弊家伙，閻羅王唔見左!: (四)

(四)
「Vinci，喺度做野慣唔慣呀?」，李師傅問道。

李師傅算是這行的老行尊，所以在這新成立的祭品署暨紙紮部的地位和職位也很高。而且他跟家師有些交情，倒是很照顧我。

我勉強擠起笑容道:「做野就緊係冇問題啦，係唔係好鐘意個環境，早知當初唔簽個乜鬼協議啦。」

李師傅誤會了我的意思，道:「講起我都好後悔，以為政府咁高價賠比我，執到啦!點撚知啲陰司紙依家升到同港幣差唔多1比1、啲紙紮別墅炒到百幾萬一棟姐?今次個仆街政府又會咁撚醒嘅?!」

旁邊的老陳搭訕，道:「緊係啦，依家全世界都知燒野比先人係有料到，仲唔大炒特炒咩?我早果排都入左30部紙紮ipad，要唔要放2部比你地?見係你地，原價放又點話!」





我笑罵道:「老陳，留番比你自己用啦!李師傅，其實錢就好閑姐，以前我地做紙紮有邊個搵到幾百萬咁多呀?我心足架啦。最唔慣係朝九晚五，又要著制服，都係自己打骰舒服啲。」

李師傅拍拍我的肩頭，道:「Vinci，以你嘅手藝係度做又真係屈就左你嘅。放心啦，你一定會有出頭嘅一日!」

我自嘲道:「唓，手藝再好咪又係紙紮佬!做呢行學咩人諗出人頭地呀?」，李師傅聽罷帶著笑意離去。

如是者過了數天後，在一個悠閒的下午，我正在享受下午茶的時候，李師傅有點焦急的走過來，道:「喂，Vinci，唔好意思，今晚可能要開OT!」

我嚇差點把口裡的奶茶噴出來，道:「OT?」





我對加班倒不抗拒，反應這麼大的原因是整個祭品署可以說是冗員冗署，在這裡紮一間別墅花上一個月也很平常，加班簡直是天方夜譚。

李師傅有點失望，道:「唔方便咁由佢啦，我搵老陳啦!」

我慌忙揮手，道:「唔係!寡佬一個，放工都冇野做架啦!係呢，有咩要做?」

李師傅露出笑容，道:「哈哈，就咁……上頭想要10支左輪、5支霰彈!」

我皺著眉頭，道:「紮槍?」





李師傅戲謔道:「嘿，你搞唔掂咩?」，我搖搖頭表示沒有問題，他繼續道:「做得精細啲，盡快搞掂拎入房比我!」

我向李師傅打了一個「OK」的手勢，便開始工作了。

老實說，我不知為何竟有點興奮，可能在紙紮部太無聊了，難得有點挑戰性的工作，我趕緊打起精神來。我看看手錶，距離下班還有2個小時，我倒有信心能準時下班。

我忙了一輪，總算把工作完成，我忙把製成品拿入房交給李師傅。

李師傅看到我嚇了一跳，再望望牆上還沒到5時的鐘，有點不悅道:「你啲後生就係咁架啦，O陣T都唔肯，求其交啲野比我就趕收工!」

我笑著搖搖頭道:「李師傅，你交帶落嘅野我好上心架，你望下先啦!唔滿意嘅，我今晚留喺度幫你搞掂佢!」

李師傅以不大相信的眼神看了我一眼，拿起我親手製作的紙紮槍左看右看，看得他嘖嘖稱奇，道:「好，果然名不虛傳!設計、做工、上色、速度都冇得彈!Vinci，你聽日唔洗番工啦!」





我心裡暗罵，道:「屌，唔撚洗咁忌材吓話?」