【少甜，非甜故】為左變性，我唯有做雞。: 第二章 診 (5)
真正的原因是甚麼其實不重要，重要的是我需要這個手術。
「其實就好似上次講既一樣囉。三年前，我開始覺得自己其實應該係個男仔。每一次望住鏡入面既自己就覺得好焦躁不安，點解我會有女人既乳房，點解我下面會係咩都無，我覺得好唔自在，好似比人困住左係個唔熟悉，而且唔熟悉既身體裡面。d人成日話鬼唔知你媽係女人，但係我覺得做人呀媽既都唔一定係女人，可能好似我咁，只係被迫先做女人。醫生，我真係好想變做男人。」我把背下來的對白都說一遍。
「嗯，所以同之前講既都大致相同。仲有無其他野你想補充？」
「暫時無啦。」
「我記得你上次話今次覆診會話我知令到你有呢個諗法既觸發點，咁你而家可唔可以話我知？」
上一次我說不想提及傷心事，所以沒有詳細解釋想變性的原因，今次為了讓王偉明相信我，我不能再隱瞞太多。
「其實就係咁，我以前曾經同過女仔拍拖，我以為自己只不過係Lesbian，而且為左吸引女仔先開始中性打扮，做TB，但分左手之後雖然好傷心，但係我同時都發現，其實我真係想做一個男仔。」我望著他一言不發，三秒後才再度開口。
「除左變性之外，無論我點樣打扮都唔會係一個真正男仔。我追女仔原來唔係因為我鍾意女仔，而係我想做一個男仔，證明自己係一個男仔。」
適當的位置要作適當的停頓，這是梅姨教我的。