是咁的，我嘅職業係動物傳心師: 150.攤牌

我喺背囊拎出一張啱啱急急忙忙準備嘅臨時合約同埋支票出嚟。

「如果無問題就喺依度簽個名，遲啲搵律師搞埋正式嘅手續。」

店長好奇咁拎張支票嚟睇，之後真係發火，揸巢咗張支票丟向我︰「你愈嚟愈離譜！十萬一定唔賣！」

我執返起支票紙球，微微拾頭盯住眼前嘅mk仔︰「你哋都知依家網上輿論嘅走向會係點，做太多陰質嘢自然會令大部分嘅客人睇唔過眼。繼續炒落去，你哋盤生意都唔使做㗎喇。」

講到依度，mk店長頭上青筋暴現，死死咁望實我。





「講真，你今日唔賣畀我，繼續做落去，無咗依家十萬蚊賺之餘，仲要做蝕本生意做到執粒為止。我係你，依家咁嘅情況，都係賣畀我賺尾水先係明智之舉。」

惡意嘅眼神穿過鏡片盯喺我身上。

Zoe搶前反駁：「話唔埋㗎喎，或者我哋捱得過呢？」

「我諗未必喇。話埋你知，嗰日同你哋做專訪嗰個女記者miki就係我搵嚟。佢寫完報道之後收到你哋前員工爆料，好快會出一篇新嘅報道。唔止咁樣，事關你哋已經試過執笠換名再做同類型生意，所以佢會繼續狙擊你哋，直到你哋收手為止。」

「哼，仲話無睇新聞。」