《有一晚，我喺學校操場遇到跌落凡間的天使》: 【5】
其實我哋上年嘅陣容都唔係話好勁，有個都係格硬揍入嚟，所以肥蔥話要跑，成功機會都幾大。
「知㗎啦，我自己會努力下㗎啦。」
「咁你想幾時練啊？」
「就聽日放學啦！唔好再揀日啦，即刻做。」
「哇！你洗唔洗急成咁啊？」
「再唔急就無時間㗎啦。」
「好！你講到咁，聽日放學就同你去！」
連我都俾肥蔥嘅熱血感染到，佢為自己嘅愛情努力緊嘅同時，我呢？努力過啲咩？
我再望望眼前呀紫留俾我嘅功課，我要將眼前可以做嘅事情做好佢。
「我做嘢先啦，我聽日放學同你去運動場練啦。」
「咁我要帶啲咩啊？」
我笑佢：「PE衫得啦，你仲想帶啲咩？」
為咗可以專心溫書做功課，我趕咗小瑤出去睇電視，而且佢都睇得好是滋味。
返到學校，我將份練習俾呀紫過目，感覺就好似柯景騰同沈佳宜咁，但我唔想要結局，我想自己把握好。
「你做得幾好喎，唔係想像中咁差姐。」呀紫好意外，臉上都是悅色。
「只要我認真，咪咁囉。」我開心唔係因為我啲成績，而係呀紫佢讚我，認同我。
「咁麻煩你要繼續認真落去啦。」呀紫同琴日嘅態度唔一樣，琴日嘅黑面我都
仲記得，但今日已經好似變返以前咁。
「係！咁今日仲有咩題目做啊？」
「未有住啊，放學俾你啦。」呀媽講嘢都無呀紫咁有用。
我轉返嚟嘅時候，小男用一種好奇怪嘅眼神望住我。
「做咩姐你。」
「你哋……啊……哈……嗯。」小男詭異地笑，個心邪到。
「噓！你細聲啲啦。」
「喂！你哋做咩姐。」
「咩做咩啊？」我怕醜地別過面，唔知點應對。
「你同呀紫囉，怪怪咁喎。」小男佢死唔斷氣咁，其實都瞞唔到咁多㗎啦，我哋咁老死，遲早都會知啦。
「你夠同肥蔥怪怪㗎啦，有咩咁出奇姐。」喱個時候最緊要拋個波俾人，又或者引走人哋個注意力。
「挑，講緊你啊，你講人哋做咩姐。」依家就換小男怕醜，仲要擰過去添。
「做咩姐？頭先係威係勢㗎，好好奇㗎喎，依家做咩姐？」小男俾我反將一軍。
小男佢咬咬唇，左顧右盼，續道：「嗱，我淨係同你講咋，你唔好講……」
小男講喱句嘅時候，專登瞄一瞄後面，傻嘅都知係指緊肥蔥啦。
「你唔好講出去啊。」
「知啦，我唔會講㗎啦，如果唔係我喱世溝唔到女。」
「咁一陣小息同我落小食部啊。」
「好啊。」
話咁快，諗下嘢，專心聽下書就已經小息啦。
我哋一落堂就走咗落去，我哋搵咗個角落，雖然只有短短嘅15分鐘，不過應該都夠嘅。
「好啦，你講咗你同肥蔥啲嘢先啦。」我提議道。
「點解係我先喎，你先唔得嘅？」平時好似男人咁豪邁嘅小男，係愛情面前，都會似返個女仔。
「好囉，邊個先有咩所謂。」我鬆鬆膊頭。
我將自己嘅事一五一十咁同小男講，包括我鐘意呀紫，同埋我要做佢啲練習啲嘢。
「你真係鐘意呀紫㗎？」小男對喱件事感到好驚訝，單純嘅佢以為我哋只係普通朋友，無乜嘢。
「係啊。」
「唔怪得你咁神秘啦。」
「我頭先以為你知道咗添。」哇，小男喱條友真係少咁幾條神經，早知佢估唔到嘅，就唔同佢講啦！
我暗暗打咗自己一下，心裡暗罵自己蠢。
「無啊，我以為你哋有咩神秘嘢瞞住我添……」小男表情明顯有啲扭擰，我忽然醒起一件好重要嘅事。
過無耐就係小男生日喎，無記錯好似就係陸運會嗰日。
原來係咁，唔怪之得肥蔥話要拎獎啦，十成十係為咗小男生日啦！
但我哋又真係無安排啲咩，因為我哋生日都聚曬係年尾同埋年頭，時間長到我哋都唔記得咗。
於是我就求其作個大話，道：「哈哈，」我假笑幾下，「有都唔會同你講啦，到時咪無曬驚喜！」
實情係咩都未諗，咩都未搞。
但小男好似好著緊喱件事，同埋唔多唔少都有啲期待咁，我都唔想佢失望嘅。
返去諗，返去諗。
「係呢，咁你呢？到你講你啲嘢啦喎。」我提提佢。
時間仲剩無幾耐，我都要把握時間問下，小息就快完啦。
「咩啊？」小男扮曬嘢，顧左右而言他。
「你再扮啊？梗係問你同肥蔥啲嘢啦。」
「我……」小男欲言又止。
「你對肥蔥係點嘅姐？」
「我唔係唔知肥蔥心意，我都知佢對我好，而且係認真嘅，但越係咁，我就越害怕。」
「你驚啲咩啊？」有人追都會驚？我不禁感到好奇。
「我聽人講，中學拍得嘅，都唔會長，我怕我哋之後有咩事，我哋段友情都會玩完。」
「嗯……」我沈思一陣。
「都係嘅，你講嘅唔係無道理。」老實講，我係認同，如果最後都係分手，好可能因為連帶關係，我哋嘅關係都會出現裂縫。
「但你諗下，如果你因為咁拒絕咗肥蔥，佢又會唔會願意同你做返朋友？我係咁覺得啦，由佢鐘意你嗰刻開始，唔多唔少都會影響到我哋之間嘅嘢。」