來，一場書展殺人遊戲: 第五十三章

「呀豪，你知唔知你講緊咩呀？你除咗電腦之外，冇野叻架啦﹗」
 
子銘拉著呀豪，但呀豪卻意志堅定地回答﹕「就係因為你呢句，我就要證明俾你睇，我都係一個男人。」
 
「子銘佢只係口直心快啫，唔好放上心啦﹗」
 
我著緊的勸予著呀豪，無他，假如我們贏了可得到離開這裡的提示，這可是關係於我們的生死﹗若無絕對的勝利，我才不願意冒險。
 
「點解你覺得我唔會贏呢？」
 




呀豪反問我道，更令我感到不安的是，呀豪的性格明明是膽小得很，為何在這重要關頭又突然性情大變？
 
「唔答我啦？」呀豪自顧自地走前，誰也攔不住，擋不住現在的呀豪。
 
「有意思……居然係你﹗」
 
保安拾起地上的上衣並重新穿著﹕「睇嚟我都唔洗咁認真對待﹗」
 
「隨便你，我剩係知我會出盡力。」呀豪彷似變了第二個人似的，一個十分冷血，冷酷得很的人。
 




「唔好諗住大吓我就會驚你先得架……」保安失笑了兩聲道﹕「我讓你出招先，點睇？」
 
「唔洗，你先。」呀豪別過頭，亳不把眼前的對手放在眼內。
 
「豈有此理﹗」保安一拳打向呀豪，誰知呀豪竟避也不避，正準備硬生生的用臉接了這一記﹗
 
「你到底做乜撚野呀﹗」子銘把呀豪推開並剛好躲去這一拳。
 
「……」
 




「呀豪，你做咩呀？」joey也上前詢問道。
 
 
「我……都想為你地做一啲有意義既野呀﹗」呀豪倒坐在地上，呆望著離他不遠的手提電腦。
 
「你點會冇為我地做過有意義既野呢？如果唔係你，我地又點會知道呢個會場入面有咁多攝錄機呢？」我絕不理解呀豪現時的想法。
 
「係囉，我做到既野咪就係咁多囉……我都好想可以保護你地呀﹗你知唔知當我見住你地打得咁辛苦，我都會問自己一條問題，我到底係唔係男人﹗」
 
現在的呀豪垂頭喪氣，我也不知原來他心中是有如此想法。
 
「我仲好記得陽諾為咗救我而俾人一刀斬落去，點解我一直都係俾人保護嗰個？我都好想可以保護人﹗」呀豪把拳握得緊緊，雙眼死死的瞪著手提電腦。
 
「好似我啲咁既人，唔死仲有咩用？」呀豪正想伸手舉起手提電腦並準備一手破壞。
 




「啪﹗」
 
「你知唔知你部電腦係有幾重要？我同你講，你要死都唔好整死埋佢﹗」嘉穎贈了呀豪一巴掌，好讓他冷靜下來。
 
「如果唔係你，我一早就已經死咗響呢到，你咁都仲話冇保護我？」嘉穎雙眼通紅。
 
的確，假如呀豪在１Ａ大門前沒有叫住嘉穎的話，她早已被電死了。
 
「如果講冇用，我響呢到比你更加冇用﹗如果你唔想成為我地既包袱，就唔該你唔好響呢啲危急關頭先嚟同我發癲﹗」
 
流淚眼望流淚眼，總是讓人不知如何是好。
 
「我想講，我地每個人都有我地既生存價值，我地唔洗比較邊個有用啲邊個冇用啲﹗我剩係知道，我地冇咗邊個都唔得﹗」
 
我拍拍呀豪的肩膀，沒再多說什麼。




 
「喂，要做真情都唔該你留返返到屋企先做啦……呀係喎，唔記得咗你地都返唔到去，哈哈﹗」保安笑得彎下腰子。
 
「我地一定可以離開呢到。」子銘和陳新同時站了出來﹕「響我地兩個之間揀一個嚟同你單挑。」
 
「哼……咁先有返啲趣味架嘛。」保安指著他們二人﹕「點指兵兵，點著誰人做大兵，就你啦。」保安指著陳新並示意他就是被選中的男孩。
 
「隨便，反正你冇論揀邊個都好，都係得一個可能性……」陳新利用飛刀指回保安﹕「就係你輸。」
 
「有鬥心絕對係好事，不過太有自信只會帶嚟反效果……」
 
保安動動兩根指頭，示意陳新可隨時出擊。
 
陳新未有作近身攻擊，反而先投出飛刀作試探。而保安當然也沒有怠慢，欠身一閃便躲過一記。
 




突然那把飛刀回旋轉向保安身後，保安意識到背後有所風吹草動，立馬一記回馬槍並把飛刀擊退。
 
「將飛刀用到好似回力鏢咁，你都幾好野﹗」保安讚許道，彷似終於找到位可跟他較量的對手。
 
「到你。」陳新伸展全身筋骨以迎接保安的攻勢。