[深夜重口味] 黑色蒲公英: 認唔認得我?

話說我顧住同情人 Joyce 幽會，令太太 Rebecca 失救至死，內疚下離開香港...

When can I have the report?
如果咁問佢實 hea 答。
「Abdul, please make the report ready at 11 am.」
「Yes, sir.」
仆你個街，最後又係兩點先交貨。
唔經唔覺已經嚟咗沙地阿拉伯幾年，第一日已經想劈炮。
呢度啲人好懶，只揀容易嘅事先做，不過一樣做得好慢。
公司嚮沙地規模好細，計埋我只得七個人，亦唔重視呢度啲發展，所以如果事業想突破，一定唔會嚟。


當日我只係想盡快離開香港，咁啱呢度個負責人退休，我就申請過嚟，嚟到先知中晒伏。
嚟之前我對阿拉伯嘅認識只限阿里巴巴同仙巴，同埋女人係上身得個 bra，下身透明長褲，帶住面紗跳扭腰舞。
現實係呢度啲女人，冇論係咪穆斯林，都要用罩袍由頭包到落腳，尤其首都利雅得，連眼都睇唔到。
吉達呢度好啲，比較開放，可以唔使遮面，圍住頭巾就得，有啲非穆斯林甚至唔戴頭巾。
不過公司仍然奉行性別分離，一個女同事都冇。
我對阿拉伯女人冇興趣，不過成日對住男人，心理都唔平衡。
沙地又冇咩娛樂設施，雖然上到網，去到 facebook 睇到 youtube，但所有令男人開心嘅網站都 block 晒，悶到變人乾。
但諗深一層，如果為贖罪，冇女人冇娛樂咪啱囉，寂寞同孤獨就係最好嘅懲罰。 
另外我識咗一班賓仔，佢地成日打籃球，於是唯一嘅消遣就係跟佢地打波，靠運動支持意志捱落去。
但究竟要捱幾耐?


我唔知。
我同 Joyce 靠 whatsapp 保持聯絡，我有好多野想講，不過每次打完一大篇就記起 Rebecca 死前嘅無助，最後 delete 晒，只剩普通問候。
Joyce 嘅回覆亦好簡短，其實佢係咪淡忘緊我?
不過我終於明白點解當年佢離開時，叫我忘記佢。
我唔知幾時先返去，無了期等待等如懲罰埋佢。
我好自私，亦好心痛，但我實在唔捨得佢。
直至有一日，有個唔識嘅本地電話打畀我...
「Hello.」
「喂，Alan，認唔認得我?」
「你把聲咁姣，點會唔認得? Sarah!」



<< 未完待續 >>