[深夜重口味] 黑色蒲公英: 做一個令你自豪，令我驕傲嘅男人

話說我借到相機同腳架，打算幫 Joyce 影相，但返到屋企發現佢已經嚮度...

「Alan，你返得嚟啱喇，正想留字條畀你。」
Joyce 身邊有個旅行袋。
「阿劉出咗事，我要即刻返上去。」
「出咗咩事?」
「詳細唔清楚，聽講係經濟罪行，依家被公安扣留緊。」
「會唔會連累你?」
「唔會嘅，不過我一定要上去幫佢。」
突然心入面強烈不安。


「咁要去幾耐?」
佢閂埋手袋。
「坦白講我唔知，嚮大陸經濟罪行同政治罪行一樣可以欲加之罪。」
「我陪你上去啦。」
「點得呢? 你要返學，而且我嚮上面有啲朋友應該可以幫到手。」
「咁唔好去啦，你唔上去得唔得?」
不安感漸漸變成恐懼。
「唔可以，Alan，講到底我都係劉太，我唔可以唔理阿劉。」
「但係你愛我格，Joyce，係咪? 我愛你，唔好走。」
佢深呼吸，然後捉住我兩邊膊頭。


「Alan，其實一開始我只諗住玩玩下，睇你幾時玩厭會離開，不過日子耐咗，睇住你成長，見到你愈嚟愈識照顧我，我已經改觀。」
我想捉番住佢，不過雙手發震。
「雖然我地一齊生活只有大半年，不過你嚮我心目中嘅地位早已經超越阿劉，甚至小琳，你已經佔據我個心。」
「咁點解你仲?」
「但我始終係劉太，我地唔可以一齊。」 
恐懼令我全身發震。
「而且就算我地真係繼續落去，我地之間都有一個障礙永遠冇辦法打破，就係我大你十年。」
Joyce 開始變得水汪汪，唔係，係我雙眼水汪汪。
「你好快會踏入社會，你會愈嚟愈成熟穩重，但我只會愈嚟愈老，最後我地都係要分開。」
一滴眼淚由我眼角流落嚟。


「聽我講，Alan，分手係好痛，不過我相信你捱得過，比心機努力讀書，做一個令你自豪，令我驕傲嘅男人，好唔好?」
唔好，我唔要... 
不過連個口都震埋，出唔到聲。
最後佢嚮我額頭錫咗一啖...
「再見喇，老公仔，我愛你。」
然後轉身離開。
老公仔?
我愛你?
依家先講?
點解依家先講喎?
點解呀?
當門閂埋，我終於喊出嚟。
我控制唔到自己，一直不停喊。
直到腳軟跌低，坐嚮地繼續喊...
「Joyce!」



<< 未完待續 >>