（校園/青春/純愛）《班上嚟咗個插班生？》: 四、三個人

時間一日一日咁樣過去，我同lokman亦因爲同桌嘅關係而漸漸熟絡，熟絡嘅意思係我地之間唔會再需要勉強搵話題，但又未去到無所不談、暢所欲言嘅地步，而我亦唔打算再有啲咩進一步嘅發展，因為始終卓緩好似對佢有啲好感，而且我覺得佢忽冷忽熱，好古怪，做朋友或者同學就可以，但係做情人？不了。

「喂，啱先miss chan講嗰份project要搵groupmate，你同唔同我一組？」lokman落堂後問我。
「我同你？」我不禁嘩然。
「我喺呢班得你一個friend咋，你唔同我一組我唔知搵邊個呀」佢用哀求嘅語氣求我。
「都得嘅，不過頭先Andrew問起我，我都應承咗同佢一組，一係我地三個人一組囉，橫掂miss chan都話2-3人一組，同埋Andrew英文好好㗎，我地可以輕鬆free ride。」
「咁好咩？我同佢唔識㗎喎」
「我同你一開頭都唔識㗎啦，你咪當識多個朋友囉」我努力游說佢。
「咁...好啦」
「yeah」言語間我好似聽到佢細細聲講咗啲嘢，不過算啦應該都無關痛癢。





之後我行過去Andrew個位，Andrew一見到我就搭哂膊頭咁問我咩事，我同佢講咗分組嘅事，佢望一望lokman，再笑住同我講「冇問題，你話點就點啦」。唔知點解，我硬係覺得頭先andrew望lokman嘅眼神有啲敵意。

之後我同卓緩講咗聲之後就約埋lokman、Andrew放學一齊去學校canteen傾project，呢次好似係第一次得我地三個人單獨相處，氣氛真係有啲尷尬。「唔係又要我開口搵話題呀？」我心諗。

「係呢，我叫Andrew，你應該聽過幽靈講過我㗎啦」
「hi，我叫lokman」
「好啦咁我地開始傾啦，首先......」

三個鐘後。





「終於都傾完個project大綱同細分項目喇，好彩有你咋andrew，如果唔係都唔知要查幾多次google先搞得掂。」我伏喺枱上面講。
「客咩氣吖，不嬲都係我carry你㗎啦」佢用手搓我啲頭髮。
「傾完嘅話我走先喇。」lokman拋低一句說話就施施然走咗。
「又係咁。」我望住佢嘅身影，心入面諗。
「望咩呀，追埋出去吖笨」
「癡線。喂，7點幾喇喎，食唔食飯？我肚餓」
「好呀，薩莉亞好冇？」「好呀！我要食雞肉多莉亞」

之後我同andrew執埋啲嘢就離開學校去咗食飯。沿途佢問咗我好多lokman嘅嘢，但我答案一律都係「唔知呀」、「點知啫」。直到佢問咗我一個問題。




「你地會唔會日久生情㗎？」
「唔會....掛，佢要揀都揀卓緩先啦」我遲疑咗兩秒。
「咁又係，雖然你都幾嗒得杯落...」佢停低腳步，將面靠近望住我。
「不過比起sammi，你都仲差兩條街」佢笑一笑，故意加快腳步行。
「超。」