弊家伙，閻羅王唔見左!: (五)

(五)
李師傅看到我的表情，笑道:「唔洗驚喎!有份仲好嘅工介紹你!聽日十點去旺角警署搵九叔啦!」

我愕然道:「吓?」

李師傅高興地搭著我的肩膀，道:「吓咩姐?行啦，今晚你請!第時上左位唔好唔記得李師傅呀!」

第二天的早上，我就這樣迷迷糊糊的到了旺角警署，剛踏進警署，便聽到有人叫我。

「吽……你咪紙紮鋪老闆?黎呢度做咩?」





我回頭一看，原來是一名牛頭，不過我對他沒有甚麼印象，只好道:「你係……」

牛頭咧著大嘴，熟絡地搭著我的肩，笑道:「咁快唔記得啦?我係牛五呀!」

「屌，撚記得你係牛五定牛六咩?個個牛頭都一牛樣架啦!」，當然這句說話只是在我腦海掠過，沒有說出來，否則肯定被他的鐵蹄壓個稀巴爛。

我強忍著他的牛騷味，勉強笑道:「哦!原來係牛大哥!我係黎搵九叔架!」

牛五邊強拉著我走，邊說:「咁啱啦!我都要搵九叔!」





轉眼間已到了地牢，裡面已坐滿了人和鬼，雙方就如楚河漢界般分開坐著，就像警匪片中警察開會的樣子。牛五道:「喂，你去果邊登記完先入得去坐，我入去先!」

要是牛五再不走開，我真的怕要大嘔一場了。我如釋重負的道:「喂，唔該哂!牛大哥，下次沖涼揼骨我嘅，幫你洗下陣男人味!」

辦過登記手續後，我在人堆那邊找了個座位坐下來。我稍為打量一下四周，鬼那邊都是陰差，不是牛頭馬面就是黑白無常。人那邊就甚麼人都有，有男有女，有老有嫩，有尼姑、小道童、和尚、警察……

到了九時正，一名穿著制服的中年警察步入房內，房間一時靜得有點詭異。此時，身邊的小道童以稚嫩的聲音驚呼道:「殭屍先生?!」

眾人開始議論紛紛，討論那位警察的來歷，這時我才恍然大悟。





九叔就是林九，當驅魔道長、一眉道人、毛小方的那個林九啊!

九叔望了眾人鬼一眼，緩緩說道:「歡迎咁多位加入由警務處同地府聯合組成嘅人和組!」

小道童好奇問道:「人和組?」

九叔無奈地道:「係呀，全名係共建人鬼和諧小組。嗱，唔好咁望住我，個名唔係我改嘅!」

「講番正題，人和組嘅成立目的係咩呢?簡單黎講就係維穩!近幾個月人同鬼都開始慢慢適應左呢種共存嘅生活方式，不過亦都出現左唔少衝突，甚至牽涉人同鬼嘅罪案!只要個case係同人、鬼雙方有關嘅，就會由我地人和組處理!」

經過個多小時的簡介會，我總算大概理解這份身工作，不就是當警察嘛!案件跟人有關的就由香港及澳門的一般警察處理，跟鬼有關的則由地府陰差負責，跟人和鬼都有關的就歸我們部門處理。

「好，我地個小組嘅運作大致上就係咁，有冇問題?」，九叔等了一會，大家都沒有發問，他繼續道:「咁頭先都講個我地係行孖咇嘅，一人孖一鬼，依家開始讀分組名單!」





當九叔讀完了名單後，我的名字還是沒有被叫到，只好舉手問:「九叔sir，我仲未有Partner喎!」