是咁的，我嘅職業係動物傳心師: 155.斷電

我兩隻手掌頂住頭部兩側，集中精神，感覺到自己好似喺一個大腦表面行緊，繼而踎低，將自己攝入其中一條腦摺紋之中，一路攝落去，直至全身卡住，唔上唔落。

我嘅意識返到現實，店長全身癱直抽搐，口吐白泡。

「點算呀⋯⋯發生咩事？」

鼻血湧出，我拖住蹣跚嘅腳步行出門口，點知被Zoe扯返轉頭：「咪走呀你！發生咩事！」

我用盡最後嘅力推開佢，然後狼狽咁走出café，之後就碌咗落樓梯，跌咗旺角大街嘅行人路上。





途人見我突然成身血碌出街都當堂嚇咗跳，紛紛避開睇定啲先算。

我嘅視線已經模糊一片。

「先生，你點呀？」直到有一個好心嘅阿嬸走過嚟，幫我打電話報警。

突然眼前就好似斷電嘅螢幕咁，漆黑一片。