是咁的，我嘅職業係動物傳心師: 153.改變唔到

「哈！你依家算係教訓我呀？我話你知我實長做長有呀！大不了咪等返一年半載，等件事丟淡左，咪又再出返嚟搵食囉！被你個垃圾記者上網狙擊又如何呀？香港人好健忘嘅，過多兩三年我再出返嚟，都無人知道我以前做過乜啦。」

無錯，佢可以等幾年，等件事過咗一段時間，再以動物為賣點賺錢，只要佢根深蒂固嘅價值觀無變，咁遲早都會有新嘅動物遭殃。我救得到今次依三十隻貓，都救唔到將來會成為賺錢工具嘅千千萬萬隻。

依種人同陳生唔同，幾十年嚟嘅人生都係無良知又冷酷無情，就算佢聽得明啲貓講乜，知道啲貓有幾咁痛苦，都唔會良心發現。

佢亦講得啱，出面仲有大把人做緊類似嘅事，即使我改變咗佢，都改變唔到其他以動物賺錢嘅人。

就算有超能力，都改變唔到世界。





「點呀超級英雄，做乜唔出聲啊？係咪因為我講得太啱呀所以駁唔到？你以為你可以影響到我咩？唔好咁天真啦！」

太陽穴開始發痛，有異物喺入面掙扎。

改變唔到，係咪就咩都唔做？

警察係咪可以話：「我就算捉到依個殺人犯，依個世界仍然有其他人會殺人。」然後就唔捉人？