是咁的，我嘅職業係動物傳心師: 152.好虛偽好嘔心

「多謝晒喇，我會好好照顧你哋啲貓架喇。最後講多一句，收手啦你兩個。」店主咬牙切齒，握緊拳頭，Zoe皺晒眉，都又無嘢幫到手，淨係挨實自己男朋友。

「動物真係唔係畀你哋咁樣壓榨嚟賺錢架，所以，真心架，收手啦。」

啪！店長一掌拍落枱：「收手？你唔好咁癡線啦，大把人用動物搵錢啦又唔係淨係我一個人！又唔見你去叫佢哋收手？無錢賺嘅話我點養到嗰三十幾隻貓！唔使貓糧呀？唔使幫佢哋沖涼呀？你知唔知要幾錢呀！」

我可以傳心，可以同人共享傳心，亦可以睇返過去嘅片段，但我無辦法控制人心，我無能力將只會向錢看嘅人變得有愛心。

「錢錢錢，你淨係識得講錢，仲要用愛貓嚟做包裝唔覺得自己好虛偽好噁心咩？」





一時激動，諗起「噁心」兩隻字，我又幾乎想嘔，但依家唔可以輸個勢畀佢，所以我即刻啪咗兩塊陳皮入口。

或者係因為啱啱被我步步進逼，喺條女面前失晒威，所以依家想扳回一城，mk店長大聲凶返我轉頭︰「唔覺喎！喺香港梗係乜嘢都講錢啦唔係點呀？唔係我養住依三十幾隻貓，佢哋一早係街嗰度畀人毒死咗啦！咁我養得佢哋，拎返啲回報都唔得咩？」

將養育生命當成投資嘅人，嗰種扭曲咗十幾年嘅價值觀難以改正過嚟。

「就算要以貓嚟做賣點，都唔係你咁樣做。你繼續咁樣做落去，開幾多間都係執粒收場架咋。轉撈第二行啦，咪再打動物嘅主意。」