（校園/青春/純愛）《班上嚟咗個插班生？》: 五、兩男一女得個嬲？

今日我一如既往喺學校門口等卓緩翻學，奇怪嘅係今日等到差唔多夠鐘佢先跑到翻嚟，手上面仲攞住個紙袋。

「咦，咩嚟？」我一見到佢就望佢個紙袋入面係咩嚟，因為我地之間不嬲都冇祕密。
「唔話你知。」佢好緊張咁撳住個袋。重點係，佢淫笑呀！係淫笑呀！自從中三佢俾個靚仔師兄溝完之後就再冇見過佢呢個笑容喇。不過大家應該都估到，個師兄係厹，所以最尾就冇最尾喇。
「神神祕祕咁。」我都冇再探究落去，佢唔想俾我知實有佢嘅原因。

翻到上班房之後，只見Andrew好認真咁望住佢枱上面嘅一堆英文，完全察覺唔到我翻咗嚟。於是我靜靜雞行去佢身後。

「嘩！」我勁大聲喺佢耳邊嗌，跟手仲大大力拍佢膊頭。
「嘩屌」呢個反應亦都係我預料之中。




「你個衰妹，等我吱死你。」於是佢單手箍住我條頸，另一隻手就瘋狂吱我條腰。唔好奇怪點解班上其他同學唔出聲起閧，因為我地舊年咁樣玩咗成年，佢地都習慣哂。

呢個時候，lokman翻咗嚟企喺門口，見到呢個情境嘅佢呆咗咁望住我地，然後見到我發現咗佢，佢就扮冇嘢咁行翻位。之後就到早讀時間，所以我同Andrew都冇再玩。

「早晨」我坐翻埋位同身旁嘅lokman講。
「嗯。」佢繼續睇緊佢手上嘅書，我望一望書名。
「咦，學界蘭桂坊？識嘢喎，我都有睇喎！」我雀躍咁講。
「哦，係咩」一盤冷水淋埋嚟。

之後到小息，我地三個本來約好咗留喺班房傾埋project淨低嘅部份，Andrew都特登搬埋凳過嚟我地呢邊。點知...





「你地傾哂佢咪得囉，你地咁friend。」lokman企起身打算走。
「喂，你咁算點呀？約好咗一齊傾㗎喎，又係你自己話要同我地一組。」andrew忍唔住發火。
Lokman望一望我地就行咗出班房。
「喂，佢做乜鳩呀」Andrew火藥味好重。
「我鬼知咩」「呢個人真係好難捉摸」我心諗。

唉，果然，兩男一女得個嬲。

之後到lokman翻咗嚟，我地都keep住全日冇講嘢。直到臨放學，我地全級人要留低做paper，佢先開口同我講第一句嘢。





「等陣係咪喺hall做paper？」
「唔你呀，今日羽毛球隊book咗hall練波，改咗喺課室做。」
「哦，唔該」
然後又回復翻deadair。

兩個鐘之後，終於做完paper，大部份同學都執嘢走咗，而且嗰陣都已經6點，所以學校裡面都冇乜人，得翻少部份嘅同學喺操場打緊籃球，當中亦包括andrew。咁啱今日卓緩同我講佢有嘢要同老師傾陪唔到我放學，所以我就打算等埋同我住埋同一個屋苑嘅andrew一齊走，順便趁呢段時間睇埋我未睇哂嘅《自修室，學界嘅蘭桂坊》。係喎，唔記得講，andrew係運動健將，亦係今年籃球隊隊長。

當我睇到尾聲，沉醉喺故事入面之際，一把聲將我拉翻現實。

「咩料呀你？打波定打人呀？」呢個咪lokman把聲？我望翻上籃球場，只見背住我嘅lokman瞓咗喺地下，隻手擦損咗。
「打波係咁㗎啦，唔憤氣呀？」
Lokman冇再出聲，企翻起身就攞埋書包走，我見狀就跟住跑出去。

「喂，你隻手有冇事呀，俾我睇吓？」




「唔關你事呀，你去搵翻你條仔啦」然後轉身行出校門，淨低我一個企喺原地。

我越諗越唔順氣，就翻轉頭攞埋書包衝出去。嘅到去學校附近嘅車站，就見到佢喺到等緊車，於是我行埋去。

「程樂汶，我唔理你點解要用咁嘅態度對我，我亦都唔想知你對我甚至對andrew有咩不滿，但係我必需要強調一樣嘢。Andrew唔、係、我、男、朋、友。你要嬲就繼續嬲，畢竟呢啲係你地兩個之間嘅事，我唔需要、亦都唔想介入！」之後我喺袋入面攞咗塊膠布出嚟塞咗俾佢，冇理佢咩反應，就擰轉面打算走，點知見到andrew就企咗喺我後面。「走喇。」我一路講一路拉住andrew走。

「真係火都嚟，都唔知我做錯啲乜！關心吓佢又喺到發我脾氣，平時啲性格古古怪怪都算啦，仲喺到喝我，話你係我男朋友，係人都知我地係巴打嚟㗎啦，真係痴哂線。」我一邊行一邊同andrew埋怨，而佢都冇出過聲。