是咁的，我嘅職業係動物傳心師: 154.共享能力進化

有時凡人令世界更美好嘅方法，唔一定係去做某啲事，可能只要唔做某啲事，已經會改變一切。

行惡簡單行善難，叫每個人行善太難，但唔行惡其實好簡單。如果我係凡人，面對今次嘅事，我可以唔再幫襯依間café，我可以唔開依種café賺錢；不過我作為有超能力嘅人，乜都唔做始終過唔去，哈哈，不知不覺我又攬上身，真係要同巴膠講聲對唔住。

我從來唔係咩大愛左膠，我可以原諒認錯嘅人，我可以體諒本質唔壞嘅人畀機會佢哋改過，但面對行惡又死不悔改嘅人，必須給予懲罰，被人踩上心口就踩返對方喺腳下。

上帝話人哋打你左面，你就畀埋右面佢打；但我嘅信條係，人哋打我左面，我就打到佢無得還手為止。

我強忍住太陽穴嘅劇痛，直至感覺到有異物撕破皮膚飛撲而出為止。





「啊！」對面嘅店長好似突然頭部中彈咁，之後佢就撳實自己個頭：「啊啊啊啊啊啊啊！」

「做咩事？bb你唔好嚇我呀！」

上一次同陳生共享傳心能力係短期性效果，而今次我感覺到自己嘅念力能夠控制進入其他人大腦嘅異物。