【少甜，非甜故】為左變性，我唯有做雞。: 第四章 醉 (6)
「喂，你有無去過PP呀？」逸雋壓低聲線故作神秘地問道。
「無呀，咩係PP呀？」看到王偉明搖頭，逸雋一臉失望。
PP 是Propaganda的縮寫， 屬於香港第一代的Gay Bar。曾幾何時，香港同志圈流傳著一則趣聞，說只要問一個男人一個問題就能知道他是不是Gay佬。
你去過PP嗎？如果對方笑而不語，答案便呼之欲出。
「喂你唔好咁候擒啦，王醫生有好多女仔溝架啦。」我嘗試拉開他們卻不果。
「又唔係你條仔，咁緊張做咩啵。估唔到你係醫生咁巴閉，喂，有無諗過中途轉機先？」逸雋還是死纏不放。
「其實我就唔鍾意女人既，只係鍾意同女人做愛。」王偉明一本正經地答道。
「乜你講啲野咁難明既？唔鍾意女人又要同女人扑野？」我問。這不就像我賣淫時差不多，不喜歡男人又要跟他們魚水之歡？
「呢啲野陣間飲左酒再講啦，係啦恩兒，你記得後日黎一點鐘黎診所搵我，我開藥比你。」
「開藥？乜你有病咩『恩兒』？」逸雋看來很不滿意我跟王偉明很熟絡的樣子。
「er..唔係呀，我幫朋友拎藥咋嘛。」變性的事我沒有告訴逸雋，這些事越少人知道越好。
「哦……我地到啦，呢到就係Bar 1010。」他自豪地為我們介紹酒吧的歷史及格局。
1010，名字改得還算貼切。
「想飲咩呀？今晚唔洗同我客氣。」我少有地這般豪爽。
「啤酒先啦，一陣再飲威士忌。」王偉明答道。
「呀雋，幫我拎住半打啤酒，同埋求其執20 shots黎玩啦。」
「收到Michelle姐，好快送到。」
理性叫我不要喝太多，以免醉了亂說話，不過感性上我很想醉到不省人事。