【少甜，非甜故】為左變性，我唯有做雞。: 第二章 診 (6)
「了解。咁除左打扮之外，你仲有無做啲咩其他野？」
「我會想入男廁，但係又驚比其他人見到，有時又會唔想去女廁，仲試過差啲失禁……」我睜大眼睛說大話。
「嗯，咁你有無覺得男性比女性優秀？」
「無呀，各有不同，只不過係我唔好彩。」我嘆道。
「咁呢種強烈想成為男仔既感覺點影響到你既生活？」
「我因為怕其他人知道我係女仔而唔夠膽開口講野，連續幾份工都比啲食客話無禮貌，最後都比人炒左。好彩而家搵到份文職，唔洗講太多野。」
「好，咁我地講返『真實生活體驗』啦。」王偉明在電腦上稍作紀錄，然後從抽屜拿出一張白紙。
今天是第三次覆診，我猜他剛剛是在測試我是否真的患有「性別認同障礙」，幸好我把答案都一早背好，他對我的說法應該是堅信不疑。
第一次見面時，他曾叫我在紙上寫下描述自己的詞語，以測試我在性別認同上的矛盾。今次沒有再重施故技，代表我演得入戲。
我猜，精神科醫生，應該是最好騙的醫生。
「我諗你應該記得呢個流程。向香港公立醫院做變性手術，首先要有轉介信，然後黎呢度GID Clinic 排期，再由精神科轉介心理輔導同其他有關專科，包括內分沁科、語言治療、社工等等，一定時間後就進入『真實生活體驗過程』RLE，按需要處方『賀爾蒙替代療程』HRT，都無問題既話就可以搵外科排期做手術。我地而家係呢一個step到。」
他把流程畫出，然後把筆尖指著兩個英文字之間的箭咀。
「明白。」
「恩兒，我想聽下你講果晩點解會著返女裝，係咪進行RLE有咩困難？」
若晴按：GID為Gender Identity Disorder，RLE 為Real Life Experience， HRT 為Hormome Replacement Therapy