[深夜重口味] 黑色蒲公英: 我愛你，老公仔，我等你

話說我同 Joyce 嘅另一半都死咗，不過我地冇走埋一齊...

再次同 Joyce 見面已經嚮機場。
佢同張虹虹個妹同妹夫返重慶。
張虹虹個妹，張娃娃，成個大媽咁款，同張虹虹失散咗都好易認得番。
至於妹夫，丁鋼，蛇頭鼠眼，陰陰濕濕咁，我對佢印象好差。
「Joyce，我們先到閘口，你待會來吧。」
佢地走咗之後，我攞條門匙出嚟交畀 Joyce。
「我已經執好間屋，Rebecca 啲野都搬走晒。」
「Alan，其實你可以留住條鎖匙，想幾時返嚟都得。」


「唔好誤會，Joyce，我個心冇離開過你，不過依家實在冇辦法面對 Rebecca，面對你，同面對我自己，因為咁我先要走。」
佢有啲無奈。
「我唔知幾時返，既然係咁，keep 住條門匙都冇意思。」
佢終於接過。
「對唔住，Joyce，我應承過你無論如何都唔會離開你，點知咁快反口。」
「唔好咁講，其實我覺得係我累咗你地，如果冇我，你太太就唔會死。」
本來想話最衰果個應該係我，不過依家唔係爭論邊個責任大啲嘅時候。
「係呢，點解張虹虹份遺囑會寫你?」
「我都唔知，我同佢真係冇野...」
「我信你。」


「佢從來冇同我提過，不過我同張娃娃傾過，呢啲股份唔應該屬於我，返到去我會轉晒畀佢。」
「不過你小心佢老公，我覺得果個丁鋼唔係好人。」
「嗯，佢都係普通男人，我會小心。」
普通男人? 唔知點解，呢四個字從佢口中講出好似有特別含意。
「Alan，辦完張虹虹身後事之後我會嚮屋企等你。」
好似當年嘅我一樣。
「無論係一個月，一年，十年，定一百年，我都會等。」
「Joyce...」
我好想攬實佢，畀我感受埋最後一刻都好。
相信佢都一樣。


不過我忍住，我知愈攬只會愈唔捨得。
「你班機 boarding 喇。」
終於到咗呢一刻.
「再見，Joyce。」
「我愛你，老公仔，我等你。」
我地趁流淚之前一齊轉身，但行咗唔夠十步我停低。
好想偷偷望佢背影。
不過佢可能一樣停低咗偷望我。
我唔可以見到佢喊，所以堅持住，耷低頭，再次向前行。
出發去我嘅目的地: 沙地阿拉伯。

<< 未完待續 >>