《有一晚，我喺學校操場遇到跌落凡間的天使》: 【6】
「所以你唔好顧慮我哋嘅嘢咁多啦，你專心諗下你鐘唔鐘意肥蔥喱個人好過啦，你唔好俾我哋影響到。」
「如果唔係，咁樣對肥蔥都好唔公平。」
我講完之後，小男真係靜落嚟諗，於是我提提佢：「你慢慢諗下啦，返上去上堂先啦。」
「嗱！今日喱件事唔好講出去啊。」小男再三叮嚀。
「知啦，我都有嘢係你手上㗎，我哋互相保密啦。」
我哋慢慢行返上去，係途中小男問咗我一個唔知點樣答嘅問題。
「其實我覺得你講得係有道理嘅，我真係會認真諗下，但你啊……明明你識諗，但自己卻遲遲唔行動，淨係收收埋埋。」
「我都唔知……」
其實我同小男一樣，都害怕。
我同小男嘅分別係，我害怕嘅，係失敗。
到咗放學嘅時候，其他人都走得七七八八，肥蔥先行過嚟。
我哋依家係祕密練兵。
肥蔥拎住一袋裝備，成個傻仔樣咁走埋嚟，懶係有型咁係我面前講：「行未啊，等緊你啊。」
我面帶微笑，派下膠：「嗌聲師傅先。」
「師傅！」
「屌你，你又真係嗌喎。」
「師傅你咁有心，做徒弟嘅嗌聲師傅好小事姐。」肥蔥佢賣曬乖咁，又幫我按摩，係度走嚟走去，十分之滑稽。
「怕咗你，乜鬼師傅啊，我哋都要一齊練㗎，唔係淨係教你。」
「係嘅師傅！」
「屌你啦。」
我哋去最近嘅運動場，入面人唔多，方便我哋練跑。
「依家要做啲咩啊？」肥蔥咩都唔識，隨口問一句。
「梗係換衫先啦，你衫都未換跑乜呢？」
「哇，師傅講嘢真係十分精闢。」
「一齊換啦咁多爹。」
換好衫就熱身，熱身真係要做足，唔想有啲咩傷。
「跟住呢？」
「你唔好咁心急啦，要慢慢嚟㗎，我驚你心急嚇走人咋。」
肥蔥聽明之後，道：「仲有幾多時間啊？成功啊，都剩底唔多時間可以係學校拍拖啦。」
「邊有得唔急。」
「唉，我幫得幾多得幾多啦！」見肥蔥咁用心份上，我都盡力啦。
我哋熱完身後，直接上場跑一百米。
「咁快直接跑？」睇嚟肥仔蔥仲未做好心理準備定啦。
「短跑係咁㗎啦，不停來回來回練，你咪以為咁易啦。」
「依家測下你跑幾秒先啦。」
係測緊嘅過程中，我見肥蔥跑一百米好似當跑馬拉松咁，真係唔知好嬲定好笑。
「點啊？夠唔夠快啊？」肥蔥喘曬氣咁。
「夠！點會唔夠啊？一定攞第一啊。」
「真係？」肥蔥好開心咁問，真心得嚟一啲都唔膠。
「係啊，人哋班囉。」
「屌。」
「你唔好當跑一百米係三千米咁跑啦，跑三千最緊要換氣，同埋節奏，但係跑短跑唔係啊，你要將自己所有力係喱短短路程一下爆曬出嚟。」
「下？我真係唔識喎。」
「嗱，首先第一步，你將自己兩隻手chock快啲，人係有協調性，你隻手用力chock得越快，你腳步自然會跟住郁，咁樣你都自然會跑得快。」
「跟住就呼吸方面，你唔洗專登去調自己呼吸嘅節奏，盡量都可以唔洗，我自己啦，甚至有時係閉氣玩一百米。」
「哇，係真唔係啊？」肥蔥聽到喱到之後，唔係幾相信。
「你閉氣跑完都係10幾秒到，你跑完就無啦，你死都死埋佢啦。我有試過邊個跑出嚟好啲，閉完氣個效果又真係好好多，不過都係睇人，喱樣你唔一定要跟嘅。」
「最後啦，就係起步嗰下，你最好用盡全力向前衝，就好似你就嚟仆術，但又無仆到，咁樣起步衝刺會快好多。」
「哇，好難姐，要仆街但又唔仆街咁，乜咁複雜㗎。」
「唉，你做咗第一樣先啦，最尾做唔做到就另計啦，但你過程中可以chock幾快就幾快啦，反正你依家嘅目標都係班際接力姐，我唔會要求你要做到好勁，做返普通標準就得啦，剩底嘅，都係要靠隊友。」
「咁嚟多次啦。」肥蔥嘅眼睛散發住力量，我係女實俾佢冧到。
經過幾日嚟不停咁放學去練跑，肥蔥都掌握咗好多，比之前一開頭快咗一秒。
係一百米嚟講，快一秒已經好多㗎啦。
努力，係會有成果。
喱樣喺我係肥蔥身上見到嘅嘢。
