[深夜重口味] 黑色蒲公英: 我冇事

話說 Joyce 突然話劉生嚮大陸出咗事，要上去救佢，從此我地失去聯絡...

「各位同學，測驗卷已經改好，聽到名出嚟攞番自己份卷。」
我如常地返學上堂。
「應該有一個同學未有卷嘅，自己舉手。」
我睇住課本，專心地聽梁 sir 講解。
「仲未知自己冇卷?」
國豪拍下我。
「阿邦，係咪你呀? 你份卷呢?」
「咩卷?」


「梗係測驗卷，唔通雞蛋卷咩?」
「幾時測過驗?」
「咪前日囉，你痴咗呀? 仲有，數學堂攞本中文書出嚟做乜春?」
「好喇，阿邦，唔好嘥其他同學時間，放學後嚟教員室搵我。」
放咗學，去到教員室搵 miss 潘，但佢話冇叫過我見佢，返出去時唔知點解被梁 sir 捉住...
「阿邦，我教咁耐書唔係未收過白卷，不過白到連名都冇係第一次，你做乜野?」
「你之前進步緊格，中期試仲令人刮目相看，點解突然變成咁?」
「我問過其他老師，佢地都話你退步咗好多，甚至可以話放棄自己，連籃球隊都唔去，究竟發生咩事?」
「係咪屋企有事? 定感情煩惱?」
「轉介你見輔導社工好唔好?」


聽完一輪訓話，我只有三句回應...
「知道喇，對唔住，我會改。」
再次返出教員室，呢次撞到 Rebecca。
「阿邦，到底你發生咩事? 次次問親就話冇事，我地中一已經同班喇，識咗咁耐都唔可以同我講咩?」
「我冇事。」
我想擺脫佢，但佢啄住我。
「係咪同你個鄰居劉太有關?」
突然間，有把刀插中我要害，早已結焦嘅傷口再次滲出血水。
「阿邦?」
我咬住下唇強忍，不過累積咗個幾月嘅痛楚一次過發作。


「阿邦，冇事架，如果喊可以釋放，即管喊啦。」
「鳴... Joyce 走咗...」
「Joyce 就係劉太?」
熱淚好似洪水沖毀河堤，最後我忍唔住將故事講晒出嚟。
「原來你地...」
佢有啲驚訝，不過好快扮番冇野，以為佢會行貨地叫我忘記 Joyce，點知...
「阿邦，與其坐嚮度，不如上去搵佢?」
「去上海?」
「雖然佢話唔知幾時返所以要分手，但咁樣阻止唔到你搵佢格，係咪?」
「都有道理。」
「一於咁話，考完試我陪你上去搵佢。」
你同我?

<< 未完待續 >>