（校園/青春/純愛）《班上嚟咗個插班生？》: 六、男人都鍾意靚女？

到夜晚臨瞓前，電話突然響起，手機螢幕顯示嘅係一個陌生嘅號碼。
「喂」
「喂？冼佑玲？」係lokman把聲。
「點解你有我電話㗎」
「班group有嘛」
「哦，咁有咩事？講完我要瞓」
「er..今日嘅事...對唔住..」
「有咩事聽日翻到學校面對面講，早抖」然後我就收咗線，再將呢個電話號碼加入電話通訊錄— Lokman。呢一晚，唔知點解會有啲輾轉反側嘅感覺。

翌日朝早，卓緩一邊行過嚟，一邊喺到摷佢自己書包。




「喂你搵咩呀」
「搵緊部死人電話呀，玩失蹤呀佢，你試吓用你部機打俾我睇，睇吓佢塞咗去邊」
「哦」跟住我就攞部電話出黎，可能琴晚到今朝呢段時間都冇人打過嚟，所以電話就停留咗喺通話紀錄呢一頁，顯示住

Lokman
昨日
下午11:39 來電 46秒

我不以為然，繼續打去卓緩電話，然後就發覺電話攝咗喺佢書包底。
「咦，乜你…同lokman有傾電話㗎？」卓緩問。




「唉，唔好提喇。」然後就繼續行翻學校。

翻到學校，頭兩堂係pe堂，所以我都暫時唔洗對住lokman，而係同啲女同學打羽毛球。lokman就喺隔離場打籃球，我望一望佢隻手，見到佢癡咗我尋日俾佢嘅minions膠布，心入面暗暗地偷笑咗一吓。點知佢突然擰咗過嚟，我地對望咗一吓，佢好似發現咗我偷望佢，然後露出佢嘅招牌笑容就繼續打籃球。

我突然覺得我個心跳得好快、塊面有啲㷫。
「冇嘢嘅，做完運動心跳快啲、塊面熱啲都好正常姐。」我同自己講。但事實上，我冇乜點郁過。

Pe堂永遠係過得最快，話咁快又到小息。我嗱嗱臨跑上課室，諗住擺低啲嘢就同卓緩落去食嘢，點知跑到班房門口，見到有個身影鬼鬼鼠鼠喺我個位附近徘徊，但由於班房冇開燈同埋啲同學未上到嚟，所以見唔到佢個樣。於是我靜靜雞行入班房，一開燈，發現咗呢個熟悉嘅面孔。

「卓緩？」「你喺到做咩呀？」




「冇...冇呀....我電話冇電，諗住問你借尿袋咋」佢吞吞吐吐咁講。
「哦..你要尿袋咋吓嘛？！開聲問我咪得囉，嚇死我呀，仲以為有賊添呀。」
「我...我諗住自己搵快啲吖嘛..哈哈」
「好彩係我咋，如果係第二個見到，你水洗都唔清呀。好喇，我地落去喇」
「好呀」

到小息過咗，翻到班房見到lokman已經坐咗埋位，我都慢慢行翻位，坐低後就開始上堂。
「打開文言集第56頁。」然後大家都紛紛喺櫃桶摷書，當然我同lokman都唔例外。但係lokman喺櫃桶摷出嚟嘅並唔係書，而係一個壓扁咗嘅紙袋。「個紙袋...咁熟口面嘅？！」我心入面浮現咗一個名，「卓緩？」

今日我一如既往喺學校門口等卓緩翻學，奇怪嘅係今日等到差唔多夠鐘佢先跑到翻嚟，手上面仲攞住個紙袋。
「咦，咩嚟？」
「唔話你知。」
「神神祕祕咁。」

Lokman一頭霧水咁打開袋嘢，入面係一條手繩。見到呢條手繩，我更加可以肯定呢個紙袋係卓緩放喺lokman櫃桶，事關我有一條一模一樣嘅手繩，只係唔同色，係卓緩親手織俾我。





「你又話對佢冇興趣？」我開口問。
「咩呀？邊個佢？」
「唔好扮啦。啱嘅，個個男人都鍾意靚女㗎啦」
「喂我真係唔明你講咩喎」
「廢事同你講」「老師，我睇得唔係幾清楚，可唔可以坐前啲？」我舉手同老師要求今堂調位，但事實係我想冷靜吓。
「好啦，咁你坐去呢到啦」老師隨便安排我坐前排嘅一個空位。

就係咁，我同lokman嘅關係好似又惡化咗。