喱段日子我都好晏先返到屋企，返到屋企嘅時候，小瑤都瞓咗，我都無乜點同小瑤傾到偈，感覺同佢好似疏落咗，加上我返嚟仲要做呀紫俾我嘅練習，我已經得返半條人命。
返到學校嘅時候，小瑤都無乜嘢，但硬係覺得嗰種感覺好奇怪，但又講唔出咩嚟。
到咗陸運會當日，我約咗肥蔥一齊返學校，小瑤因為唔識去，都跟埋嚟。
「喂！緊唔緊張啊？」
「緊…啊。」肥蔥插曬褲袋，頭耷耷咁。
「小瑤！」肥蔥一下捉住小瑤隻手。
「咩啊？」小瑤俾佢嚇到驚惶失措。
「你係天使嚟嘛，你一定要幫我贏啊！」
小瑤因為肥蔥過份緊張而變得滑稽嘅樣子整到笑出嚟，笑道：「天使都唔可以犯規㗎嘛。」
「幫你就唔得啦，保佑你就無問題。」小瑤笑起上嚟有服魔力，會令到好安心，連肥蔥都可以平靜到落嚟。
「咁都好啲。」
「你都係求個安心姐，你其實唔係唔得。」我一嘢吉穿佢。
「唔理啦，有小瑤保佑萬事安心啦！」
「係喎，今年你淨係報咗班際咋咩？」
「係啊，其他差唔多年年都有玩，今年就唔玩啦。」
「係呢，小瑤你有無報啊？」明明我同小瑤住埋一齊，但我好似都唔了解佢
咁，我以為佢會主動同我講添……
「我有報800米玩下啊。」
「WOW，估唔到你有報喎小瑤。」肥蔥頭先嘅緊張感完全飛走曬，恢復返以前嘅嘻皮笑臉。
「你咩意思喎？姐係我唔報得啊？」
「哈哈，點會姐，你一陣唔好唔覺意出法術啊。」肥蔥不懷好意地笑。
小瑤閉上嘴，嘴裡谷一口氣，輕力地打在肥蔥身上。
「咁難得嘅陸運會，我點可以唔參加唔體驗下？」
「放心啦，我哋實會同你加油嘅。」我俾啲信心佢。
「咁你點啊？依家心情如何？」我關心佢道。
「咪同肥蔥一樣囉。」小瑤轉個頭同肥蔥續道：「我哋都要俾心機啊！」
「好！」佢哋兩個互相打氣。
「你有我陪你練跑，你只要平常心就得㗎啦！」我鼓勵肥蔥。
隱約中，我好似感覺到小瑤些小嘅失望。
大概，我連小瑤有報名參加陸運會都唔知，而且佢更加係初哥，我都應該陪小瑤練習一下。
一陣陣嘅內疚感由心裡面洶湧而上，無處安放。
我依家可以做嘅，就係支持佢，係佢落場前俾多啲鼓勵佢。
陸運會好似往年一樣，無咩特別，但小瑤就覺得好新鮮，見到咁大個運動場，一入場就哇哇叫。
我哋陸運會分社坐，我哋四個原本分別係四個社，我就黃社，小男就藍社，肥蔥就綠社，而呀紫就紅社嘅。
小瑤入嚟嘅時候咩都安排同我一齊，所以佢自己內定係黃社。
「你一陣落場唔好咁緊張，放鬆啲，知嗎？」
「嗯嗯，我知道㗎啦。」小瑤反應無我想像中咁緊張，表情一臉平和。
「我根本就唔在意名次，我只係想好好享受下，真實地參加喱次陸運會姐。」
平時傻頭傻腦、冒失嘅小瑤，依家竟然講啲咁熱血嘅說話，一時之間都搞到我唔知點樣接落去。
我呆了一呆，先識得俾反應，道：「哦，咁好啦，你好好地享受一下啦。」
「你記得落場前做好熱身啊。」我講完之後暗暗覺得奇怪，天使洗唔洗熱身嘅呢？身體構造好似唔同？
當我係度諗緊自己講嘢係咪有病嘅期間，小瑤細細聲咁問我：「Kero，你可唔可以教我熱身啊？」
我唔知點解佢會細聲同我講，但我俾佢突如其來嘅舉動嚇親，個心砰砰咁跳。
「哎……好啊。」我成個人亂咗套咁，連答應佢都好似亂嚟咁。
「好嘢！」小瑤滿足地笑，喱一瞬間好快就過去，但俾我記咗係心中。
我盡量唔去望小瑤，我頭先嗰一刻竟然覺得小瑤佢好可愛動人，我下意識地避開佢，更加想搞清楚係咩一回事。
我哋一路相安無事咁係度等開幕，然後盡量唔諗頭先發生嘅事，好似平時咁有講有笑，仲周不時趁人唔注意走去其他社度搵人，搵到攰啦，佢哋又會走過嚟搵我哋，一來一回咁。
日子過得開心，而快。
「喂！仲有兩項就到你啦喎。」我提提小瑤。
「啊…係啊？」小瑤仲好開心咁同小男傾偈，小男無所事事咁走過嚟R水吹。
「你去啦！加油啊！」小男不忘幫手打氣。
「依家要做啲咩啊？」小瑤唔知發生咩事，有點焦急地問道。
「熱身啊，嚟啦，依家帶你去熱身。