弊家伙，閻羅王唔見左!: (三)

(三)
第二天的早上，我帶著沉重的心情回到紙紮鋪，鐵閘已被人打開，鋪內十分喧鬧，有食環署的官員、民政事務署的官員、警察……總之是一大堆的人，我也搞不清還有甚麼部門。

有人也有鬼，有遊魂野鬼，也有牛頭馬面，經過一整晚的「訓練」，我總算不至於被嚇得暈過去。他們一見到我便一湧而上，七嘴八舌的說起來，聽得我無名火起，高聲道:「你地一個個講得唔得，呢位牛大哥你講先!」

牛頭一瞼得意的道:「呢位老闆，我係第十一殿西九分局第六小隊嘅牛五!呢幾隻鬼呢，琴晚偷偷地入黎呢間鋪，諗住偷啲紙紮品，再燒俾自己!」

此時，旁邊的警察有點著急道:「係啦，咁由於個犯係鬼，所以單Case會由陰差佢地……」

馬面打斷道:「嘶…..緊係唔係啦，受害人係陽間嘅人，緊係你班差佬跟啦!」





我已大概明白是甚麼一回事，只能夠說天下烏鴉一樣黑。我打量了鋪內一眼，似乎沒有甚麼損失，而且鋪也快要被政府收了，我也懶得麻煩了。

我堆起生意人應有的笑容道:「哦……一場誤會姐!嗱，呢隻就係舊街坊黎!仲有呢隻就我姨婆個姪個朋友黎!大家黎聚下舊姐，冇犯人亦都冇受害人!」

警察及牛頭馬面異口同聲道:「哦……咁即係冇事發生啦!」

我笑著點頭道:「係呀!麻煩哂!另外幾位有咩事呢?」

一名戴著眼鏡的民政事務署官員道:「琴晚政府宣佈左將紙紮業收編入政府體制內，由政府經營，我地係黎傾關於收鋪嘅事宜!」





我好奇地問道:「呢位先生，借問聲點解政府要咁做?我地繼續經營落去有咩問題?」

那名官員皮笑肉不笑的道:「其實政府都係為左市民著想，你頭先都見架啦，好多遊魂野鬼打紙紮品嘅主意，你都唔想日日有警察同陰差上門架!」

官果然是官，說了等於白說，我也懶得追問，只好點頭道:「得!明白!不如講番收鋪果度，點賠法先?」

那名官員老練道:「達生，個鋪位係咪你架?」，我搖搖頭表示不是，官員繼續道:「咁租客就冇得賠嘅，政府只會賠番鋪內嘅紙紮品同埋達生你停業嘅損失比你!」

我無奈地點點頭，另一位食環署的官員遞給我一張清單，道:「達生，我地點算過你鋪入面嘅貨，你對下有冇錯漏，冇問題嘅我地會跟住黎估值。」





我看了一會後道:「嗯，大致上都冇問題，政府會賠幾多?」

食環署的官員翻看資料後，道:「初步估計，達生你大概會得到270萬嘅賠償。」

我呆了半晌，心情久久不能平伏。

270萬?
所有貨以市價2倍計，也賣不到27萬，政府竟然開價270萬?

此時，民政署的官員道:「達生，由於你唔可以再經營紙紮鋪，政府會有份一筆過特別嘅50萬賠款比番你。仲有，政府依家招募緊紙紮師傅，唔知達生你有冇興趣加入政府呢?」

320萬的賠款、成為公務員，面對這麼豐厚的條件，誰可以抗拒?我二話不說的把協議簽好了。