[科幻][長篇]星際星塵: 2.正式離開

距離地球毀滅仲有10日，地球嘅人口越嚟越少，留返係度嘅人只係剩返放棄生命嘅人，同埋堅持不遷不拆嘅中堅份子。有一批堅持不遷不拆嘅人開始提出左好多荒繆無論嘅提議，有啲人要求外星生命唔好毀滅地球，改為毀滅木星，水星，甚至係太陽。毀滅太陽嘅計劃得到左唔少人嘅讚同，希望救到地球一命。有啲宗教狂熱者聚集係大型公園入面，一齊點起燭光，祈禱，打坐，念經，就連神打都有，佢地最後集體返左去佢地嘅神戈度，至於佢地嘅神有無回應佢地真係不得然知。
史蒂芬霍金被選為地球文化傳承人之一，一則電視新聞報道。
唉如果我都有咁勁就好啦，坐係度睇緊電視嘅地球少年潘星華諗。
星華嘅屋企人已經決定左留係地球，反正對於佢地黎講，去邊都一樣。
按佢地嘅話黎講，就係咁嘅：
好似我地依啲人，走去邊都係一樣嘅姐，我地都無興趣再去一個新嘅地方啦，命黎架，街邊個風水師父都話我命中必有依劫。
星華總係懷抱夢想，希望，嚮往，畢竟佢係一位少年，不過因為佢嘅屋企人決定留守，星華決定留到最後一刻先離開地球。
星華嘅絕無僅有嘅朋友都一個一個搭飛船離開左地球，地球只係剩返最後一個老死，而依個老死聽日都會跟住屋企人離開地球。佢地約左係棄置左嘅商場最後聚首。
星華一見到佢依個老死－立明，就即刻衝前打佢個肚腩一下。
「頂，又打我，立明大叫不滿」




「都最後一次啦，咁都唔比我搞」。
星華講完依句，之後兩個人都好似意識到依次係最後一次可以好似而家咁傾計而沈默左一陣。
「你話我地之後會唔會再見啊啦」
「會嘅，有WhatsApp，Facebook架嘛」
「宇宙之間嘅通訊可以用到依啲野咩？」
「Err，好似又係bo」
「你話我地係去同一個地方係幾好呢」
「不如話地球無毀滅咪仲好」
「by the way，你話去到第二個星球，生活會係點呢？」
「唔係話同地球嘅環境完全一樣咩，所有野都唔會變架嘛」




「都係嘅」
「但其實我唔係好想去。地球保育區，乜真係可以還原地球嘅一切咩，啲野真係可以保持不變咩？」
「希望啦。」
兩個人咁就傾到第二日嘅清晨，然後立明就搭太空船離開左地球。
。打從地球毀滅嘅消息傳開，罪案就一直有增無減，但隨著毀滅嘅日子越黎越近，地球嘅人越黎越少，人就越黎越放肆，反正已經無人再可以阻止到佢地。唔少留低嘅人趁著地球完結之前盡情滿足自己嘅慾望，劫財，劫色，殺人，放火，一系列嘅罪案不斷發生。地球好似變成左罪惡之都，加速依個地球衰敗嘅日子。
星華作為留守到最後嘅人，只能夠靠屋企剩下嘅物質繼續生存，畢竟出面嘅世界變得太恐怖。星華住嘅戈度，無故被一班人放火，星華全家即刻逃到一個由外星生命設立嘅臨時庇護中心；但係戈棟樓，因為已經無人救火，就咁倒塌，將一批唔想逃走嘅人就咁燒死。
地球最後一日，除左一部分嘅樓仲未倒塌，幾乎所有人類嘅文明都被摧毀，紐約嘅自由女神，中國嘅紫禁城，法國嘅鐵塔，維港兩岸嘅建築都全數倒下。住係臨時庇護中心嘅星華係最後一日終於申請左前往位於C789710-8196-80嘅地球保育區，亦都即將坐最後一班太空船出發，告別荒廢嘅地球。
本來新嘅一日理應來臨，但依夜將會係最後一夜。星華同雙親揮手道別，登上左太空船。依架太空船非常巨大，入面卻一樣野都無，無座位，無廁所，無空姐，與其話係一隻太空船，不如話係一個垃圾桶，將所有人類塞入去。
係地球毀滅嘅10秒前，太空船正式起飛，而霎那間，太空船已經去到外太空。
地球無聲無色係宇宙消失左，感覺到地球消失嘅除左人類同太陽系其他行星，相信再無人會知道地球嘅消失。




星華嘅太空船進入左第二個空間繼續飛行，整個飛行嘅過程都非常寧靜，甚至根本感覺唔到自己已經進入左太空，入左太空船以後，星華就好似企係廣闊嘅平原咁，咩人都見唔到，亦都感覺唔到任何嘅加速。除左空間感嘅消失，時間都好似係太空船入面消失左，明明係穿越星系嘅過程，但星華卻完全無感受到時間嘅流逝。
時空好似終於正常返，星華終於感受到自己已經去左太空，正當佢諗住睇下太空究竟係點，卻發現自己已經唔再係太空船入面，而係太空之中漂浮。佢望到嘅唔再係白色嘅牆，而係一片黑色嘅宇宙。佢感到身體好唔舒服，係缺氧。星華開始失去知覺，暈倒係浩瀚嘅宇宙。