是咁的，我嘅職業係動物傳心師: 149.你係咪玩嘢？

「哈哈，好少生意人話錢幾多唔係問題。我真心認同你哋話要推廣愛貓文化，好明顯我就係同道中人啦。既然係咁，小小心意，五萬蚊讓畀我啦。」

mk店長同佢女朋友都大笑起嚟，笑到眼淚水都飊出嚟咁滯。店長靠前，托住下巴︰「先生，你知唔知頂讓一間樓上café，依家市價係幾多？我哋依度話晒都叫座落旺角地段，每個月利潤成四萬幾喎。」

「市價應該都四五十萬，我知道吖。又係你話錢幾多唔係問題嘅，最重要係認同你哋理念吖嘛。放心喎，讓咗畀我之後一定會搞得好好睇睇，你哋啲貓我都會好好照顧佢哋。」我特意強調「好好」兩隻字。店長挨返後，以身體語言表示「無咩興趣」。

「咁嘅，阿……」

「金先生。」





「阿金生，雖然話錢唔係問題，但五萬蚊始終都差太遠喇。我哋嗰陣開鋪裝修都唔止依個價係咪先？五萬的話就不了。」

「既然我同你心目中個價差太遠，咁你話我知差幾多？」

「你自己都知市價啦，你話差幾多？」

「咁又真係差好多嘅。唔好意思，啱啱太認真以為你話錢唔係問題就真係唔係問題。」

聽到我句說話擺明有骨，店長眉頭微微一皺。





「一口價三十萬啦，你點睇？」

店長翻一翻白眼︰「都仲差十幾廿萬喎。」佢嘅語氣雖然好唔耐煩，但偏佩就無發惡叫我走。

其實企喺佢角度諗，過多兩日當網上輿論爆發開去之後，生意額一定大受打擊，所以趁依家有我依隻咩都唔知嘅水魚，梗係點都抬高啲個價，賺最後一轉尾水然後甩身，點都唔會反枱叫我走。

「咁……廿五萬？」

今次店長真係開始燥︰「你係咪玩嘢？」