是咁的，我嘅職業係動物傳心師: 151.最好嘅方法

我再三諗過，依家嘅方法，即係由我出錢去收購成間舖，將啲貓接收晒返嚟照顧係最好嘅解決方法。假設我咩都唔做，而miki嘅狙擊無效，咁一切如常，間舖照舊運作，所有店內嘅貓都會以同一個模式繼續受苦。

就算miki狙擊好有效，令依間舖嘅生意一落千丈，以店長嘅為人話唔定當唔夠錢養佢哋嘅時候，初頭就減少糧食、減少清潔、隔耐啲先換貓砂，情況再壞啲就直情棄養，佢地就拍拍蘿友走人。

無論事態往邊個方向發展，結果都係動物受害。

「咁你依家知我有睇啦？依個係你哋嘅最後機會，講真，我唔係為你哋而咁做，我亦無心接管依間café 嘅生意。你就當我係用十萬同你買晒咁多隻貓。」

「bb……點……點呀？」Zoe六神無主咁拉住男朋友嘅衣袖。





「你唔好嘈我住！我諗緊！」

我將手中卷成一嚿嘅支票提起，丟向店長塊面度，佢即刻成個跳起想衝過嚟打我，但忍咗手。

我將枱上嘅臨時合約推近佢哋兩個。

店長知道自己大勢已去，佢始終都係一個向錢看嘅人，明知再做落去會蝕到血本無歸，趁依家仲有最後機會賺一筆，點都唔會倒自己米。

佢仔細咁睇我推過去嘅合約。





「你好嘢。」最後店長妥協，拎出原子筆喺一式三份嘅臨時合約度簽咗自己個名，然後死死氣執返地上面嘅支票。

我收返好臨時合約。