【食勻亞洲】上天堂前要食過的五條女: 三) I am back!

「點解可以搞錯?」閻羅王一面困惑,「你今個月第二單喇喎,俾個說法黎。」
 
「Erm...係因為..係因為人間兩極嘅磁通量改變啊,請陛下恕罪!」
 
「哎算啦,捉錯人就送番上去喇!」閻羅王一臉唔耐煩。
 
即係點,即係我又唔使死?
 
「唔好意思,我啲手下做錯野。為表歉意,你可以選擇立即返去落黎地府嘅前一刻,如果你對原本嘅生活好滿意嘅話,或者可以係你之前嘅人生任何一個時刻,插番入去生活都可以,我俾十秒你揀。」
 




「我要重頭黎過!」我一秒都唔使諗,眼神好堅定咁望住閻羅王。
 
「無問題,如你所願,咁你合埋眼,係心入面默想番你想重新黎過嗰一刻就得。」
 
咁簡單?!
 
我合埋眼,閻羅王數住「三,二,一, 乾坤一開，三七氣流一轉.....」
 
我突然見到前面有一道白光,我一步一步咁靠埋去,然後我成個人穿過去。
 




到我開眼嗰時,係一個廁格, 我黎左考場個廁所。
 
我行番出去,見到有啲偽韓妹揸住YY Lam本乜鳩 <林場秘笈>係到睇, 我心諗:聆聽黎架喎,睇黎托咩。
 
哎,都係唔好理人地咁多,一陣入到考場要醒醒定定,可以改變人生嘅機會只有一次。
 
「有無學生攜帶嘅收音機聽唔到剛才播出嘅音樂,請舉手示意。」係考場入面一片靜寂,只有監考員把聲回蕩係偌大嘅禮堂之中。
 
我即刻舉手示意,表示要去特別室。周圍啲人望住我,但我自已好明白,如果我今次唔舉手話,大概我嘅人生只會重覆咁過,我一定要入大學。
 




「Diu,擾敵狗!」我隱約聽到坐我左手面著住黃黑格裇衫嘅毒撚細細聲窒我。
 
我唔理咁多,每當我諗起係M記俾條MK窒我成世炸薯條,我發誓自己唔可以聽多一次喱啲廢話,係喱個世界俾一件垃圾笑你垃圾簡直係奇恥大辱。
 
當全場嘅人用不屑嘅眼光望住我,我孑然一身咁拖住沉重嘅步伐,離開試場,行去特別室。
 
「時間到,請各位考生停筆。」交份中文聆聽卷嗰陣時,我咀角泛起一絲賤賤嘅笑容,因為我知道,今次考試大概十拿九穩。