦開始啦。」
「唔知點解，睇小瑤比賽，仲緊張過自己參賽。」小男道。
「我都覺啊喂，睇人哋係特別緊張。」我贊同。
我都未講完，就已經聽到槍聲，係遠處見到參賽嘅人起跑咗，不過因為遠得制，睇唔到小瑤係邊。
不過我哋嘅視線都無離開過人群，而且本來好多嘢講嘅我哋，都無一個人再出聲，個個都好安靜咁專注睇比賽。
好快，人群由對面岸跑到過嚟喱邊，旁邊嘅呼叫開始大，我哋見到小瑤係中間，同第一名有啲距離。
「加油啊！俾心機啊！加油！」小男唔理儀態，一邊嗌一邊跳起身，見佢仲緊張過小瑤。
我哋都一齊嗌：「小瑤加油小瑤加油！」
小瑤都有望過嚟，淨係一個圈都跑到佢出曬汗，氣喘喘咁。
不過佢見到我哋之後，係快咗嗰一陣，然後係轉彎位又慢落嚟。
喱一個圈比上個圈更加慢長，我哋等到頸都長，終於都俾我哋等到。
排名上，小瑤都係同之前一樣，今次我哋嗌得更加落力。
但隔離全部都係其他社係度嗌口號打氣，將我哋嘅聲全部蓋曬落嚟。
我哋用盡全力幫小瑤加油，就連呀紫都用盡全力，我又點可以唔做呢？
呀紫嗌到頸以上部位都紅曬，可見佢真係好用力，聲音全部都係尖嘅，小瑤咬咬牙，開始發力，由第六名慢慢開始接近第五名。
小男佢哋見狀，嗌得更加落力，加油聲此起彼落，比小瑤更加激動。
「啊！啊！」後來尖叫聲代替咗加油聲。
小瑤係最後六十米過埋唔係差好遠嘅第五名，與第四名並排。
可惜嘅係，臨尾俾第四名爬返頭，最後只係得第五名。
不過佢已經好努力，我哋全部都好興奮咁去終點嗰邊等小瑤。
小瑤佢已經無乜力，額頭上面出曬汗，臉色好紅，行步路都好似無咩力咁。
我哋帶佢去隔離坐下抖下先。
「你好叻㗎啦，後面差啲超咗兩個人。」呀紫安慰小瑤。
「係啊，你真係好努力㗎啦。」小男跟著接落去。
我同肥蔥都無出聲，喱個時候都係交俾女仔好，我哋出聲就無咩好說話㗎啦。
小瑤無出到聲，不過有俾微笑回應。
坐咗陣，小瑤就起身，想返去。小男同呀紫都有幫手扶住小瑤，小瑤回返條氣之後，就道：「多謝你哋啊。」
「欸，講喱啲嘅咩？」
「係囉，我哋都想你贏㗎。」
最後係無人賭贏㗎，不過後來都無咗件事，當作係講下笑咁。
小瑤比賽完後，下就先到我哋班際接力，跟住落嚟就到肥蔥緊張啦。
根據流程表，我哋係食完飯第一場比賽，今年真係衰仔，放完飯返嚟無耐，未消化好就開跑。
姐係我哋唔可以食咁飽，如果唔係一陣唔舒服就大鑊。
因為我同肥蔥一陣有比賽，所以中午就無同班女食飯，我哋兩個自己搞掂。
班際接力規定一定要有一個女仔係隊伍入面，我哋班上跑得最快除咗小男之外就係呀宜啦。
所以我哋第一棒係肥蔥，第二棒係呀宇，第三棒係呀宜，最後一棒就係我。
以實力嚟講我哋應該排全級第四啦，其他班啲男仔都跑得好快，就算女仔落後少少，其他棒都可以追得返。
食完飯之後，我就四個就練下交接棒，肥蔥唔洗接，淨係跑去俾就得，對佢喱個新仔嚟講，係最易嘅任務。
因為你接棒嘅話，需要就交棒嗰個人嘅速度，最好就你最快幾跑嗰下，交棒嗰個又有咁嘅速度俾到支棒你，如果唔係出咗交接棒範圍就死啦。
所以兩個人嘅默契好緊要，通常跑到最後已經無咩力㗎啦，所以有時我都會就住就住，當一接到棒就全力向前衝。
我哋練咗一陣之後就休息，因為大致上交接都無咩問題，剩底嘅就係調整自己個心態。
我同肥蔥求其係小賣部買啲小食食完就算，然後就講起今日小男生日計劃。
「你諗住點送嘢俾小男啊？」
「我嘅意思係，如果一陣拎唔到獎，你點算啊？咩都唔送？」我估肥蔥無咁兒戲，佢實有計劃嘅。
「下？我無準備其他禮物啊。」佢嘅答覆實在令我感到驚訝，哇！你真係至意
我哋一定拎到獎？
「你對我哋咁有信心？」我已經好婉轉咁表達我內心嘅疑問。
「傻啦，我仲有報社際接力㗎嘛。」
「……」
頓時間我唔知講咩好，無語到極點，醒得嚟又好盞鬼又好無奈。
「你都得㗎啦，真係估你唔到。」
「我哋社際男仔嘅陣容咁勁，而且得四個社，只要頭三就有獎啦，你話機會係咪大啲先？」
「……」點解我咁蠢，估唔到佢仲有如此一著呢？
「你真係計好曬喎，原本拎唔到獎都會話可憐你，幫下你，但依家你都仲係拎唔到獎，我會笑柒你成世。」
「呸你個烏鴉口啊，咁話你個兄弟嘅咩？雖然個可能低，但唔代表一定拎㗎嘛，好心你就祝福下我啦，我個幸福都賭係今鋪啦。」
「好啦好啦，俾心機話唔定有兩個獎呢！一人一個，咁好未？」我受唔住肥蔥份真誠，真係為女死為女亡。
「咁就差唔多！」