[科幻][長篇]星際星塵: 1.地球玩完？

位於銀河系嘅邊陲嘅一個行星，一個智力略高於猿人嘅智慧物種抬頭望著廣闊無垠嘅星海，思索今日嘅功課點樣先可以做完。依個未成年，處於青春期嘅智人，主宰依個星球命運嘅物種，同其他依個時期嘅智人一樣，充滿疑惑，對未來感到焦慮。係佢仲諗緊點樣解決虐待人類心理嘅數學題嘅時侯，佢仲未察覺一個翻天覆地嘅改變一步一步咁步近依個年輕嘅物種。
天上突然轉來一聲巨響，係一把類似人類嘅聲音：座標E435438-B8-S492801嘅居民大家好，你地嘅星球已經被選定成為星際鐵路嘅中轉站，所以一個月後將會清拆你地依個星球。簡單黎講，就係地球將會係一個月後被毀滅，再見咁多位。
「邊個玩野吖，我嘅靈感吖。」依個一直做緊數嘅地球少年潘星華用接近80分貝嘅聲波表示佢嘅不滿。
依個少年絕對係依個星球，依個地方，最典型嘅人類，所謂天塌下來當被蓋，區區地球毀滅嘅事，又點可以阻止每秒幾百萬上落嘅香港人嘅工作。中環嘅精英屌左一句之後，繼續望著美國納斯達克指數嘅上落，但佢地好可能係香港第一批意識到地球毀滅係一個事實。美國納斯達克指數係接近收市嘅時候，大跌接近一千點，有一批中環人離開左地球，佢地靈魂從此係星際之間漫遊。係朝早七點嘅時候，三色台滾動住嘅字幕一直寫住將會有重要消息宣布。終於係七點半嘅時候，聯合國五大常任安理會嘅首腦第一次一齊召開記者會，亦都係最後一次。係講左大概五分鐘嘅廢話之後，之前講嘅戈個充滿疑惑嘅少年就係時候要返學啦。
「快啲啦，唔好再睇電視啦，依啲野關我地鬼事咩」，話口未完，電視就由美國總統嘅樣變做黑色，同地球嘅命運一樣。
係電視熄左嘅一刻，依位少年出門口之際，美國三軍總司令正式向全宇宙宣戰，而每一個國家都表示將全力支援今次嘅軍事行動，依一刻係人類史無前例嘅團結，講一番荒謬無比嘅說話。
我地將會集合所有嘅核打擊力量，對敵人進行毀滅性嘅打擊，保護我地依個自由，民主嘅社會。
依個少年落到大街先發現，街頭已經一片混亂，佢亦都即刻跑左屋企。佢即刻開返電視，發現大台直播緊中央電視台嘅畫面，一支支導彈向天空發射嘅畫面，感覺就好似發射禮砲咁。依一堆無聊嘅軍事行動進行左足足一個早上，係下晝，行動正式升級，過萬支嘅核彈就咁飛左上天，足足過左一個鐘，天上又傳來巨響：
多謝地球居民放煙花歡迎我地嘅行動，為左令到咁多嘅地球居民可以繼續生活，我地將會宣布我地搬遷嘅機會，咁多位可以自由選擇。
我地將會係唔同嘅星球重建你地嘅居住地，但由於宇宙土地有限，所以係無可能完全複製你地嘅星球。我地將會平均分佈你地去唔同星球嘅自然保育區。




第二個選擇，你地可以參加計劃成為其它星球嘅居民，但由於位置有限，敬請從速申請；另外我地會選出一批地球人，成為地球文化承傳人，去唔同星球宣揚你地嘅文化，我地將會另行通知。 希望大家儘快答覆啦，你地仲剩返29日咋。
地球面臨絕望，一系列嘅軍事行動宣告失敗。各國首腦開始呼籲人類儘快決定自己嘅去向。
地球出現左兩派嘅人，其中一派決定儘快安排好去保育區嘅事，依一派多數係上流社會嘅人，對於自己嘅資產可唔可以轉移到第二個星球感到好擔憂。第二派堅持不遷不拆，希望推翻清拆地球嘅決定，佢地高舉民主自由嘅旗幟，喊著不遷不拆，守衛家園嘅口號，發起左大規模嘅抗爭運動，係街頭靜坐，高唱今天我，佢地要求外星生命給予地球人真選擇，推翻今次黑箱作業。遺憾地，係
地球99%嘅資本已經遷離地球嘅時候，依一批慢慢都失去左背後嘅支持者，而代表依批人向外星生命談判嘅人亦宣佈比對方以地球生命只屬第一階智能，不符合加入星際議會嘅條件，簡單黎講，地球人之於外星生命，就如狗之於地球人。依一班人滿滿散去，係最後一次嘅集會，各界嘅明星紛紛出席，以歌聲聲援地球，趁離開地球之前撈一筆油水。
但依個地球並唔係得依類人，有一種人，從來都唔會關心地球係咪毀滅，反正對於佢地，係邊度生活都係一樣。
「唉，做咁多做咩吖，命運黎嘅，要死就要死架啦。」
「老婆，依次拆遷地球，好似需要好多人手。」
「咪傻啦，關我地鬼事咩，依啲野唔好理咁多啦。」
依個少年嘅屋企就係咁，從來都唔關心究竟會點，好似亦都無權去理會究竟會點，但依個青春期嘅男生唔係咁諗，佢暗自許願，希望外星人帶走佢，等佢見識下心入面嚮往已久嘅宇宙。





開頭參考左The Hitchhiker 's guide of galaxy